Аляксандар Лукшэнка на наступны дзень пасьля перамоваў з спэцпрадстаўніком ЗША Джонам Коўлам заявіў, што вызваленыя і пакінутыя ў Беларусі палітвязьні будуць пад кантролем сілавікоў, перадае БелТА.
«Вы не перажывайце, што мы іх выпусьцілі. Усё тут пад кантролем. 2020 году, мужыкі, у Беларусі ня будзе. Я не хачу бегаць з аўтаматам па вуліцы. Я гэтага не дапушчу, і ўсе на гэта нацэленыя, — заявіў ён. — Мы разумеем, што хацелі разбурыць і перакуліць краіну. Гэта быў удар не толькі па нас, але і па нашых дзецях, унуках. Я гэта дапусьціць магу? Не!»
Ён таксама заявіў, што з 235 вызваленых палітвязьняў, якія пасьля вызваленьня засталіся ў Беларусі, пагрозу могуць уяўляць каля 30 ці 40 чалавек.
«Мы іх ведаем. Перш чым выпускаць, яны ўсе былі ўзятыя на кантроль спэцслужбамі і міліцыяй», — сказаў Лукашэнка.
Прадстаўніца Аб’яднанага пераходнага кабінэту па сацыяльнай палітыцы Вольга Зазулінская пракамэнтавала гэтую заяву Лукашэнкі ў тэлеграм-канале АПК:
«Гэтыя словы — адкрытае папярэджаньне людзям, якія толькі выйшлі на волю пасьля гадоў несправядлівага зьняволеньня, пакут і катаваньняў. Рэжым дае зразумець, што не адпусьціць іх. Мы разам з праваабарончай і гуманітарнай супольнасьцямі заклікаем забясьпечыць бясьпеку вызваленых і гарантаваць ім магчымасьць у поўнай меры карыстацца сваімі правамі».
У выніку сустрэчы з амэрыканскай дэлегацыяй 19 сакавіка ў Менску Аляксандар Лукашэнка памілаваў 250 палітычных вязьняў, зь якіх 235 засталіся ў Беларусі, а 15 былі вывезеныя ў Літву.
ЗША заявілі аб зьняцьці амэрыканскіх санкцыяў з ААТ «Белінвэстбанк», ААТ «Банк разьвіцьця Рэспублікі Беларусь» і Міністэрства фінансаў.
Форум