Як паведамляе «Суполка беларускіх пісьменьнікаў», у 2022 годзе рашэньнем журы ў складзе Алены Стральцовай, Уладзімера Някляева, Барыса Пятровіча, Міхася Скоблы і Аксаны Спрынчан літаратурная прэмія Міхася Стральцова была прысуджаная паэтцы Антаніне Хатэнцы з фармулёўкай:
«За вернасьць клясычным літаратурным традыцыям, тэматычнае і вобразнае багацьце мовы, папулярызацыю паэтычнымі сродкамі народных звычаяў і абрадаў».
Летась ляўрэаткай прэміі стала паэтка Наста Кудасава.
Міхась Стральцоў, беларускі пісьменьнік, крытык, перакладчык, нарадзіўся 14 лютага 1937 году, памёр 23 жніўня 1987 году.
