Міністар абароны Ўкраіны расказаў, як абаронцам дзяржавы ўдалося значна запаволіць прасоўваньне расейскіх войскаў і паступова перахапіць ініцыятыву на фронце. У першую чаргу, гэта самаахвярная праца ўкраінскіх вайскоўцаў. Іншым чыньнікам стала адключэньне Starlink для расейцаў і павелічэньне колькасьці ўдараў бесьпілётнікаў сярэдняй далёкасьці (middle strike).
Пра гэта міністар абароны Ўкраіны Міхаіл Фёдараў расказаў на сустрэчы з журналістамі, піша Ўкраінская служба Радыё Свабода.
Starlink расейцам адключылі ў лютым 2026 году, і тыя так і ня здолелі знайсьці паўнавартаснай замены, каб забясьпечыць бесьперабойную працу сеціва. Паводле Фёдарава, гэта дае ўкраінцам «крытычную перавагу на полі бою».
«Яшчэ адным важным чыньнікам стала разьвіцьцё кірунку сярэдняга ўдару. Мы пачалі актыўна закупляць бесьпілётнікі сярэдняга ўдару, і сёньня гэта адна з галоўных тэхналягічных пераваг на фронце. Мы сьвядома зрабілі стаўку на гэты кірунак, мы бачым вынік. Ужо прыкметная заканамернасьць: чым больш праціўніка зьнішчана на апэратыўнай глыбіні, тым менш штурмавых дзеяньняў адбываецца на фронце», — сказаў Фёдараў.
Ён назваў стратэгічнай задачай непасрэдна на полі бою «нанесьці ворагу ня менш за 200 ахвяр на кожны квадратны кілямэтар прасоўваньня».
Далей украінскі міністар абароны падрабязьней агучыў лічбы расейскіх стратаў на фронце, якіх тыя зазнаюць апошнім часам.
«Сёньня мы наносім ворагу катастрафічныя страты. У красавіку загінула або атрымала цяжкія раненьні 35 203 расейскіх жаўнераў — гэта тыя, хто ніколі ня вернецца на фронт. У сакавіку — 35 351, у сьнежні — 34 544. Усе гэтыя лічбы правераныя праз сыстэму „eBal“ і пацьверджаныя баявымі падразьдзеламі. Сёньня кожны кілямэтар прасоўваньня каштуе ворагу непрапарцыйна вялікіх стратаў. Калі ў кастрычніку Расея губляла 67 жаўнераў на квадратны кілямэтар прасоўваньня, дык у студзені — ужо 165, у лютым — 244, у сакавіку — 254, у красавіку — 179».
Інстытут вывучэньня вайны: Украіна вяртае перавагу
Амэрыканскі Інстытут вывучэньня вайны (ISW) апублікаваў чарговую справаздачу з фронту, у якой сьцьвярджае, што Ўкраіна пераймае ініцыятыву на шэрагу ўчасткаў фронту.
«Украінскія войскі ў апошнія месяцы правялі сэрыю контратак на розных участках фронту, дасягнуўшы найбольшых посьпехаў на полі бою з часу апэрацыі Ўкраіны ў Курскай вобласьці ў жніўні 2024 году. Украінскія контратакі адбілі значную частку Купянску, пачынаючы зь лістападу 2025 году, вызвалілі больш за 400 квадратных кілямэтраў на поўдні Ўкраіны зімой і вясной 2026 году, а зусім нядаўна, з канца красавіка 2026 году, вызвалілі некалькі населеных пунктаў на захадзе Запароскай вобласьці», — гаворыцца ў справаздачы.
На поўдні Ўкраіны, як пішуць у дакумэнце, у выніку ўкраінскіх дзеяньняў «Расея павінна выбіраць паміж абаронай ад украінскіх контратак і разьмеркаваньнем чалавечых рэсурсаў і сілаў на прыярытэтных дзялянках».
Што гэта значыць для хады вайны?
Узмоцненая ўкраінская кампанія ўдараў сярэдняй далёкасьці па расейскай лягістыцы, вайсковай тэхніцы і жывой сіле з пачатку 2026 году пагоршыла здольнасьць расейскіх войскаў праводзіць наступальныя апэрацыі па ўсім фронце і, верагодна, таксама спрыяла нядаўняму прасоўваньню Ўкраіны.
Якраз пра сярэднюю далёкасьць гэтым разам згадаў і Міхаіл Фёдараў.
Кіраўнік Узброеных сілаў Украіны Аляксандар Сырскі расказаў калегам з краінаў NATO пра посьпехі выкарыстаньня «тактыкі актыўнай абароны», якая, паводле слоў вайскавода, «дазваляе зьнясіліць праціўніка, аднавіць пазыцыі і нанесьці яму максымальныя страты».
Паводле яго слоў, «з пачатку 2026 году агульныя страты праціўніка ўжо перавысілі 141500 чалавек, зь якіх больш за 83000 — незваротныя».
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум