Паламаны бэз, фота ў рапсе і незарэгістраваныя кацяняты. Топ штрафаў у Беларусі гэтага лета

За ўсё ў жыцьці даводзіцца плаціць. А калі вы жывяце ў Беларусі — асабліва. Даходы ад штрафаў у дзяржаўным бюджэце растуць штогод. Сілавыя структуры атрымліваюць пляны іх спагнаньня, а беларусаў палохаюць усё больш жорсткім падыходам да выкананьня Адміністрацыйнага кодэксу. Расказваем пра штрафы, аб існаваньні якіх вы, магчыма, ня ведалі. І якія можаце атрымаць ужо гэтым летам.

Фота ў рапсе — да 1350 рублёў штрафу

І ня толькі ў рапсе, а наагул у якім-хаця засеяным калгасным полі. Жытнёвым, сланечнікавым ці кукурузным. Інстаграм можа сёлета быць вельмі дарагім. Паводле дзяржаўных СМІ, «калі дзеля кадру зайсьці ў глыб пасеваў, таптаць або ламаць сьцёблы, гэта будзе расцэнена як наўмыснае псаваньне чужой маёмасьці». Фатаграфавацца можна толькі побач з квітучым полем або на сьцяжынцы ці дарозе, якая праходзіць празь яго. Ну або заходзіць вельмі асьцярожна і ў выпадку чаго паспрабаваць патлумачыць праваахоўнікам, што ўся выяўленая імі на палях шкода была нанесена да вас.

Выпадкаў, калі б некага сёлета ўжо аштрафавалі за фотачкі ў беларускім рапсе, мы не знайшлі. Але гэта ня значыць, што іх ня будзе.

Букет бэзу — да 1350 рублёў штрафу

Гэта 30 базавых. «Чаму нельга абломваць бэз? Першае, мы трацім дэкаратыўнасьць, бо кветкавыя пупышкі на галінках завязваюцца ў чэрвені–ліпені, — расказвала ў размове зь дзяржаўным СТВ Тацяна Шпітальная з Цэнтральнага батанічнага саду НАН Беларусі. — І калі мы абломваем пупышкі, то трацім вялікі працэнт бутонаў, якія павінны ўтварыцца. Другое, абломваючы бэз, мы ствараем спрыяльнае асяродзьдзе для інфэкцыі. Гэта значыць, мы псуем расліну, і пытаньне, як яна будзе сябе адчуваць на наступны год».

Усё гэта датычыць ня толькі бэзу, але і іншых расьлінаў і кветак, якія растуць у гарадзкіх парках і на клумбах. Выключэньне — расьліны з прыватных участкаў. Пра забарону ламаць іх там паведамленьняў у дзяржаўных мэдыя не было. Але магчыма, што варта ўсё ж спытаць дазволу ва ўласьніка, калі ўчастак з бэзам ня ваш.

Трава на лецішчы — штраф да 1125 рублёў

У адрозьненьне ад папярэдніх, гэта адносна новае пакараньне. Яго ўвялі год таму, выклікаўшы хвалю абмеркаваньняў. Беларуская дзяржава патрабуе ад сваіх грамадзян трымаць траву на ўласных падворках не вышэйшай за 20 сантымэтраў. І ня толькі на падворках, але і на прылеглых да іх тэрыторыях. Усё павінна быць роўна абкошана. Навуковых або нейкіх іншых тлумачэньняў неабходнасьці гэтага чыноўнікі не публікавалі. Застаецца толькі выконваць і радавацца.

Дзеля справядлівасьці варта адзначыць, што штрафы за высокую траву на ўчастку практыкуюць і ў суседняй Літве — да 120 эўра (400 рублёў). Праўда, там уласьніка зарослага ўчастку спачатку просяць яго абкасіць і штрафуюць, толькі калі ён упарта ігнаруе просьбы. Траву ў Літве можна трымаць на ўзроўні 25 сантымэтраў.

Незарэгістарванае кацянятка — штраф да 675 рублёў (ці нават да 1350)

Навіна аб гэтым нарабіла шуму сёлета ў красавіку. Пасьля аказалася, што штраф за адсутнасьць рэгістрацыі хатняга гадаванца зусім не навіна — катоў у Беларусі трэба рэгістраваць даўно. Але пакуль за гэта не штрафавалі. Зараз жа дзяржаўныя СМІ вырашылі правесьці адукацыйную кампанію наконт нелегальных катоў.

Памер штрафу залежыць ад таго, ці нарабіў ваш вусаты і хвастаты гадаванец некаму шкоды, ці не нарабіў. У першым выпадку заплаціць прыйдзецца больш. Прычым не таму, каму шкода была ўчыненая, а дзяржаве. Беларусы прадказальна сваіх катоў рэгістраваць не сьпяшаюцца, нават нягледзячы на пагрозу фінансавых стратаў. Паводле чыноўнікаў, зараз ім вядома толькі пра 1500 катоў, якія жывуць у Менску. Малаімаверна для двухмільённага гораду. Але майце на ўвазе — калі раптам вашая, нават зарэгістраваная, котка акацілася, то вы маеце толькі тры дні, каб зарэгістраваць усіх яе кацянятаў. Для гэтага трэба пайсьці ў бліжэйшы выканкам і пастукацца ў «адно акно», дзе прыйдзецца паказаць дакументы на кватэру ці дом, у якім жывуць каты. Катоў з сабой можна ня браць.

Адпачынак ля возера — да 450 рублёў штрафу

За сам адпачынак ля вады ў Беларусі пакуль не караюць (толькі будзьце асьцярожныя ў нацыянальных парках і іншых запаведных зонах, там могуць быць свае правілы, таксама варта зьвяртаць увагу на шыльдачкі «Купацца забаронена». — РС), але паводле Воднага кодэксу (існуе і такі) паркаваць аўтамабілі ў Беларусі дазваляецца не бліжэй чым за 30 мэтраў ад берагу. Штраф 10 базавых — зараз гэта 450 рублёў. Менш, чым за паламаны бэз.

Так што паркуйцеся далей і лепш з запасам. Інспэктары могуць літаральна хадзіць з рулеткамі. Асобная гісторыя з алькаголем ля вады. Гэта ня толькі небясьпечна (ня ўздумайце плаваць нападпітку), але і можа быць дорага. Тут усё залежыць ад узроўню «публічнасьці» месца, дзе вы вырашылі выпіць. Побач з гарадзкімі ці нават вясковымі пляжамі дакладна ня варта.

Паход у грыбы ці ягады — штраф да 1125 рублёў

Самі грыбы і ягады ў беларускіх лясах пакуль зьбіраць можна нават у запаведніках і нацыянальных парках (але зноў жа лепш праверце дакладныя правілы для кожнага зь іх асобна), але можна ўхапіць штраф за наведваньне лесу ў забаронены пэрыяд. Зьвесткі аб забароне наведваць лясы звычайна публікуе Міністэрства надзвычайных сытуацыяў на сваім сайце. Тлумачыцца забарона адсутнасьцю дажджоў і небясьпекай лясных пажараў. За непаслушэнства — да 25 базавых (1125 рублёў). Так што ягады і грыбы можа быць значна таньней прынесьці з крамы ці рынку, а ня зь лесу.

Акрамя сайту МНС, раім таксама зазіраць на сайт Міністэрства абароны. Там таксама пэрыядычна зьяўляюцца абвесткі пра абмежаваньні на публічнае наведваньне пэўных тэрыторыяў Рэспублікі Беларусь, але зьвязана гэта ўжо не з пажарамі.

Свабода — да 1350 рублёў штрафу (калі пашанцуе)

І бонусам, пра саме дарагое. Чытаць Свабоду ў Беларусі па-ранейшаму можа быць дорага, гэтым летам у тым ліку. Паводле ўведзенага пасьля 2020 году ў краіне заканадаўства, за выраб, захоўваньне або перавозку інфармацыйнай прадукцыі з «рэспубліканскага спісу экстрэмісцкіх матэрыялаў» прадугледжана адказнасьць паводле артыкулу 19.11 Кодэксу аб адміністрацыйных правапарушэньнях. Штраф да 1350 рублёў. Распаўсюдам лічыцца рэпост у сацсетках, мэсэнджарах (нават у асабістых паведамленьнях), а таксама падпіска на рэсурсы, прызнаныя «экстрэмісцкімі». Таму паведамляем, што чытаць нас паўсюль можна і без падпіскі, а таксама з дапамогай VPN. Свабода мае актыўныя акаўнты ў Threads, Instagram, TikTok, Facebook, X, YouTube, Telegram. Вядома, працуе таксама наш сайт svaboda.org, дасяжны зь Беларусі праз той жа VPN або празь «люстэркі».

Акрамя штрафу, падпіскі на «экстрэмістаў» пагражаюць канфіскацыяй тэлефону і куды больш непрыемнымі за грашовыя страты наступствамі ў выглядзе пазбаўленьня волі. Прадказаць лёгіку сілавікоў немагчыма.

Заставайцеся на Свабодзе. І бяз штрафаў.