Дзяржаўны сакратар Злучаных Штатаў Марка Рубіё заявіў, што ніякіх санкцый супраць Ірану ня будуць здымаць у абмен на згоду Тэгерану адкрыць Армускую пратоку.
Выступаючы на слуханьнях у камітэце Сэната 2 чэрвеня, Рубіё сказаў: «Гэта не абмяркоўвалася. Гэта не прапаноўвалася».
Яго камэнтары наўпрост супярэчаць паведамленьням іранскіх дзяржаўных СМІ аб праекце пагадненьня, які распрацоўваецца паміж Тэгеранам і Вашынгтонам праз пакістанскіх пасярэднікаў. У гэтых паведамленьнях гаварылася, што дамова ўключае зьняцьце санкцый і вяртаньне іранскіх сродкаў, замарожаных за мяжой, перадае Радыё Свабодная Эўропа/Радыё Свабода.
Рубіё сказаў сэнатарам, што першым этапам любой угоды будзе адкрыцьцё Іранам Армускай пратокі, а затым будзе другі этап, які будзе тычыцца ядзернай праграмы Ірану, і ён працягнецца 30-90 дзён.
Ён дадаў, што перамовы ўскладняюцца затрымкамі, выкліканымі структурай улады ўнутры Ірану. Паводле яго слоў, іранскія перамоўцы былі вымушаныя весьці перамовы з уласнай кіроўчай радай у Тэгеране, што прыводзіла да затрымак на некалькі дзён штораз, калі перадаваліся новыя паведамленьні.
Рубіё таксама спыталі, ці можа ён выкарыстаць свой уплыў у адміністрацыі Трампа, каб пераканаць яе даць заканадаўцам юрыдычнае абгрунтаваньне для ваенных удараў ЗША па Іране, якія краіна нанесла разам з Ізраілем 28 лютага. Той паабяцаў спытаць у Офісу юрыдычнага консулу, але запэўніў, што «безумоўна», юрыдычнае абгрунтаваньне для ўдару было.
Чарговае абвастрэньне амэрыканска-іранскага канфлікту
Іран і ЗША ў апошнія дні абмяняліся вайсковымі ўдарамі, прычым амэрыканскія вайскоўцы абвясьцілі аб нападах у «самаабароне» на іранскія аб’екты, а Іран заявіў, што нанёс удар па амэрыканскай базе ў Кувэйце.
Спробы дасягнуць пагадненьня адбываюцца на фоне таго, як закрыцьцё Армускай пратокі значна парушыла сусьветныя пастаўкі нафты і прывяло да росту цэн на энэрганосьбіты.
Новае пагадненьне, калі яно будзе пацьверджанае, можа стаць найбуйнейшым крокам да міру з таго часу, як амэрыканска-ізраільскія авіяўдары па Іране 28 лютага прывялі да шырокамаштабнага канфлікту на Блізкім Усходзе.
Ужо пры першых ударах амэрыканцаў з ізраільцянамі загінуў вярхоўны кіраўнік іранскага рэжыму, аятала Алі Хамэнэі. З таго часу ягоныя паплечнікі не пасьпелі яго пахаваць, але 2 чэрвеня заявілі пра тое, што плянуюць трохдзённыя хаўтуры. Пры гэтым дакладнай даты разьвітаньня і пахаваньня Алі Хамэнэі іранскія ўлады пакуль не сказалі.
Крызіс вакол Армускай пратокі справакаваў скачкі цэнаў на паліва на міжнародных рынках.
Форум