З 57 асобін рысі, адведзеных для паляўнічай здабычы ў мінулым сэзоне, упалявана ўсяго шэсьць (10,5%), паведаміў дзяржаўным СМІ старшыня Беларускага таварыства паляўнічых і рыбаловаў (БТПР), былы міністар унутраных спраў Ігар Шуневіч.
«З рысьсю сытуацыя неадназначная. Поўны правал сэзону. Дазволеныя спосабы — з падыходу і з засады, без загонных паляваньняў. У нас няма досьведу і ўмоў для паляваньня на рысь з сабакамі», — панаракаў Шуневіч, адзначыўшы, што забітыя жывёлы зьявіліся «хутчэй спадарожнай здабычай».
Ён падкрэсьліў, што «ўсе асьцярогі прыродаахоўнікаў пра ўплыў на папуляцыю аказаліся блефам, нагнятаньнем атмасфэры».
Акрамя таго, Шуневіч прызнаў, што «паляваньне на рысь ня стала фэномэнам нацыянальнага паляваньня».
Сэзон паляваньня на рысь працягваўся з 31 кастрычніка 2025 году па 31 студзеня 2026.
Урад дазволіў паляваньне на рысь у красавіку 2025 году, калі ўнёс зьмены ў пастанову «Аб пэўных пытаньнях паляваньня і вядзеньня паляўнічай гаспадаркі». Паніжэньне ахоўнага статусу рысіў Чырвонай кнізе Беларусі тады выклікала рэзкую крытыку беларускіх прыродазнаўцаў.
Форум