Аляксандар Лукашэнка ў Маскве сустрэўся з кіраўніком Расеі Ўладзімірам Пуціным.
«РФ і Беларусь будуць рабіць усё неабходнае, каб была гарантавана ваенная бясьпека Саюзнай дзяржавы», — цытуе Пуціна расейскае дзяржаўнае агенцтва ТАСС.
Расейскі лідэр заявіў, што надзейны падмурак для саюзьніцтва Расеі і Беларусі створаны міждзяржаўнай Дамовай аб гарантыях бясьпекі ў рамках Саюзнай дзяржавы, які ўступіў у сілу ў 2025 годзе.
Масква і Менск разам супрацьстаяць санкцыйнаму ціску і выступаюць за фармаваньне шматпалярнага сьвету, заявіў Пуцін пазьней, выступаючы на пасяджэньні Вышэйшага дзяржаўнага савету Саюзнай дзяржавы.
У сваю чаргу, Беларускае дзяржаўнае агенцтва БелТА піша, што Лукашэнка «згадаў пра пачатак практычнай рэалізацыі дамовы аб гарантыях бясьпекі ў рамках Саюзнай дзяржавы, у сьнежні заступіў на баявое дзяжурства ў Беларусі ракетны комплекс „Арэшнік“».
«Геапалітычны расклад аб’ектыўна ставіць перад дзьвюма краінамі задачу быць гатовымі сумесна рэагаваць на любыя выклікі», — цытуе Лукашэнку ТАСС.
Пуцін таксама заявіў, што Расея і Беларусь маюць намер падпісаць дакумэнт аб арганізацыі сумеснай абароны сваіх грамадзян ад перасьледу з боку іншых краін.
- Улады Беларусі падтрымалі Расею ў яе поўнамаштабнай агрэсіі супраць Украіны зь лютага 2022 году, надалі тылавыя паслугі, дарогі, сваю тэрыторыю, вайсковыя базы і аэрадромы для нападу.
- Аляксандар Лукашэнка адкрыта падтрымлівае дзеяньні Расеі. Беларусь таксама абвінавачваюць у дапамозе Расеі пры вывазе ўкраінскіх дзяцей.
Форум