Палата прадстаўнікоў прыняла «Закон Ліндсі Грэма аб санкцыях супраць Расеі і Ірана 2026 года» 262 галасамі «за» пры 159 «супраць»; за дакумэнт прагаласавалі 203 рэспубліканцы, 58 дэмакратаў і адзін незалежны заканадаўца. Супраць выказаліся сем рэспубліканцаў і 152 дэмакраты, піша Радыё Свабодная Эўропа / Радыё Свабода.
Раней у мінулым месяцы законапраект ужо быў ухвалены Сэнатам (86 галасоў «за», 11 — «супраць»). Ён названы ў гонар нябожчыка — сэнатара-рэспубліканца ад штата Паўднёвая Караліна Ліндсі Грэма, які больш за год працаваў над забесьпячэннем двухпартыйнай падтрымкі гэтага дакумэнта да сваёй раптоўнай сьмерці ў ліпені.
Чакаецца, што прэзыдэнт ЗША Дональд Трамп падпіша законапраект.
Што прадугледжвае законапраект
Законапраект накіраваны супраць расейскіх чыноўнікаў, фінансавых устаноў, энэргетычнага сэктару і так званага ценявога флёту танкераў Расеі. Ён таксама дае Трампу паўнамоцтвы ўводзіць тарыфы да 100 працэнтаў на буйных пакупнікоў расейскай нафты і газу, а таксама на краіны, якія дапамагаюць Маскве абходзіць санкцыі.
Гэты законапраект таксама пашырае санкцыі ЗША супраць Ірана.
Яго прыняцьце зьяўляецца першым буйным двухпартыйным заканадаўчым актам Кангрэсу ў падтрымку Ўкраіны пасьля таго, як у красавіку 2024 года быў зацьверджаны пакет экстранай дапамогі.
Тарыфы падзялілі дэмакратаў
Шлях законапраекта праз Палату прадстаўнікоў быў ускладнены дэмакратычнай апазыцыяй, якая ў асноўным сканцэнтравалася на дадатковых тарыфных паўнамоцтвах, якія гэтым праектам надаюцца Трампу.
Лідэр меншасьці ў Палаце прадстаўнікоў Хакім Джэфрыс зь Нью-Ёрка заявіў, што падтрымлівае ціск на Расею, але ня можа падтрымаць тое, што ён назваў шырокімі новымі прэзыдэнцкімі тарыфнымі паўнамоцтвамі.
Ліндсі Грэм, рэспубліканец ад штату Паўднёвая Караліна, які памёр у ліпені, быў адным з самых актыўных прыхільнікаў Украіны ў Кангрэсе.
Зяленскі: гэта надзвычайна моцны інструмэнт, які можа спыніць Расею
Прэзыдэнт Украіны Ўладзімір Зяленскі назваў сымбалічным, што Палата прадстаўнікоў Кангрэсу ЗША ўхваліла гэты закон у ноч, калі расейскія войскі зноў атакавалі ўкраінскія рэгіёны балістыкай і дронамі. Пацярпела энэргетыка, жылы сэктар, больш за 10 чалавек атрымалі раненьні, у тым ліку дзеці.
«Менавіта законапраект Ліндсі Грэма і іншыя моцныя санкцыйныя крокі партнэраў супраць крыніцы гэтай вайны, супраць Расеі, — гэта надзвычайна моцны інструмнт, які можа спыніць гэтую тэрарыстычную вайну і прывесьці Расею да неабходнасьці ўсталяваньня міру. Санкцыі павінны быць моцныя, каб уся работа дзеля міру, у тым ліку, нашыя супольныя з Амэрыкай, Эўропай і іншымі сябрамі дыпляматычныя намаганьні, спрацавалі. Дзякую чальцам Палаты прадстаўнікоў, сэнатарам, лідэрам Кангрэсу ЗША за падтрымку гэтага законапраекту. Расеі патрэбна заканчваць сваю вайну», — заявіў Уладзімір Зяленскі.
Форум