Кошт страхаваньня вырас прыкладна ў 12 разоў. Пра гэта паведамляе Financial Times са спасылкай на страхавых брокераў.
Калі ў звычайных умовах страхоўка складае каля 0,25% ад кошту судна, то зараз яна дасягае прыкладна 3%.
Пасьля пачатку апэрацыі ЗША і Ізраіля супраць Ірану Тэгеран забараніў праход судоў праз Армузскую пратоку. У выніку шэраг буйных суднаходных кампаній, у тым ліку Maersk, MSC і Hapag-Lloyd, прыпынілі або абмежавалі выкарыстаньне гэтага маршруту.
Рост тарыфаў працягваецца, нягледзячы на заяву прэзыдэнта ЗША Дональда Трампа аб гатоўнасьці ваенна-марскога флёту ЗША суправаджаць нафтавыя танкеры праз пратоку, а таксама даваць судам страхаваньне і гарантыі на выгадных умовах.
Разам з тым удзельнікі рынку пакуль не разумеюць, як менавіта будзе працаваць схема, прапанаваная Трампам. «Мы не чулі абсалютна нічога, акрамя гэтай заявы ў Truth Social. Ці будзе гэта распаўсюджвацца, напрыклад, на перавозку кітайскай нафты эўрапейскім танкерам, мы не ведаем», — заявіў у размове з Financial Times партнэр брокерскай кампаніі McGill.
Танкерны рух па Армузскай пратоцы фактычна спыніўся пасьля таго, як Ізраіль і ЗША пачалі апэрацыю супраць Ірану 28 лютага. У адказ Іран стаў абстрэльваць ня толькі Ізраіль, але і іншыя краіны рэгіёну. Апроч тэрмінала QatarEnergy, Іран атакаваў нафтаперапрацоўчы завод Saudi Aramco у Савудаўскай Арабіі. Заяўлялася таксама аб абстрэле аднаго з танкераў у Армузскай пратоцы.
Форум