Лінкі ўнівэрсальнага доступу

Чыноўнікі патрабуюць, каб бяздомныя плацілі за рэгістрацыю ў прыватным прытулку


Аляксей Шчадроў, каталіцкі вернік, які ўтрымлівае прыватны прытулак для бяздомных людзей

На бяздомных у прыватным прытулку Аляксея Шчадрова ў вёсцы Аляксандраўка Шчучынскага раёну паскладалі пратаколы за пражываньне без дакумэнтаў і рэгістрацыі. Чыноўнікі патрабуюць ад Шчадрова выселіць усіх бяздомных.

Паводле Аляксея Шчадрова, прадстаўнік аддзелу грамадзянства і міграцыі Шчучынскага РАУС, які днямі наведаў прытулак, склаў пяць пратаколаў на бяздомных, якія жывуць у прытулку, за тое, што яны ня маюць рэгістрацыі, а ў дваіх яшчэ і няма пашпартоў.

Шчадроў патлумачыў, што, акрамя гэтага, цяпер ён штомесяц павінен плаціць у бюджэт па 105 тысяч рублёў за пражываньне ў яго бяздомных. Іначай, як папярэдзіў міліцыянт, усіх чакаюць штрафы ў памеры чатырох базавых велічынь. Шчадроў сказаў Свабодзе, што ўжо звыкся з прычэпкамі да яго з боку ўладаў, але ўсё роўна яму вельмі крыўдна, што чыноўнікі, бачачы бяздомных і нікому не патрэбных людзей, так да яго ставяцца.

— Чыноўнікі мне заўсёды спасылаюцца на тое, што ў нас, маўляў, такія законы. А дзе ўзяць бяздомнаму, кінутаму чалавеку грошы на рэгістрацыю — на такое пытаньне законы не даюць адказу? Дзе мне ўзяць такія грошы, калі мы жывём пераважна на ахвяраваньні добрых людзей? Улады ніводнага разу нічым нам не дапамаглі. І гэтыя бяздомныя людзі кінутыя валяюцца па вуліцах у гарадах, пра іх ніхто ня дбае.

Хатка, у якой жывуць бяздомныя
Хатка, у якой жывуць бяздомныя

Шчадроў кажа, што міліцыянт прапаноўваў, каб бяздомныя ехалі ў Горадню, а там, маўляў, ёсьць спэцыялізаваны дзяржаўны дом, дзе яны могуць прыходзіць і начаваць. Але, паводле Шчадрова, той дом на летнія месяцы зачыняецца на рамонт, дый можна там толькі пераначаваць. А дзе нямогламу чалавеку бавіць цэлы дзень, што есьці, у што апранацца?

— Вось давай, каб іх не было тут, і ўсё, і болей нічога ня хочуць слухаць. А лёсы людзкія — гэта так, дзеля паметкі? У нас вось нядаўна харчы былі скончыліся, дык давялося тэлефанаваць да знаёмых, то людзі прысылалі пасылкамі, грошы перасылалі. Проста звычайныя людзі гэта рабілі, якія праз СМІ даведаліся пра нашы праблемы. А ўлады прысылаюць штотыдня толькі праверкі. Нікому ў голаў нават не прыходзіць, каб хоць нечым дапамагчы кінутым людзям. Але ня трэба іх дапамогі, абы яны не перашкаджалі.

Цікаўлюся ў Аляксея — ці робяць дабрачынныя ахвяраваньні беларускія прадпрыемствы і арганізацыі? Магчыма, прыватныя?

— Ды ніхто і ніколі. Хаця ў цяжкія часы не адзін ліст напісалі з просьбамі. Дапамога прыйшла аж са Швайцарыі — ад дабрачыннай арганізацыі, якая дапамагае бяздомным. Яны прачыталі пра нас у СМІ, у тым ліку і ваша Радыё Свабода шмат нам дапамагло сваімі публікацыямі. За гэтыя сродкі мы і вокны ў доме зьмянілі, і дзьверы, і харчаваньне куплялі, і адзеньне, і іншае...

Да размовы далучаецца адзін зь бяздомных — Васіль. Ён застаўся адзін, і ад людзей аж на Віцебшчыне пачуў пра прытулак Шчадрова і сам сюды дабраўся. Гэта яшчэ даволі малады чалавек, ня вельмі гаваркі. Кажа, што дапамагае Шчадрову па гаспадарцы, сячэ дровы, косіць траву, палівае гародчык.

Зьвяртаю ўвагу, што трава каля дома абкошаная, у садку таксама, гародзік праполаты — усё як мае быць у гаспадароў.

Спадар Васіль дабраўся ў прытулак зь Віцебшчыны
Спадар Васіль дабраўся ў прытулак зь Віцебшчыны

— Ведаеце, калі чыноўнікі даведаліся, што сюды швайцарцы прыяжджалі, то яны пачалі зайздросьціць Шчадрову, што тыя яму дапамаглі грашыма. Думаюць, што Шчадроў на іх шыкуе. А ён усё траціць на нас усіх. Але ніхто зь іх ня бачыць, як ён нам купляе і шкарпэткі, і трусы, і харчы. Вось калі прыяжджалі чыноўнікі, то я ім казаў: дзе мне лепш — ці хадзіць па падʼездах уначы шукаць, дзе паспаць, ці я тут спакойна і папрацую, і адпачну? Я ім прапаноўваў: калі мы ня можам тут жыць, то няхай нас пазабіраюць па сваіх кватэрах. Але чамусьці мне на гэта нічога не адказвалі. Ці, можа, нам у іх пад дзьвярыма ляжаць і спаць? Ім гэта кажаш, але ўсё ня мае ніякага сэнсу. Кажуць, што ў нас законы такія...

Бяздомны Юры 13 год адбыў у вязьніцы. Распавядае, што апошнія два гады наагул начаваў у лесе, толькі на дзень выходзіў у горад, каб пашукаць нешта паесьці. Працы знайсьці немагчыма, бо няма рэгістрацыі.

Спадар Юры апавёў, што да прытулку жыў два гады ў лесе
Спадар Юры апавёў, што да прытулку жыў два гады ў лесе

— Такіх, як мы, ужо некалькі адсоткаў насельніцтва хутка будзе, і ніхто пра нас ня дбае. У Горадні пусьцяць пераначаваць чалавек 20, а астатнія — хто дзе можа, там і начуе. А цэлы дзень дзе боўтацца і што рабіць? Тут вось неяк жывем, спакойна пасьпім, устанем папрацуем. Мясцовыя людзі часта прыходзяць, просяць нешта зрабіць. Тут неяк жыцьцё пачынае станавіцца з сэнсам. Але, бачыце, то мясцовае начальства з праверкамі, то раённае...

У прытулку жыве і адна жанчына — спадарыня Данута. Яна завіхаецца на кухні, поле гарод, глядзіць за ляжачым хворым, які ня можа хадзіць.

Спадарыня Данута і спадар Іван
Спадарыня Данута і спадар Іван

— Я задаволеная тутэйшай атмасфэрай: тут усё спакойна, кожны нечым сваім заняты, прырода вунь якая добрая, асабліва цяпер, улетку. Аляксей стараецца, каб мы тут галодныя не заставаліся. Я тут з задавальненьнем праводжу час. А ўлады — ды што тыя ўлады? Яны ніколі і нічым не дапамаглі. Я вунь засталася безь нічога ў жыцьці, як кажуць людзі, засталася жыць пад плотам. Але ад гэтага ніхто не забясьпечаны. І ў мяне ў жыцьці так выйшла. Ну, але ж жыву...

Гародчык бяздомных
Гародчык бяздомных

Аляксей Шчадроў кажа, што пакуль ня вырашыў, як будзе рэагаваць на складзеныя пратаколы. Ён кажа, што надалей моліцца і верыць, што Бог дасьць розум і чыноўнікам.

Інвалідная каляска для тых, хто ня можа сам хадзіць
Інвалідная каляска для тых, хто ня можа сам хадзіць

Глядзець камэнтары (2)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG