У відэазаяве, апублікаванай 3 сакавіка ў сетцы X, адмірал Брэд Купэр заявіў, што маштабная ваенная кампанія, якая атрымала назву «Эпічная лютасьць», уключае ў сябе найбуйнейшае нарошчваньне войскаў ЗША на Блізкім Усходзе за апошняе пакаленьне.
«Сёньня ў Арабскай [Пэрсыдзкай. — РС] затоцы, Армускай пратоцы і Аманскай затоцы няма ніводнага іранскага карабля», — сказаў Купэр, апісваючы тое, што ён назваў беспрэцэдэнтнымі намаганьнямі для ліквідацыі здольнасьці Ірану пагражаць амэрыканскім сілам.
У апэрацыі ўдзельнічаюць больш за 50 000 амэрыканскіх вайскоўцаў, больш за 200 зьнішчальнікаў, дзьве авіяносныя ўдарныя групы і далёкія бамбавікі, сказаў Купэр.
Купэр падкрэсьліў, што пачатковая фазу амаль удвая большага маштабу, чым кампанія ў Іраку ў 2003 годзе.
Амэрыканскія войскі, якія дзейнічаюць разам з Ізраілем, наносяць бесьперапынныя ўдары «ад морскага дна да космасу і кібэрпрасторы», сказаў ён.
Паводле Купэра, амэрыканскія войскі нанесьлі ўдары амаль па 2000 цэлях больш чым 2000 боепрыпасамі, яны сур’ёзна падарвалі супрацьпаветраную абарону Ірану, зьнішчылі сотні пускавых установак балістычных ракет і бесьпілётнікаў, патапілі 17 іранскіх караблёў.
Амэрыканскія бамбавікі B-2 і B-1 нанесьлі глыбокія ўдары па ракетных абʼектах унутры Ірану, у той час як бамбавікі B-52 нанесьлі ўдары па інфраструктуры балістычных ракет і камандных цэнтрах, паведаміў Купэр.
Вайскова-марскія сілы запусьцілі хвалі крылатых ракет з дзьвюх авіяносных ударных групаў, у той час як падразьдзелы арміі ЗША ўпершыню ў баі выпусьцілі далёкасяжныя высокадакладныя ўдарныя ракеты, вядомыя як PrSM, хоць незразумела, адкуль яны былі запушчаныя.
Група вайсковых бесьпілётнікаў пад назвай «Апэратыўная група „Скарпіён“» таксама зьдзейсьніла дронавыя атакі, сказаў Купэр.
Іранскі адказ
Тэгеран адказаў запускам больш як 500 балістычных ракет і больш як 2000 бесьпілётнікаў, сказаў Купэр і абвінаваціў Іран у «неразборлівых атаках па мірных жыхарах».
Нягледзячы на захады Ірану ў адказ, Купэр заявіў, што здольнасьць Ірану наносіць удары па войсках і рэгіянальных партнэрах ЗША памяншаецца.
«Мы сканцэнтраваныя на стральбе па ўсім, што можа страляць па нас», — сказаў Купэр, дадаўшы, што амэрыканскія войскі зараз палююць на пакінутыя мабільныя пускавыя ўстаноўкі балістычных ракет Ірану.
Назваўшы кампанію «надзвычай складанай і гістарычнай», Купэр высока ацаніў амэрыканскіх вайскоўцаў усіх родаў войскаў і выказаў упэўненасьць, што амэрыканскія і саюзныя войскі дасягнуць сваіх мэтаў.
«Мы толькі пачалі, — сказаў ён.— Але я моцна ўпэўнены, што мы разам з партнэрамі абавязкова дасягнем нашых вайсковых мэтаў».
Вайсковая апэрацыя ЗША і Ізраілю супраць Ірану
28 лютага Дональд Трамп аб’явіў аб пачатку супольнай з Ізраілем маштабнай ваеннай апэрацыі супраць рэжыму ў Іране. Патрэбу ў апэрацыі зьвязалі з правалам перамоваў аб іранскай ядзернай праграме.
Аятала Алі Хамэнэі й іншыя прадстаўнікі найвышэйшага іранскага кіраўніцтва былі забітыя. Прэзыдэнт Ірану Масуд Пэзэшкіян назваў забойства Хамэнэі страшным злачынствам і паабяцаў адпомсьціць. Іран пачаў апэрацыю ў адказ і нанёс удары па амэрыканскіх аб’ектах на Блізкім Усходзе.
Пераемніка Хамэнэі павінна выбраць рада з 88 багасловаў.
Масква наўпрост асудзіла агрэсію Ізраілю і ЗША супраць Ірану. Улады Беларусі адрэагавалі стрымана. Лукашэнка ў першыя два дні пасьля гібелі Хамэнэі не сказаў ані слова, а МЗС Беларусі 28 лютага двойчы выступіў з заявамі. У адной прагучала заклапочанасьць абвастрэньнем канфлікту вакол Ірану. У другой заяве атака на Іран асуджаецца, але Ізраіль і ЗША не названыя, акцэнт робіцца на гуманітарным аспэкце.
Беларуская дзяржаўная авіякампанія «Белавія» празь небясьпеку ад узаемных абстрэлаў на Блізкім Усходзе скасавала шэраг рэйсаў і 2 сакавіка накіравала эвакуацыйны самалёт зь Менску ў Доху, каб забраць беларускіх турыстаў, што апынуліся ў Катары, які таксама абстрэльваў Іран.
Паводле іранскага таварыства Чырвонага Паўмесяца, у Іране загінулі больш за 200 чалавек, параненыя больш за 700. Паводле іранскага інфармацыйнага агенцтва IRNA, 118 чалавек сярод загінулых — школьнікі.
Афіцыйныя асобы Аб’яднаных Арабскіх Эміратаў заявілі пра трох загінулых і 58 параненых у краіне з пачатку іранскіх атак на рэгіён Пэрсыдзкай затокі, якія сталі адказам на ваенныя апэрацыі ЗША і Ізраілю.
У выніку іранскага ракетнага ўдару па горадзе Бэйт-Шэмэш у Ізраілі, што за 40 км ад Ерусаліму, як мінімум 9 чалавек загінулі і 28 атрымалі раненьні. З пачатку новага абвастрэньня па тэрыторыі Ізраілю рэгулярна б’юць ракетамі.
2 сакавіка да баявых дзеяньняў у рэгіёне далучылася праіранская ісламісцкая групоўка «Хэзбала», якая пачала з тэрыторыі Лібану абстрэльваць Ізраіль.
Форум