Учора раніцай мяне проста калаціла, я не магла знайсьці сабе месца, а па абедзе даведалася пра дрэнную навіну. Зь Евай Вежнавец для мяне зьвязаны важны этап майго жыцьця, праца ў маленькай, але магутнай жаночай камандзе.
Цяпер гэта факт гісторыі, як мы працавалі. У 2019 годзе, калі я перапісвалася зь Евай пра будучы бэстсэлер, у выдавецтва «Пфляўмбаўм», задуманага Сьвятланай Алексіевіч для падтрымкі пісьменьніц, была юрыдычная асоба ў Менску, але не было рэгістрацыі выдаўца, у якой нам адмаўляла міністэрства інфармацыі Беларусі, таму мы не маглі прысвойваць свой ISBN кнізе. І таму на тытульных старонках нашых кніг, выдадзеных у Беларусі, стаяць назвы іншых выдавецтваў, хоць мы рабілі ўсё кола выдавецкіх працаў, як звычайнае выдавецтва.
Я ўжо была даўняя прыхільніца пісьменьніцы Евы-Сьвятланы, калі прапанавала ёй выдаць кнігу ў «Пфляўмбаўм». Учора я нават не змагла дагартаць да пачатку нашай перапіскі зь ёю ў фэйсбуку, так даўно пра рознае мы перапісваліся. Напрыклад, мы абмяркоўвалі ранейшы яе раман, які існаваў у рукапісе, у якім яна расчаравалася і той ня выйшаў (у іншым выдавецтве плянаваўся). У 2015-м перапісваліся пра тое, каб яна правяла майстар-клас ў Школе маладога пісьменьніка пра незалежным Саюзе пісьменьнікаў, дзе разам зь Юляй Цімафеевай мы былі куратаркамі. Яна ўрэшце правяла. Мне шкада, што я ня здолела матываваць яе сабраць і выдаць у «Пфляўмбаўм» зборнік апавяданьняў. У яе былі гатовыя тэксты. Апавяданьне «Іра ў залатых басаножках» пра сэксуальны гвалт зусім недарэчна выйшла з зборніку беларускай «эратычнай прозы», дзе яму было ня месца.
Гэта вось самы пачатак: як я напісала Еве-Сьвятлане наконт выданьня яе кнігі. Калі хочаце, гістарычны дакумэнт. Некаторыя сучасныя дакумэнты нашых часоў вось так будуць выглядаць, са смайлікамі — круглымі дужкамі. Я да позьняе ночы выкалупвала гэтую перапіску з фэйсбуку. Выбрала тое, што кнігі тычыцца, як я дамаўлялася атрымаць у Евы Вежнавец рукапіс.
6/13/19, 1:00 PM
Алена: Сьвятлана, добры дзень, скажыце, ці можна было б вам пазваніць у фэйсбук пагутарыць пра адну справу?
Святлана: Tut suviazi amal niama.
А: калі будзеце на сувязі і будзе зручны час, зможаце мне напісаць?
С: Tak. Zautra muszu być u Miensku. Zautra narmalna?
...
7/6/19, 11:21 PM
С: Гэтыя тры тыдні я працавала, як шалёная, абяцала да 7 ліпеня. Ёсьць вялікая верагоднасьць, што і пасьпею )))) Не судзіце строга, я абмежаваная сваімі магчымасьцямі.
А: Жджу 🙂
С: ))))) стараюся. Яшчэ дзьве гадзінкі папрацую, пасплю, схаджу на каратэ і перачытаю
дабранач)
А: Дабранач )
7/8/19, 1:14 AM
С: яшчэ дзень, прашу, ня скончыла.
7/8/19, 10:49 AM
А: Добра
С: Dziakuj 💚
7/9/19, 3:46 PM
С: Дайце, калі ласачка, мэйл-адрас.
...
7/10/19, 6:27 PM
А: Сьвятлана, ну як яно?
7/10/19, 7:11 PM
Трэба яшчэ час?
7/10/19, 7:52 PM
С: так, трэба. я працую. вінавата.
з пару дзён. здам да вечара суботы як ёсьць. І застрэлюся.
Таааккі фальшывы, катурнавы тон, такі сюжэт убогі. як я магла???? асуджаць іншых за нясталасьць кніг, я сама зэро.
адпраўлю як ёсьць, але зраблю яшчэ адную апошнюю рэдактуру. Мне нядобра ад самой назвы))) а і не пісаць не магу)
А: Ыыы) давайце да панядзелка
Спачуваю, абдымаю. Гэта зразумелае разгляданьне сваёй працы пад лупай. Так, хай будзе як ёсьць
Калі што, потым яшчэ будзе магчымасць паправіць
С: я так рада, што вы прасьцілі.
я хачу годнага, стрыманага тону і цікавага роздуму.
да панядзелка. акурат хопіць часу, У мяне па 10 г працы штодня над ім. усё, я за працу, каб ня быць клятвапрыступніцай чарговы раз)
7/10/19, 8:20 PM
А: Крутата)
С: ))))))))))) небывалае пачуцьцё блізкага суда і вызваленьня!
7/15/19, 3:05 PM
С: адправіла ліст.
7/15/19, 3:24 PM
А: Прыйшоў. Але ці можна б усе 17 (разьдзелаў. — заўв. Алены Казловай), каб пагрузіцца? Потым яшчэ будзе час на дапрацоўку, калі што. Яно ж кардынальна ня зьменіцца
С: я іх вычытваю зараз.
вышлю тады кавалкам. правільна.
гляньце, калі ласка, ці яно ўвогуле надаецца. Я ... раблю тэкст літаратурным, а не хваравітым, стараюся, каб скрыўленьні сьвядомасьці, якія я мела да тэрапіі, не псавалі асновы.
баюся, каб не атрымалася Недотыкомка Фёдара Салагуба.
А: Дробнымі агрэхамі нас не напалохаць. Я канечне гляну, але ўсё ж цалкам трэба глядзець. Усё будзе добра. Я заўтра пачну чытаць, як вярнуся ў Менск з Магілёва. Другой недатыкамкі ўжо ня будзе, мы ж усе розныя
С: дзякуй, Алена. Пастараюся хуценька-хуценька.
А: Тым больш тэкст пакуль застанецца паміж намі, нікому не пакажам на шырокую публіку, пакуль не адчуецца гатоўнасьць
С: добра, тады я дачытваю.
А: Ага
С: адразу 17 скіну, а вам — добрага побыту.
А: Дзякуй! Добра!
9/19/19, 1:08 PM
С: Алена, добры дзень.
Даслала.
Прабачце.
Я старалася вельмі моцна, на мяжы здольнасьцяў.
Нават на прэмію „Вольнае слова“ не паехала.
Што выйшла — вам судзіць.
Я не спэцыяльна так зацягнула — трапіла ў пастку дэманаў — пэрфэкцыяналізму і слабасьці майго пісьменьніцкага варштату.
Дзеля гэтага тэксту прачытала мноства архіўнага матэрыялу.
Калі ласка, даруйце. што падвяла вас з часам.
А: Добры дзень, я атрымала дзякуй! Нічога страшнага ня здарылася) Мы яшчэ праходзім эстафэту з рэгістрацыямі і зборам патрэбных паперак для працы. Думаю, усё будзе крута)
С: Вы не сярдуеце) ура. Няхай усё будзе крута, трымаю за рэгістрацыю пальцы крыжыкам.
А: Канечне, не) Спадзяюся, вы там ня вельмі строга да сябе падышлі ў рэдагаваньні. Я пачытаю днямі. СА (Сьвятлане Алексіевіч. — заўв. Алены Казловай) ужо таксама адправіла.
С: сямнаццаць разоў перапісвала, скараціла моцна.
такія справы) цалкам адзічэла)))) буду зноў да людзей прывыкаць.
А: можа, і дарма. мне б, канечне, цікава было зірнуць на пачатковы тэкст, раптам нешта захочам вярнуць? Я там ужо ў пачатку паглядзела „горла ў горла“, такі вобраз быў у першым урыўку, мне запомніўся, харошы. Няма ж яго, здаецца?
С: прыбрала.
лішнім здалося. вярнуць магу.
А: так, ён быў вельмі харош
С: вы заўвагі, калі ласка, пішыце чырвоным, а я ўсё зраблю)
9/27/19, 3:54 PM
А: Добры дзень! СА ў глыбокіх разьездах, так што яшчэ ня хутка зь ёй сустрэнуся, але маё ўражаньне — кніга вельмі моцная і добрая ва ўсіх адносінах. Я ўпэўненая, што ў СА ня будзе ніякіх пярэчаньняў.
Адно што хвалююся, ці не зарэдагавалі вы сябе празьмерна, мо што харошае адвалілася, такое як „горла ў горла“.
Мару, каб кніга вашая выйшла сёлета, але на тое трэба вельмі вялікае спрыяньне лёсу, каб усе рэгістрацыі сабраліся і дзяржава падножак не наставіла. Так што рэалістычней разглядаць наступны год. Такая вось сытуацыя.
У фб прапаную лепш пакуль не пісаць пра гэта ўсё, але разам затаіць дыханьне!
С: Алена, вялікі дзякуй за водгук, я пагляджу, ці ёсьць у мяне незмардаваны варыянт, бо я рэдагавала 17 разоў
Я не пісала нічога ў фб, толькі што ёсьць кніга, а хто, што, не зьбіралася. Бо праект нараджаецца, праект ня мой, праект важны, тут важна не сурочыць.
Тым больш што жанчыны ніколі ня выйграюць першае месца ў Гедройці😃
А: Я очэнна спадзяюся, што хутка выйграюць, хе-хе
С: Не дадуць нам😃
Я чытаю і расстрайваюся. Паеду выграбу першапачатковы тэкст мо з процьмы плястычных апэрацый😃
Дзякуй за вашую працу, увагу, ангажаваньне.
я ў трамваі еду шчасьлівая вашым водгукам.
10/8/19, 2:12 PM
А: Сьвятлана, добры дзень! Я вось думаю над назвай. Ці не задужа яна простая, як для гэтага тэксту? Быццам канстатацыя факту. Можа, яшчэ якія варыянты былі? Я пашукала па загалоўках і знайшла вось гэта: „ПА ШТО ІДЗЕШ, ВОЎЧА?“ Можаце падумаць над гэтым?
С: сама думаю так жа.
вы ведаеце, што я над назвай ужо гадоў 10 думаю? )
А давайце )
вось так, кінуўшы косткі на стол, і назавем — па што ідзеш, воўча.
тым больш гэта цалкам у маім любімым стылі.
А: Як на мяне, гучыць як добрая назва ) Давайце )
Дарэчы, забыла сказаць, што „пасхалка“ з Іванам Дамінікавічам — агонь! ))
С: і чыста ж праўда ўсё, ад тапонімаў да фактаў )
))))
А: клас))
С: я не прыдумала ні слова, ні пэрсанажа, толькі сабрала і сфакусавала, вуаля. дакумэнталка)))
А: ага, круцяк)
С: Дзякуй за назву, я б яшчэ 10 год думала.
А: Ну самі ж прыдумалі) Гэта аўтарскае. Я і сунуцца баюся
С: вы вельмі моцна дапамаглі. Я булькаю як біямаса, і бяз імпульсу — зэра.
не каналізуецца нічога, а між тым і жыць зь вечна негатовым тэкстам немагчыма.
Я думаю, вы і самі ведаеце, што тэкст робіць з чалавекам.
10/15/19, 1:39 PM
А: Сьвятлана, а да чарнавіка доступ маецца?..
С: там лішняга процьма. я потым усё зьмяніла.
я думаю, яго варта выкінуць у сьметніцу, там шмат прэтэнцыёзнага і знарочыстага.
А: не-не, гэта вы ўжо чапляецеся да сябе
там былі лепш раскрытыя моманты, з ключом, напрыклад
так што можна ўзяць
С: я памятаю, наваяла ў такім стылі ўсе 17 разьдзелаў, чытаць не магла, такія пустыя.
найранейшы варыянт, які ўдасца знайсьці.
вышлю.
А: ну добра
С: я на працы цяпер, а дома кампутарчык чакае, поўны гэтых варыянтаў.
А: але лепш сёньня
С: пастараюся.
10/16/19, 7:09 AM
С: знайшла, чытаю. вышлю а 17-й.
10/16/19, 7:29 AM
А: Мо ня трэба чытаць? так вы зноў павыкідаеце строга. Дык і сэнсу ня будзе (
А: Я ўжо думаю, мо і ня трэба той чарнавік. Я б шырэй развагі пра ключ вярнула. Ну і тое горла.
10/16/19, 9:34 AM
С: мо й ня трэба, ён мяне раздражняе
Я ўчора цэлы вечар яго круціла. У ім ёсьць нешта нездаровае.
10/16/19, 9:53 AM
Алена, прабачце, што я карміла вас заўтрыкамі і зацягвала тэрміны. Проста я схільная, як мне здаецца, да таннай экзальтацыі, а гэтага ў творчасьці я ня зношу. Гэта сапсавала позьнія вершы Сыса і шмат яшчэ што.
10/16/19, 11:01 AM
А: Абедзьве версіі тэкстаў, што я бачыла, былі харашы )
10/16/19, 11:41 AM
Пераглядзела яшчэ раз першую вэрсію першага разьдзела. Усё-ткі там багата харошых жывінак і падрабязнасьцяў. Калі знойдзеце ў сабе сілы адправіць поўны чарнавік, не праглядаючы, то будзе ня лішне. Але глядзіце па самаадчуваньні. Калі ўсё мучыцельна, то ўжо ня будзем вас мучыць. Будзем працаваць з тым, што займелі :))
10/16/19, 2:37 PM
С: Які вы мілы чалавек у дачыненьнях. Дзякуй.
Сяджу на працы і чытаю сваё тварэніе)
😆
:))))
10/17/19, 10:06 AM
А: вы правялі выдатную і глыбокую працу з рэдагаваньнем. То я ўмалкаю!)))
С: Уфффффф
😅
Ну мне было карысна. Я так і думала, што правяла глыбокую працу.
Але самому ж ніколі ня ясна, столькі сьляпых плямаў!
Калі вы мне тады пазванілі ўлетку, я ведала, гэта тое, што трэба.
А: Ну то расслабімся крыху)
С: Пара))))))
А: ага)
С: А потым зноў за працу. Але з балянсам адпачынку.
А: так-так, іменна! )
Сьвятлана, выбачаюся, важнае пытаньне. Правім на наркамаўку? Ці тарашкевіца вельмі дарага? Тады мне трэба будзе параіцца зь людзямі, наколькі гэта магчыма
С: Давайце наркамаўку.
Я дасьпела, як Дубавец.
А: Дзяк! То будзе усё прасьцей
С: На фб пакіну тарашкевіцу. Але толькі наркамаўка наш шанец на адзінства традыцыі.
А: мусіць так
С: Баюся, што так. Пры перакладах зразумела.
11/6/19, 5:20 PM
А: Вітаю, Сьвятлана,
Ці не маглі б вы даслаць кароткую біяграфію для вокладкі? сярод фота, якія мы з вамі зрабілі, многа проста прыгожых, вы вельмі прыгожая і фатагенічная. Але найбольш мне падабаецца гэтае, з позіркам. Ці ўхвалілі б вы яго?
Мне б хацелася выкарыстоўваць гэтае фота для прома кнігі.
11/6/19, 5:42 PM
С: Фота сапраўды файнае)
натуральна, я даю дазвол.
А: дзякуй, то дзела за біяграфіяй)
С: Дзякуй вялікі!
Якая павінна быць тая біяграфія паводле аб’ёму? 5-6 сказаў?
А: ну на абзац які, самае галоўнае
прэзэнтабэльна, каб аўтарку прадставіць
С: о, настолькі набярэцца)
зараз сачыню.
А: тады выбраць толькі літаратурнае))
С: так
А: літаратурны кар’ер
С: ага
11/6/19, 6:09 PM
С: напісала па памяці, на працы гатовая ляжыць, але там я буду пасьлязаўтра.
не ўстаўляецца сюды.
скіну на пошту
А: гэта прам не пільна гарыць, цягам некалькіх дзён
12/2/19, 9:02 AM
А: Сьвятлана, добрай раніцы. Я ўспомніла, нам жа яшчэ анатацыя трэба! Ці не складзяце за пару дзён?
невялікі, але ёмісты абзац
12/2/19, 9:22 AM
каб было лягчэй: гэта мусіць быць адказ на пытаньне „пра што кніга?“. Потым паўсюль жа гэтая анатацыя цытавацца будзе, так што гэта важна
12/2/19, 10:12 AM
С: ужо думаю)
12/4/19, 6:52 PM
Наконт анатацыі выкручваю мазгі насуха. Ня маю панятку, пра што гэта кніга, але напішу дзьве на выбар)
А: Добра)
С: напісала анатацыю, дасылаю)
А: Харашо. Спачатку мне
🙂
С: дасылаю)
1/17/20, 10:33 PM
Назва ідэальная. Мне зайздросна, што ня я такое прыдумала. Цэлы айзбэрг сэнсаў і прыгажосьцяў. Я жарсна хачу, каб выйшла. Гэта прыгожа, як агонь!
Форум