Як паведаміла расейскае выданьне «Известия», Дзьмітрый Мізгір прыблізна тры месяцы знаходзіўся ў фэдэральным вышуку ў межах маштабнага расьсьледаваньня аб пастаўках для Міністэрства абароны. У пэўны момант сілавікі атрымалі інфармацыю, што падазраваны паспрабуе выехаць празь Беларусь.
Выданьне сьцьвярджае, што беларускія сілавікі за кароткі час высьветлілі некалькі магчымых адрасоў, дзе расейскі бізнэсовец мог хавацца, а дакладнае месца вызначылі ўжо па яго тэлефонных размовах і вулічных відэакамэрах. Пры арышце ён не чыніў супраціву.
Крыніцы расейскага выданьня сьцьвярджаюць, што, знаходзячыся ў Беларусі, бізнэсовец спрабаваў «нефармальна дамовіцца з вайсковым сьледзтвам і зьняць сябе з вышуку, але гэта яму не ўдалося».
Маскоўскі 235-ы вайсковы гарнізонны суд ужо арыштаваў Мізгіра на два месяцы. Ён пачаў даваць сьведчаньні але сваёй віны не прызнае.
Сьледзтва лічыць Мізгіра ключавым зьвяном у махлярскай схеме паставак няякасных кансэрваў у баявыя вайсковыя часткі, якія ваююць у зоне «СВА». У склад кансэрваў дадавалі дадавалі абрэзкі сьвіных туш, крухмаль, забароненыя дзяржаўнымі стандартамі харчовыя дабаўкі, шпік і гэтак далей. Шкоду, нанесеную Міністэрству абароны Расеі, ацанілі ў 700 мільёнаў расейскіх рублёў (больш за 8,5 мільёнаў даляраў у эквіваленце. — РС).
Схему выкарыстоўвалі ў 2024–2025 гадах. Паводле падлікаў, у падразьдзелы групіровак «Захад», «Усход», «Поўдзень» і «Цэнтар», а таксама на чарнаморскі флёт паставілі 170 тон няякасных кансэрваў.
Што папярэднічала
У Беларусі ў 2020 годзе ва ўсіх абласных гарадах і вялікіх раённых цэнтрах пачалі інтэнсіўна ўсталёўваць відэкамэры, па якіх потым ідэнтыфікавалі ўдзельнікаў акцыяў пратэсту супраць фальсыфікацыі вынікаў прэзыдэнцкіх выбараў 9 жніўня 2020 у году.
У 2021 годзе канчаткова завяршылі стварэньне Рэспубліканскай сыстэмы маніторынгу грамадзкай бясьпекі, якая аб’яднала дзясяткі тысяч камэраў па ўсёй краіне. Сыстэма мае функцыю відэаналітыкі.
Сёлета ў пачатку году ўлады паказалі, як выглядае і працуе Цэнтар маніторынгу грамадзкай бясьпекі ў Менску.
У сакавіку 2025 году ўлады паведамілі, што па ўсёй тэрыторыі Беларусі паставілі 60 тысяч «разумных» камэраў відэаназіраньня, пры дапамозе якіх шукаюць і ўдзельнікаў пратэстаў.
Пазьней стала вядома, што камэры відэаназіраньня пачалі ўсталёўваюць ня толькі на дарогах і жылых дамах. Цяпер іх разьмяшчаюць нават на пляцоўках, дзе стаяць кантэйнэры для сьмецьця. У Горадні гэта патлумачылі вялікай колькасьцю парушальнікаў сартаваньня вялікагабарытных адкідаў.
У Менску да канца 2026 году паабяцалі ўсталяваць каля 20 000 відэакамэр, каб кантраляваць «стан жыльлёвага фонду і догляду двароў».
У сакавіку 2025 году ўлады паведамілі, што па ўсёй тэрыторыі Беларусі паставілі 60 тысяч «разумных» камэраў відэаназіраньня, пры дапамозе якіх шукаюць і ўдзельнікаў пратэстаў.
Форум