Дата дня
28 красавіка 1900 году памёр Францішак Багушэвіч, паэт, празаік, асьветнік, юрыст, удзельнік вызвольнага паўстаньня 1863–1864 гг., адзін з пачынальнікаў нацыянальнага Адраджэньня.
Таксама ў гэты дзень
1512 — аб’яднанае войска ВКЛ і польскай кароны пад камандай Канстанціна Астроскага нанесла паразу войску крымскіх татараў пад Вішняўцом (Цярнопальшчына, Украіна).
1802 — паўстанец і кампазытар Міхал Кляофас Агінскі на стала пераяжджае ў маёнтак Залесьсе каля Смаргоняў. Тут будзе напісаны палянэз «Разьвітаньне з Радзімай», шырока вядомы як Палянэз Агінскага.
1918 — Народны Сакратарыят Беларусі прыняў пастанову пра адкрыцьцё ў Менску ўнівэрсытэту.
1919 — у Вільні пачала выходзіць газэта «Беларуская думка», выйшла 56 нумароў, закрытая польскімі ўладамі.
1945 — італьянскія партызаны-антыфашысты расстралялі Бэніта Мусаліні, заснавальніка італьянскага фашызму.
1954 — БССР уступіла ў Сусьветную арганізацыю працы.
1995 — у Маладэчне пачала выходзіць «Рэгіянальная газэта».
1996 — у Менску пачалася галадоўка кіраўнікоў БНФ Юрыя Хадыкі і Вячаслава Сіўчыка. За дзень да гэтага іх пасадзілі ў менскі сьледчы ізалятар на вуліцы Валадарскага за арганізацыю Чарнобыльскага шляху. Зьняволеньне Хадыкі і Сіўчыка цягнулася каля месяца.
1996 — выйшаў у сьвет першы том Беларускай энцыкляпэдыі.
2001 — у космас паляцеў першы турыст. Амэрыканскі інжынэр Дэніс Ціта за свой тыднёвы палёт у расейскім «Саюзе» заплаціў 20 мільёнаў даляраў.
У гэты дзень нарадзіліся
1839 — Мсьціслаў Камінскі, этнограф і фальклярыст.
1859 — Кіпрыян (Цыпрыян) Кандратовіч, генэрал, удзельнік нацыянальна-вызвольнага руху пач. ХХ ст., чалец ураду БНР.
1886 — Мікалай Міхалап, мастак-кераміст, графік, дызайнэр, фатограф.
1949 — Уладзімер Буднік, кампазытар, аўтар папулярных беларускамоўных песень.
1953 — Валянціна Аксак, паэтка.
Свабода
як сэрафім з шасьцю крыламі:
двума ён
вочы свае захінае, каб Бога ня бачыць,
бо ня варты небнае звышнасьці;
яшчэ двума шчытна
ногі свае атуляе,
каб Бог ня бачыў
ягонай зямное існасьці;
трэцяю ж параю крылаў
увесь час трапеча над намі,
утвараючы мройлівы дым,
празь які мы яго
ніколі ня бачым.
1956 — Антаніна Хатэнка, паэтка, этнакультуроляг.
Любоў Тваю прымаю, Божа, —
і зь пекла вырастаю ў рай.
Хай дапаможа й пераможа
мая Свабода Выбіраць.
1986 — Віталь Рыжкоў, паэт і перакладнік.
мы ніколі ня вернемся
бо вяртацца ня будзе куды
нібы рыбы шукаючы нерасту
ў рацэ без вады
У памяці
1944 — Ільдэфонс Бобіч, каталіцкі сьвятар, пісьменьнік (Пётра Просты), вёў беларускамоўныя набажэнствы.
2021 — Іосіф Несьцяровіч, кіраўнік ансамблю народнай музыкі «Церніца».
