«У новым навучальным годзе навучальна-палявыя зборы ў пяцідзённым фармаце пройдуць і для навучэнцаў каледжаў», — працытавала Андрэя Іванца дзяржаўнае агенцтва «Минск—Новости».
Паводле яго, у 2027–2028 навучальным годзе для навучэнцаў каледжаў такія зборы падоўжаць з 5 да 10 дзён, як ужо зрабілі для дзесяціклясьнікаў.
Міністар адукацыі заявіў гэта ў сваім выступе на форуме пэдагагічных работнікаў «Менск адукацыйны: тэрыторыя канкрэтных справаў».
Іванец адзначыў, што сёлета навучальна-палявыя зборы прайшлі прыблізна 15% сталічных дзесяціклясьнікаў. Аднак ён не ўдакладніў, зь якіх прычын у зборах ня ўдзельнічалі іншыя дзесяціклясьнікі, бо ўдзел абавязковы, а тых, хто не прайшоў зборы, могуць не перавесьці ў выпускную клясу.
«Ставім задачу ў новым навучальным годзе: усе навучальна-палявыя зборы для юнакоў 10-х клясаў павінны адбыцца на базе вайсковых частак або цэнтраў дапрызыўнай падрыхтоўкі. І гэта наша супольная работа зь сілавым блёкам, якая забясьпечыць сапраўды якасную і цікавую працу з школьнікамі», — дадаў Іванец.
Што папярэднічала
Сёлета ў Беларусі ўпершыню прайшлі 10-содневыя навучальна-палявыя зборы для вучняў 10 клясаў. Яны адбываліся ў апошні тыдзень траўня і першы тыдзень чэрвеня ўва ўсіх рэгіёнах краіны. Вучні мусілі знаходзіцца ў лягерах дзень і ноч цягам усяго пэрыяду збораў. Аднак у выпадках, калі гэта было немагчыма, зборы праводзілі на базе школаў ці гімназіяў.
У Міністэрстве адукацыі Беларусі адзначалі, што зборы абавязковыя і школьнікі ня могуць адмовіцца ад іх праходжаньня. Зборы ёсьць часткай адукацыйнага працэсу, які прадугледжанае трэнаваньне практычных навыкаў у прадмеце «Дапрызыўная і мэдычная падрыхтоўка».
Вучні маглі атрымаць вызваленьне ад збораў толькі паводле мэдычных паказаньняў. Іх вызначылі асобнай пастановай Міністэрства аховы здароўя яшчэ ў 2022 годзе.
Дзяўчаты таксама абавязаныя прайсьці зборы. Для іх практычныя заняткі праводзілі ў мэдычных установах, рэгіянальных аддзелах Беларускага таварыства Чырвонага Крыжа або Міністэрства надзвычайных сытуацыяў.
Чаму гэта важна
Навучальна-палявыя зборы для школьнікаў сталі часткай агульнае тэндэнцыі мілітарызацыі ўнутранай палітыкі пасьля пачатку падтрыманай кіраўніцтвам Беларусі поўнамаштабнай расейскай агрэсіі супраць Украіны ў 2022 годзе.
Мілітарызацыя стала адным з інструмэнтаў так званага патрыятычнага выхаваньня моладзі, заснаванага на тэме памяці пра «Вялікую айчынную вайну», як улады Беларусі называюць Другую ўсясьветную вайну.
З 2021 году Міністэрства ўнутраных справаў Беларусі пачало актыўна ствараць «патрыятычныя клюбы» пры школах. Паводле афіцыйнай інфармацыі, цяпер на тэрыторыі краіны створаныя і дзейнічаюць прыблізна 160 вайскова-патрыятычных клюбаў, якія аб’ядноўваюць больш за 5,5 тысячы хлопцаў і дзяўчат школьнага ўзросту.
Сёлета вайскова-патрыятычнай прапагандай пачалі ахопліваць нават выхаванцаў дзіцячых садкоў.
Форум