Раніцай 26 лютага жыхары Гомля паведамілі мясцоваму выданьню «Флагшток» аб пралёце дрона над горадам. Пры гэтым украінскія маніторынгавыя каналы апошнімі гадзінамі не фіксавалі ўварваньняў лётных апаратаў у паветраную прастору Гомельскай вобласьці.
Як перадае «Флагшток», дрон «выдае характэрны гук, падобны на гук мапэда». Паведамленьні пра гук паступалі «каля паўгадзіны з розных раёнаў Гомля», пісала выданьне ў 9:34.
Пазьней «Флагшток» дадаў, што «усьлед за чорным БПЛА» вайскоўцы «адправілі верталёт». Як перадае выданьне з спасылкай на зьвесткі візуальнага назіраньня, над Гомлем, імаверна, быў заўважаны дрон Shahed-136 («Герань»), які выкарыстоўвае Расея.
У 10:03 тэлеграм-канал «Говорит Гомель|Гомельщина», які зьвязваюць з упраўленьнем ідэалёгіі Гомельскага аблвыканкаму, апублікаваў допіс, у якім пералічаныя «меры бясьпекі пры выяўленьні дронаў». Выданьне ўдакладніла, што матэрыял абнародаваны «проста, каб ведаць».
«Неабходна захоўваць спакой і найперш прыняць меры для запэўненьня ўласнай бясьпекі. Калі дазваляе час, схавацца ў капітальным будынку далей ад вокнаў і шкляных вітрын або схавацца за дрэвамі з густой кронай», — гаворыцца ў пасьце.
Выданьне таксама папярэдзіла аб крымінальнай адказнасьці за «любую здымку і публікацыю фота і відэа перамяшчэньняў вайсковай тэхнікі, вайскоўцаў або вайсковых аб’ектаў».
Журналіст «Люстэрка» пад выглядам звычайнага грамадзяніна датэлефанаваўся да вайсковага камісара Гомельскага раёна Аляксандра Пазьнякова, каб высьветліць сытуацыю.
— Гэта заняткі ідуць, — адказаў вайсковец.
— Нашы нешта запускаюць? — удакладніў журналіст.
— Так.
— Гэта будзе ўвесь дзень? Калі гэта скончыцца?
— Не хвалюйцеся, усё ў парадку.
— Гэта значыць, вы ведаеце, усё пад кантролем?
— Так-так-так.
Адзін з украінскіх маніторынгавых каналаў а 1:22 начы паведаміў, што адзін расейскі дрон пасьля ўзьдзеяньня на яго сродкамі радыёэлектроннай барацьбы паляцеў у кірунку Мазыра. «Ужо без пагрозы для Ўкраіны, лятае ўжо над Рэспублікай Беларусь», — адзначаецца ў паведамленьні.
У ноч на 26 лютага расейскія войскі атакавалі тылавыя рэгіёны Ўкраіны адначасова з прыфрантавымі. Для ўдару гэтым разам выкарысталі і баявыя дроны, і ракеты.
Найбольш параненых — у Харкаўскай, Запароскай і Днепрапятроўскай вобласьцях.
Сілы супрацьпаветранай абароны Ўкраіны змаглі зьбіць 374 бесьпілётнікі і 32 ракеты.
Форум