Паводле допісаў у сацыяльных сетках, 5 лютага ў Менску ліхтары запалілі на 40 хвілін раней, чым напярэдадні. Такім чынам, можна меркаваць, што ўлады адмовіліся ад ранейшых плянаў, агучаных Лукашэнкам, запальваць ліхтары не раней за 20-ю гадзіну.
У дзяржаўнай арганізацыі «Белэнэрга» заявілі, што «графікі вулічнага асьвятленьня карэктуюць ва ўзаемадзеі зь мясцовымі ўладамі».
Вулічнае асьвятленьне павінна быць разумным і эфэктыўным, пры гэтым забясьпечваючы камфорт і, галоўнае, поўную бясьпеку людзей. Так сказаў намесьнік генэральнага дырэктара «Белэнэрга» Валер Поршнеў, словы якога прыводзіць mlyn.by.
«На сёньня тыя прылады і ўстаноўкі, якія выкарыстоўваюцца для абслугоўваньня электрычнай сеткі ў населеных пунктах, працуюць у дыстанцыйным фармаце з выкарыстаньнем праграмных комплексаў. Гэта азначае, што энэргетыкі могуць карэктаваць графікі на адлегласьці і ў апэратыўным фармаце. Безумоўна, час уключэньня і выключэньня фармуецца з улікам часу ўзыходу і заходу сонца».
У зонах павышанай адказнасьці — каля школаў, лякарняў, пешаходных пераходаў, аб’ектаў транспартнай інфраструктуры — прымяняецца асаблівы рэжым асьвятленьня. Пытаньні бясьпекі абмяркоўваюцца пры ўдзеле усіх зацікаўленых службаў.
Паводле «Белэнэрга», зыходзячы з агучаных заўваг, энэргетыкі ў супрацы зь мясцовымі выканкамамі выпрацоўваюць адзіны падыход да фармаваньня графікаў вулічнага асьвятленьня з улікам сацыяльных стандартаў і асаблівасьцяў сельскіх населеных пунктаў.
Форум