Лукашэнка прызначыў новага кіраўніка Беларускага мэталюргічнага заводу. Папярэдні не дамогся скасаваньня санкцыяў

Як паведаміла прэсавая служба Аляксандра Лукашэнкі, прызначэньне адбылося 12 траўня.

Аляксандар Саковіч замяніў на пасадзе Дзьмітрыя Корчыка, які ўзначальваў завод і холдынг з 2019 году.

Саковіч стаў пятым генэральным дырэктарам БМЗ у час незалежнасьці Беларусі. Да Корчыка заводам з 2009 году кіраваў Анатоль Савенка, а яшчэ раней — Мікалай Андрыянаў і Юры Феакцістаў.

ГЛЯДЗІЦЕ ТАКСАМА:

БМЗ пад ціскам заходніх санкцыяў і кітайскіх канкурэнтаў спыніў вытворчасьць асобных відаў прадукцыі

Чаму гэта важна

ААТ «БМЗ — кіроўная кампанія холдынгу „БМК“» знаходзіцца пад жорсткімі санкцыямі Эўразьвязу, ЗША, Украіны, іншых краін.

З прычыны санкцыяў прадпрыемства ня можа супрацоўнічаць з эўрапейскімі кампаніямі й імпартаваць мэталяпрадукцыю.

Кіраўніцтва БМЗ спрабавала скасаваць санкцыі праз суд Эўрапейскага Зьвязу, аднак ён у сакавіку 2025 году адхіліў пазоў беларускага прадпрыемства і пацьвердзіў законнасьць уведзеных абмежаваньняў.

У выніку абмежаваньняў БМЗ страціў сваіх галоўных замежных партнэраў (Beckers Group, Liebherr, Danfoss, Yokohama), што выклікала складанасьці ў вытворчасьці, дэфіцыт кампанэнтаў і абсталяваньня, а таксама скарачэньне выпуску некаторых відаў прадукцыі.

ГЛЯДЗІЦЕ ТАКСАМА:

«Гэта робіцца „на адчапіся“». Як беларускія заводы судзяцца за скасаваньне санкцыяў. БМЗ ужо двойчы прайграў такі суд