Армія абароны Ізраілю (ЦАХАЛ) паведаміла аб нанясеньні ўдару па сакрэтным ядзерным комплексе «Мінзадэхэй», недалёка ад Тэгерану.
Як сьцьвярджае прэсавая служба ЦАХАЛ, у падземным цэнтры група іранскіх навукоўцаў таемна працавала над стварэньнем ключавога кампанэнта для ядзернай зброі.
Апроч таго, ізраільская авіяцыя, паводле ЦАХАЛ, вывела з ладу прыблізна 300 іранскіх пускавых установак. Гэта тлумачыць зьніжэньне інтэнсіўнасьці абстрэлаў Ізраілю з боку Ірану.
Генэральны дырэктар МАГАТЭ Рафаэль Гросі заявіў аб сваёй «выразнай і пасьлядоўнай пазыцыі» наконт ядзернай зброі ў Іране.
«Хоць няма доказаў таго, што Іран стварае ядзерную бомбу, яго вялікія запасы ўзбагачанага ўрану, блізкага да збройнай якасьці, і адмова даць нашым інспэктарам поўны доступ выклікаюць сур’ёзную заклапочанасьць. З гэтых прычын мае папярэднія справаздачы паказваюць, што пакуль Іран не дапаможа МАГАТЭ ў нявырашаных пытаньнях гарантый, Агенцтва ня зможа гарантаваць, што ядзерная праграма Ірану мае выключна мірны характар», — напісаў Рафаэль Гросі на сваёй старонцы на плятформе Х.
З 28 лютага Ізраіль і ЗША наносяць удары па іранскай вайсковай і ядзернай інфраструктуры, а таксама па ўрадавых будынках. Прэзыдэнт ЗША Дональд Трамп заяўляў, што мэта апэрацыі — не дапусьціць распрацоўкі Іранам ядзернай зброі. У адказ Іран атакуе Ізраіль і краіны Блізкага Ўсходу, у якіх ёсьць амэрыканскія вайсковыя базы.
Увечары 3 сакавіка зьявіліся паведамленьні аб імаверным удары іранскім дронам па консульстве ЗША ў Дубаі. Адбыўся невялікі пажар, паведамілі ўлады ААЭ. Паводле іх, ніхто не пацярпеў, узгараньне хутка патушылі.
Вайсковая апэрацыя ЗША і Ізраілю супраць Ірану
28 лютага Дональд Трамп аб’явіў аб пачатку супольнай з Ізраілем маштабнай ваеннай апэрацыі супраць рэжыму ў Іране. Патрэбу ў апэрацыі зьвязалі з правалам перамоваў аб іранскай ядзернай праграме.
Аятала Алі Хамэнэі й іншыя прадстаўнікі найвышэйшага іранскага кіраўніцтва былі забітыя. Прэзыдэнт Ірану Масуд Пэзэшкіян назваў забойства Хамэнэі страшным злачынствам і паабяцаў адпомсьціць. Іран пачаў апэрацыю ў адказ і нанёс удары па амэрыканскіх аб’ектах на Блізкім Усходзе.
Пераемніка Хамэнэі павінна выбраць рада з 88 багасловаў.
Масква наўпрост асудзіла агрэсію Ізраілю і ЗША супраць Ірану. Улады Беларусі адрэагавалі стрымана. Лукашэнка ў першыя два дні пасьля гібелі Хамэнэі не сказаў ані слова, а МЗС Беларусі 28 лютага двойчы выступіў з заявамі. У адной прагучала заклапочанасьць абвастрэньнем канфлікту вакол Ірану. У другой заяве атака на Іран асуджаецца, але Ізраіль і ЗША не названыя, акцэнт робіцца на гуманітарным аспэкце.
Беларуская дзяржаўная авіякампанія «Белавія» празь небясьпеку ад узаемных абстрэлаў на Блізкім Усходзе скасавала шэраг рэйсаў і 2 сакавіка накіравала эвакуацыйны самалёт зь Менску ў Доху, каб забраць беларускіх турыстаў, што апынуліся ў Катары, які таксама абстрэльваў Іран.
Паводле іранскага таварыства Чырвонага Паўмесяца, у Іране загінулі больш за 200 чалавек, параненыя больш за 700. Паводле іранскага інфармацыйнага агенцтва IRNA, 118 чалавек сярод загінулых — школьнікі.
Афіцыйныя асобы Аб’яднаных Арабскіх Эміратаў заявілі пра трох загінулых і 58 параненых у краіне з пачатку іранскіх атак на рэгіён Пэрсыдзкай затокі, якія сталі адказам на ваенныя апэрацыі ЗША і Ізраілю.
У выніку іранскага ракетнага ўдару па горадзе Бэйт-Шэмэш у Ізраілі, што за 40 км ад Ерусаліму, як мінімум 9 чалавек загінулі і 28 атрымалі раненьні. З пачатку новага абвастрэньня па тэрыторыі Ізраілю рэгулярна б’юць ракетамі.
2 сакавіка да баявых дзеяньняў у рэгіёне далучылася праіранская ісламісцкая групоўка «Хэзбала», якая пачала з тэрыторыі Лібану абстрэльваць Ізраіль.
Форум