Лінкі ўнівэрсальнага доступу

Алесь Мара: Я саромеюся сьпяваць, але Бураўкіну вельмі падабалася


Алесь Марачкін, беларускі мастак, адзін з арганізатараў і першы кіраўнік творчай суполкі «Пагоня», вядомы таксама як паэт Алесь Мара, расказаў Свабодзе яшчэ пра адно сваё захапленьне — сьпевы. Мультымэдыйны дыск ягоных песень і карцін летась выйшаў у Менску.

Дыск называецца «Калодзеж у жыце». На ім — запісаныя голасам аўтара вершы з аднайменнага зборніка, народныя песьні, якія знайшліся ў архіве сына мастака — Ігара Марачкіна, а таксама некалькі дзясяткаў карцін.

Адну зь песень — «Была ў Ганулі злая мачыха» — Алесь Мара запісаў з жонкай Ірынай, якая памерла некалькі год таму.

пачакайце

No media source currently available

0:00 0:03:37 0:00
Наўпроставы лінк

«Выдаць дыск мне параіла сьпявачка Тацяна Грыневіч-Матафонава. Мы задумалі яго так, каб там былі і карціны, і вершы з маёй кніжкі „Калодзеж у жыце“, а таксама тое, як я сьпяваю магілёўскія народныя песьні. Магілёўскія — бо адтуль паходзяць мае продкі, і ў маладосьці я запісваў фальклёр у тым рэгіёне. Гэтыя песьні я чуў ад маці, ад дзеда. Яны ўнікальныя, іх цяжка пераняць, бо яны вельмі галасістыя і з тонкімі нюансамі. Па настроі яны сумныя. Люблю іх слухаць, калі на душы самотна», — расказаў аўтар.

пачакайце

No media source currently available

0:00 0:01:54 0:00
Наўпроставы лінк

Алесь Мара прызнаўся, што любіць слухаць і сьпяваць народныя песьні, але публічна ніколі гэтага не рабіў — толькі ў коле сяброў:

«Гэта маё хобі. Саромеюся выступаць перад вялікай колькасьцю людзей. Але аднойчы давялося сьпяваць у АртСядзібе на адным зь мерапрыемстваў, дзе быў Генадзь Бураўкін. Ён слухаў-слухаў мае сьпевы, а пасьля дужа высока ацаніў іх. Пасьля ён папрасіў мяне запісаць гэтыя песьні, каб людзі маглі іх паслухаць».

пачакайце

No media source currently available

0:00 0:03:07 0:00
Наўпроставы лінк

Карціны на дыску падабраныя так, каб «не выяўляць нонканфармісцкі настрой Алеся Мары як мастака»:

«Мы так зрабілі, каб у вочы асабліва ня кідалася мая палітызаванасьць, мой нонканфармізм. Для чаго так вырашылі? Гэтая цэнзура адбылася для таго, каб дыск мог спакойна прэзэнтавацца ў школах».

Карціны на дыску падзеленыя на тэматычныя блёкі. «Асобы» — тут партрэты Вітаўта Вялікага, Рагнеды і Ізяслава, Эўфрасіньні Полацкай, Зянона Пазьняка, Кастуся Каліноўскага, Міхала Клеафаса Агінскага, Францішка Скарыны і іншых. «Краявіды» — тут прыродныя замалёўкі Полаччыны, Магілёўшчыны. «Паданьні і легенды» — тут такія пэрсанажы, як Страцім-лебедзь, Чорная дама Нясьвіжа.

Дыск распаўсюджваецца праз АртСядзібу.

Ігар Лосік Кацярына Андрэева Ірына Слаўнікава Марына Золатава Ягор Марціновіч
XS
SM
MD
LG