Прэзыдэнт ЗША Дональд Трамп заявіў, што Злучаныя Штаты «перамаглі» ў вайне супраць Ірану, але амэрыканскія сілы будуць наносіць удары надалей.
Як паведаміла Радыё Свабодная Эўропа / Радыё Свабода, гэтая заява прагучала пасьля таго, як Тэгеран атакаваў сама меней шэсьць караблёў у рэгіёне і паабяцаў наступныя ўдары.
«Ніколі ня хочацца казаць занадта рана аб перамозе. Мы перамаглі», — сказаў Трамп на перадвыбарчым мітынгу ў Кентукі 11 сакавіка.
«У першую гадзіну ўсё скончылася», — дадаў ён.
Камэнтары Трампа і Белага дому апошнімі днямі былі розныя: ад здагадак, што вайна можа доўжыцца ад чатырох да шасьці тыдняў ці даўжэй, да магчымасьці таго, што яна можа скончыцца «хутка».
Трамп заявіў, што амэрыканска-ізраільскі напад на Іран, які пачаўся 28 лютага, «фактычна зьнішчыў» гэтую дзяржаву, у тым ліку значную частку яе кіраўніцтва, узброеных сілаў і ядзернай праграмы.
Тым ня менш, сказаў прэзыдэнт ЗША, удары працягнуцца. «Мы ж ня хочам сыходзіць раней, ці ня так?» — сказаў Трамп. «Мы павінны скончыць працу».
Ізраіль таксама даў зразумець, што не гатовы спыніць сваю кампанію, у тым ліку ўдары ў Лібане на хаўрусныя Ірану сілы «Хэзбалы» (прызнаная тэрарыстычнай групай у ЗША і Эўразьвязе), і заявіў, што ў яго застаецца «шырокі набор цэляў».
«Мы пашырым нашы апэрацыі», — заявіў прадстаўнік арміі, брыгадны генэрал Эфі Дэфрын на брыфінгу 11 сакавіка.
Вайсковая апэрацыя ЗША і Ізраілю супраць Ірану
28 лютага Дональд Трамп аб’явіў аб пачатку супольнай з Ізраілем маштабнай ваеннай апэрацыі супраць рэжыму ў Іране. Патрэбу ў апэрацыі зьвязалі з правалам перамоваў аб іранскай ядзернай праграме.
Аятала Алі Хамэнэі й іншыя прадстаўнікі найвышэйшага іранскага кіраўніцтва былі забітыя. Прэзыдэнт Ірану Масуд Пэзэшкіян назваў забойства Хамэнэі страшным злачынствам і паабяцаў адпомсьціць. Іран пачаў апэрацыю ў адказ і нанёс удары па амэрыканскіх аб’ектах на Блізкім Усходзе.
Масква наўпрост асудзіла агрэсію Ізраілю і ЗША супраць Ірану. Улады Беларусі адрэагавалі стрымана. Лукашэнка ў першыя два дні пасьля гібелі Хамэнэі не сказаў ані слова, а МЗС Беларусі 28 лютага двойчы выступіў з заявамі. У адной прагучала заклапочанасьць абвастрэньнем канфлікту вакол Ірану. У другой заяве атака на Іран асуджаецца, але Ізраіль і ЗША не названыя, акцэнт робіцца на гуманітарным аспэкце.
Беларуская дзяржаўная авіякампанія «Белавія» празь небясьпеку ўзаемных абстрэлаў на Блізкім Усходзе скасавала шэраг рэйсаў і 2 сакавіка накіравала эвакуацыйны самалёт зь Менску ў Доху, каб забраць беларускіх турыстаў, што апынуліся ў Катары, які таксама абстрэльваў Іран.
Паводле іранскага таварыства Чырвонага Паўмесяца, у Іране загінулі больш за 200 чалавек, параненыя больш за 700. Паводле іранскага інфармацыйнага агенцтва IRNA, 118 чалавек сярод загінулых — школьнікі.
Афіцыйныя асобы Аб’яднаных Арабскіх Эміратаў заявілі пра трох загінулых і 58 параненых у краіне з пачатку іранскіх атак на рэгіён Пэрсыдзкай затокі, якія сталі адказам на ваенныя апэрацыі ЗША і Ізраілю.
У выніку іранскага ракетнага ўдару па горадзе Бэйт-Шэмэш у Ізраілі, што за 40 км ад Ерусаліму, як мінімум 9 чалавек загінулі і 28 атрымалі раненьні. З пачатку новага абвастрэньня па тэрыторыі Ізраілю рэгулярна б’юць ракетамі.
2 сакавіка да баявых дзеяньняў у рэгіёне далучылася праіранская ісламісцкая групоўка «Хэзбала», якая пачала з тэрыторыі Лібану абстрэльваць Ізраіль.
У наступныя дні іранскія войскі працягвалі наносіць удары па Саудаўскай Арабіі, Бахрэйне, ААЭ, Кувэйце за іх супрацу з амэрыканцамі па разьмешчаных там амэрыканскіх актывах, а таксама па гатэлях і іншых аб’ектах. ЗША і Ізраіль працягнулі ўдары па вайсковых аб’ектах Ірану.
8 сакавіка іранская Асамблея экспэртаў абрала Муджтабу Хамэнэі новым кіраўніком краіны. Гэта 56-гадовы сын забітага паветранай атакай Алі Хамэнэі. Жонка Муджтабы Хамэнэі, Захра Хадад Адэль, таксама загінула падчас таго ж амэрыканска-ізраільскага ўдару, у якім быў забіты яе цесьць — найвышэйшы кіраўнік (рахбар) Ірану.
Форум