«Колькасьць інтэрнэт-крамаў за 5 гадоў павялічылася амаль у 1,5 раза і дасягнула 4358 адзінак на 1 студзеня 2026 году.
Адначасова расьце колькасьць прадаўцоў на электронных гандлёвых пляцоўках.
Толькі на гандлёвых пляцоўках Wildberries і Ozon зарэгістравана больш чым па 20 тысяч беларускіх прадаўцоў, — паведаміў Інстытут эканомікі.
«У Беларусі ў 2025 годзе продажы праз інтэрнэт склалі 14,1% раздробнага тавараабароту арганізацыяў гандлю. У параўнаньні з 2019 годам паказьнік вырас у 3,4 раза», — паведаміў Інстытут эканомікі.
Беларусы на гэтых пляцоўках прадаюць тэкстыль, тавары для дому, дзіцячае харчаваньне, адзеньне, ручныя вырабы і шмат іншага.
Чаму гэта важна
Праца праз расейскія маркетплэйсы нясе ў сабе рызыку страціць тавар у выніку ўкраінскіх атак на інфраструктурныя аб’екты Расеі. Калі тавар згарыць, пляцоўкі не абавязаныя выплочваць кампэнсацыі пацярпеламу бізнэсу.
Прэзыдэнт Украіны Ўладзімір Зяленскі заявіў, што Wildberries выкарыстоўваецца для паставак тавараў расейскім вайскоўцам, у тым ліку кампанэнтаў, якія могуць прымяняцца ў ваенных мэтах. Украіна нанесла шэраг удараў па лягістычных цэнтрах кампаніі ў Расеі (Электрасталь у Маскоўскай вобласці, Катоўск у Тамбоўскай, а таксама аб’екты ў Краснадарскім і Стаўрапольскім краях). Wildberries і Крэмль абвінавачаньні адкідаюць.
- Расейскія гандлёвыя пляцоўкі Wildberries і Ozon займаюць амаль палову рынку электроннага гандлю Беларусі. На WB прыпадае траціна ўсіх продажаў беларускіх тавараў праз маркетплэйсы. Продажы беларускіх прадаўцоў праз Wildberries летась былі на суму 3,9 мільярда рублёў.
