Як паведаміла мясцовае выданьне «Шахцёр», праз аварыю ўва ўсім амаль 100-тысячным горадзе няма вады.
«Вады няма ўвогуле, або толькі гарачая ці іржавая», — адзначылі ў Telegram-канале выданьня.
Пазьней у водаканале паведамілі, што «праз рэзкі разбор вады зьявілася патрэба падключэньня дадатковых помпаў».
На асобныя адрасы арганізавалі падвоз вады.
Што папярэднічала і чаму гэта важна
Апошнім часам у Беларусі ўсё часьцей здараюцца праблемы з забесьпячэньнем вадою, хоць тарыфы на камунальныя паслугі растуць.
З пачатку году адбылося некалькі вялікіх аварыяў ці надзвычайных сытуацыяў:
- у студзені Клецак двойчы за два дні быў без вады: прарвала трубы, пракладзеныя ў 1974 годзе;
- у Гомлі таксама ў студзені праз аварыю 90 прыватных дамоў былі без вады;
- у красавіку ў Рагачове некалькі дзён з кранаў цякла вада з пахам хімічных рэчываў;
- у Менску пэрыядычна ўзьнікаюць праблемы зь якасьцю вады.
У той жа час вядома, што больш за 500 000 жыхароў Беларусі ўвогуле ня маюць доступу да цэнтралізаванага забесьпячэньня вадой.
Паводле ўладаў, за апошнія пяць гадоў у Беларусі адкрылі каля 100 сьвідравінаў, пабудавалі больш за 1000 станцыяў абезжалезваньня вады і праклалі 250 км новых водаправодных сетак. Агулам для паляпшэньня якасьці вады ў краіне ажыцьцявілі больш за 1000 розных праектаў.
Форум