Лінкі ўнівэрсальнага доступу

«Моладзь БНФ» прапануе забараніць Жырыноўскаму ўезд у Беларусь


Уладзімер Жырыноўскі, архіўнае фота

Актывісты «Моладзі БНФ» — маладзёвай арганізацыі Беларускага народнага фронту — зрабілі шэраг захадаў адносна выказваньняў расейскага палітыка Ўладзімера Жырыноўскі пра Беларусь.

Актывіст «Моладзі БНФ» зь Берасьця Максім Солад зьвярнуўся ў міністэрства ўнутраных справаў Беларусі з патрабаваньнем даць прававую адзнаку выказваньням расейскага палітыка Ўладзімера Жырыноўскага адносна Беларусі, а таксама разглядзець пытаньне аб забароне яму ўезда ў Беларусь.

Падставай стала заява дэпутата Дзярждумы, якая, як лічыць аўтар звароту, пасягае на тэрытарыяльную цэласнасьць і незалежнасьць Беларусі:

«Што хоча Лукашэнка? Асобную дзяржаву, але цэны няхай будуць унутрырасійскімі. З якой нагоды? Тады давайце вы будзеце часткай нашай дзяржавы».

Паводле расейскіх мэдыяў, гэтак намесьнік сьпікера Дзярждумы Ўладзімер Жырыноўскі пракамэнтаваў выказваньні Аляксандра Лукашэнкі падчас размовы з журналістамі, якая адбылася 2 лютага. Лукашэнка ў размове з журналістамі паведаміў пра намер кіраўніцтва Расеі скараціць пастаўкі нафты ў Беларусь і абураўся тым, што гэта выкарыстоўваецца ў якасьці «шантажу».

Актывіст зь Берасьця зьвярнуў увагу, што выказваньні, які ставяць пад сумнеў незалежнасьць Беларусі, гучаць з вуснаў Жырыноўскага ўжо не першы раз.

«Беларуская ўлада ніяк не рэагуе на падобныя заявы і такім чынам дазваляе публічна прыніжаць краіну ды пасягаць на тэрытарыяльную цэласнасьць Рэспублікі Беларусь», — адзначае, паводле прэсавай службы арганізацыі, яшчэ адзін актывіст «Моладзі БНФ», кіраўнік лідзкай суполкі арганізацыі Аляксей Маркевіч.

«Мы лічым вельмі важным рэагаваць на дадзеныя выпадкі, каб паказаць нашу рашучасьць абараняць тэрытарыяльную цэласнасьць і незалежнасьць Рэспублікі Беларусь», — таксама заявіў сябра Рады Моладзі БНФ Мікіта Краснакуцкі.

«Нягледзячы на адказ МУС РБ мы будзем і надалей рабіць усё дзеля таго, каб абараніць незалежнасьць і сувэрэнітэт нашай краіны. Кожны павінен зразумець, што наша краіна зьяўляецца самастойнай і толькі беларускі народ можа вырашаць, куды яму ісьці і што рабіць. Мы з радасьцю чакаем гасьцей у нашай краіне, але вельмі важна, каб госьці не забывалі, што яны госьці», — лічыць намесьнік кіраўніка «Моладзі БНФ» Аляксей Дарашэнка.

Глядзець камэнтары (9)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG