Як паведаміла Радыё Свабодная Эўропа / Радыё Свабода з спасылкай на цэнтральнае камандаваньне ЗША, амэрыканскія сілы нанесьлі дадатковыя «ўдары ў мэтах самаабароны па некалькіх мэтах у Іране на загад галоўнага вайскавода». «Гэтыя ўдары ёсьць адказам на працяглую несправакаваную агрэсію Ірану», — дадалі амэрыканскія вайскоўцы.
Некалькі іранскіх інфармацыйных агенцтваў паведамілі пра гучныя выбухі ў гарадах па ўсёй краіне. Перад аднаўленьнем удараў ЗША прэзыдэнт Ірану Масуд Пэзэшкіян заявіў, што яго краіна будзе супраціўляцца якому-хаця ціску, і назваў пагрозы Трампа прыкметай адчаю Вашынгтона.
Афіцыйныя асобы ў вайсковых ведамствах ЗША паведамілі, што ўдары па Іране цяпер «завершаныя».
Днём раней амэрыканскія вайскоўцы нанесьлі авіяўдары па некалькіх абʼектах у Іране ў адказ на зьбіцьцё верталёта Apache ў Армускай пратоцы. Пасьля гэтага Іран нанёс удары па амэрыканскіх базах у рэгіёне, прычым аб стратах сярод амэрыканскага пэрсаналу не паведамлялі.
10 чэрвеня Рада кіраўнікоў МАГАТЭ — наглядны орган ААН, у які ўваходзяць 35 краін, ухваліла падтрыманую ЗША рэзалюцыю з патрабаваньнем, каб Іран пацьвердзіў свае запасы ўзбагачанага ўрану і дазволіў інспэктарам наведаць краіну. Пасол Ірану ў Аўстрыі Рэза Наджафі заявіў агенцтву AFP, што рэзалюцыя была «контрапрадуктыўнай» і перашкаджала перамовам з Вашынгтонам.
На паседжаньні Рады бясьпекі ААН на тэму Блізкага Ўсходу генэральны сакратар Антонію Гутэрыш выказаў думку, што недасканалае спыненьне агню лепш, чым вяртаньне да поўнамаштабнай вайны. Тэгеран і Вашынгтон з 8 красавіка вядуць перамовы аб спыненьні агню.
Вайсковая апэрацыя ЗША і Ізраілю супраць Ірану
28 лютага Дональд Трамп аб’явіў аб пачатку супольнай з Ізраілем маштабнай ваеннай апэрацыі супраць рэжыму ў Іране. Патрэбу ў апэрацыі зьвязалі з правалам перамоваў аб іранскай ядзернай праграме.
Аятала Алі Хамэнэі й іншыя прадстаўнікі найвышэйшага іранскага кіраўніцтва былі забітыя. Прэзыдэнт Ірану Масуд Пэзэшкіян назваў забойства Хамэнэі страшным злачынствам і паабяцаў адпомсьціць. Іран пачаў апэрацыю ў адказ і нанёс удары па амэрыканскіх аб’ектах на Блізкім Усходзе.
Масква наўпрост асудзіла агрэсію Ізраілю і ЗША супраць Ірану. Улады Беларусі адрэагавалі стрымана. Лукашэнка ў першыя два дні пасьля гібелі Хамэнэі не сказаў ані слова, а МЗС Беларусі 28 лютага двойчы выступіў з заявамі. У адной прагучала заклапочанасьць абвастрэньнем канфлікту вакол Ірану. У другой заяве атака на Іран асуджаецца, але Ізраіль і ЗША не названыя, акцэнт робіцца на гуманітарным аспэкце.
Беларуская дзяржаўная авіякампанія «Белавія» празь небясьпеку ўзаемных абстрэлаў на Блізкім Усходзе скасавала шэраг рэйсаў і 2 сакавіка накіравала эвакуацыйны самалёт зь Менску ў Доху, каб забраць беларускіх турыстаў, што апынуліся ў Катары, які таксама абстрэльваў Іран.
Паводле іранскага таварыства Чырвонага Паўмесяца, у Іране загінулі больш за 200 чалавек, параненыя больш за 700. Паводле іранскага інфармацыйнага агенцтва IRNA, 118 чалавек сярод загінулых — школьнікі.
Афіцыйныя асобы Аб’яднаных Арабскіх Эміратаў заявілі пра трох загінулых і 58 параненых у краіне з пачатку іранскіх атак на рэгіён Пэрсыдзкай затокі, якія сталі адказам на ваенныя апэрацыі ЗША і Ізраілю.
У выніку іранскага ракетнага ўдару па горадзе Бэйт-Шэмэш у Ізраілі, што за 40 км ад Ерусаліму, як мінімум 9 чалавек загінулі і 28 атрымалі раненьні. З пачатку новага абвастрэньня па тэрыторыі Ізраілю рэгулярна б’юць ракетамі.
2 сакавіка да баявых дзеяньняў у рэгіёне далучылася праіранская ісламісцкая групоўка «Хэзбала», якая пачала з тэрыторыі Лібану абстрэльваць Ізраіль.
У наступныя дні іранскія войскі працягвалі наносіць удары па Саудаўскай Арабіі, Бахрэйне, ААЭ, Кувэйце за іх супрацу з амэрыканцамі па разьмешчаных там амэрыканскіх актывах, а таксама па гатэлях і іншых аб’ектах. ЗША і Ізраіль працягнулі ўдары па вайсковых аб’ектах Ірану.
8 сакавіка іранская Асамблея экспэртаў абрала Муджтабу Хамэнэі новым кіраўніком краіны. Гэта 56-гадовы сын забітага паветранай атакай Алі Хамэнэі. Жонка Муджтабы Хамэнэі, Захра Хадад Адэль, таксама загінула падчас таго ж амэрыканска-ізраільскага ўдару, у якім быў забіты яе цесьць — найвышэйшы кіраўнік (рахбар) Ірану.
Форум