«У Беларусі няма перамяшчэньня тэхнікі і сьцягваньня войскаў да мяжы», — Памежная служба Ўкраіны

Пра гэта заявіў у тэлеэфіры прадстаўнік Дзяржаўнай памежнай службы Ўкраіны Андрэй Дземчанка, паведамляе ўкраінскі партал Укрінформ.

«Сьцягваньня войскаў няма. З 2022 года Беларусь трымае свае падразьдзяленьні на пэўных напрамках, тады яны заяўлялі, што гэта для ўмацаваньня іх бясьпекі, бо чакаюць нейкіх дзеяньняў ад Украіны, хоць Украіна ніколі не пагражала Беларусі і не плянуе такіх дзеяньняў. Таму ёсьць тыя падразьдзяленьні, якія Беларусь трымала ў напрамку нашай мяжы раней. Адбываецца ратацыя, іх мяняюць, ажыцьцяўляюцца іх перамяшчэньні, але нават гэтыя падразьдзяленьні не нарошчваюцца», — адзначыў Дземчанка.

Паводле яго слоў, перамяшчэньня тэхнікі ў непасрэднай блізкасьці ад украінскай мяжы няма. «Інфармацыйна надзьмуўшы, у свой час яны (Беларусь — рэд.) абвясьцілі аб стварэньні Паўднёвага апэратыўнага камандаваньня менавіта ў напрамку мяжы з Украінай. У гэтых рамках можна абсталяваць пазыцыі, палігоны і пад’язныя шляхі», — адзначыў прадстаўнік Дзяржаўнай памежнай службы Ўкраіны.

Паводле яго слоў, тое, што адбываецца на тэрыторыі Беларусі, уважліва адсочваецца разьведвальнымі падразьдзяленьнямі, Міністэрствам абароны і Дзяржаўнай памежнай службай Украіны, каб своечасова рэагаваць на любыя выклікі і пагрозы.

«У цяперашні час Расея ня мае на тэрыторыі Беларусі буйных сіл, у тым ліку пяхотных падразьдзяленьняў, якія маглі б ажыцьцявіць паўторнае ўварваньне з тэрыторыі Беларусі», — падкрэсьліў Дземчанка.

Пры гэтым, паводле слоў прэс-сакратара, нельга выключаць ніякіх правакацыйных дзеяньняў, у прыватнасьці з мэтай адцягненьня ўкраінскіх сіл на гэты напрамак з больш важных. «Таму мы сочым і будзем рэагаваць на ўсе выклікі, якія будуць зыходзіць з тэрыторыі Беларусі, і мы працягваем умацоўваць гэты напрамак», — падкрэсьліў Дземчанка.

• «Паводле зьвестак разьведкі, у памежжы Беларусі адбываецца разбудова дарог да тэрыторыі Ўкраіны і наладжваньне артылерыйскіх пазыцыяў», — напісаў 17 красавіка ў сваім тэлеграм-канале прэзыдэнт Украіны Ўладзімір Зяленскі пасьля дакладу галоўнагакамандуючага ўкраінскім войскам Аляксандра Сырскага. «Лічым, што Расея ў чарговы раз будзе спрабаваць уцягнуць у сваю вайну Беларусь», — адзначыў Зяленскі і дадаў, што «даручыў праз адпаведныя каналы засьцерагчы фактычнае кіраўніцтва Беларусі наконт гатоўнасьці Ўкраіны абараняць сваю зямлю і незалежнасьць».
• Уладзімір Зяленскі таксама зьвязаў перагрупаваньне расейскіх сілаў на фронце з падвышэньнем актыўнасьці ўзброеных сілаў у Беларусі.