Летась 13 сьнежня стала вядома, што палітвязень Сяргей Ботвіч (гаворка пра асуджанага за шпіянаж бізнэсоўца, за кратамі ў Беларусі зараз два Сяргеі Ботвічы, якіх праваабаронцы прызнаюць палітвязьнямі — РС) пачаў галадоўку за кратамі. Пра гэта напісала выданьне «Люстэрка», спаслаўшыся на людзей, якія вызваліліся з калёніі, дзе сядзіць Ботвіч. Галадоўка ўскладняецца тым, што ў мужчыны ёсьць сур’ёзныя захворваньні.
Сяргею Ботвічу 61 год. Ён бізнэсовец. Нарадзіўся ў Беларусі, мае грамадзянства Літвы і Францыі. Ужо больш за 4,5 года знаходзіцца за кратамі — цяпер у калёніі № 22 пад Івацэвічамі, якую называюць «Воўчыя норы». Ботвіча абвінавацілі ў «шпіянажы» і «агентурнай дзейнасьці». Асудзілі на 13 гадоў зьняволеньня. Судовы працэс праходзіў у закрытым рэжыме.
«Ужо трэці месяц яму не дазваляюць перадаваць лекі»
Блізкая асоба Сяргея Ботвіча, якая знаходзіцца за мяжой (мы не называем імя дзеля бясьпекі. — РС), расказала Свабодзе, што з таго моманту, як інфармацыя пра галадаваньне стала публічнай, Ботвічу забаранілі тэлефанаваць родным. У сям’і больш за месяц няма пра яго ніякай інфармацыі.
«З сваімі дзецьмі яму забаронена кантактаваць ужо другі год», — кажа суразмоўца.
У Ботвіча чацьвёра дзяцей ад некалькіх шлюбаў. Яны ўсе жывуць за межамі Беларусі: у Расеі і Літве. Сярод іх ёсьць паўналетнія, а найменшае дзіця, калі Ботвіча затрымалі, было немаўлём. Пасьля затрыманьня мужа ягоная апошняя жонка падала на развод, расказвае суразмоўца.
Паводле зьвестак Свабоды, арышт Сяргея Ботвіча і вялікі тэрмін, на які яго асудзілі, моцна паўплывалі на аднаго зь ягоных сыноў, якому цяпер 19 гадоў. Хлопец жыве ў Літве.
«У яго разьвілася цяжкая дэпрэсія, зьявіліся праблемы з сэрцам, сфармаваліся пераяданьне і іпахондрыя. Ён ня раз ляжаў у шпіталі і ня скончыў школу. Ён штодня кажа, што адчувае сябе нібы паміж небам і зямлёй, бо ня ведае, ці яму яшчэ ўдасца ўбачыць бацьку жывым», — кажа суразмоўца.
Ці скончыў Сяргей Ботвіч пачатую больш за месяц таму галадоўку, невядома. Адвакат да яго ня ходзіць, кажа крыніца Свабоды. Вядома, што Сяргею Ботвічу не перадаюць неабходных лекаў і прадуктаў.
«Самае страшнае — ужо трэці месяц яму не дазваляюць перадаваць лекі і ўвогуле любыя перадачы. Чалавек, у якога дыябэт і трамбоз і які не атрымлівае лекаў, фактычна асуджаны на сьмерць. Уся гэтая сытуацыя жахлівая. Таксама ён ня раз казаў, што да яго кепска ставяцца і не дазваляюць мець грошы на картцы, з дапамогай якой асуджаныя купляюць там самыя неабходныя рэчы», — кажа блізкі чалавек Ботвіча.
З словаў суразмоўцы, родных у Ботвіча ў Беларусі засталося мала. У 2021 годзе, калі яго затрымалі, ён ехаў зь Літвы на могілкі ў вёску Новы Двор Сьвіслацкага раёну, дзе пахаваныя ягоныя бацькі й іншыя крэўныя.
«Мяне выкралі супрацоўнікі КДБ»
Сяргей Ботвіч нарадзіўся ў вёсцы Новы Двор Сьвіслацкага раёну Беларусі. У маладосьці пераехаў жыць у Літву. Быў тройчы жанаты, ёсьць чацьвёра дзяцей. Меў жытло ў некалькіх краінах, у тым ліку ў беларускай частцы Белавескай пушчы і ў Літве, расказвала раней крыніца, знаёмая з Ботвічам.
Ён меў бізнэс у Літве, спэцыялізаваўся на вытворчасьці і продажу драўлянага вугалю, а таксама на турызьме. Займаўся таксама бізнэсам у Францыі, Расеі і Беларусі. Супрацоўнічаў з партнэрамі ў Францыі, Вялікай Брытаніі, Нямеччыне, Нідэрляндах, ЗША.
Як расказвала раней Свабодзе асоба, знаёмая з Ботвічам, у 2021 годзе знаёмыя запрасілі прадпрымальніка ў Беларусь. Ён прыехаў на радзіму 16 чэрвеня. Ужо 21 чэрвеня ў Горадні яго затрымаў КДБ.
«Яго выманілі пад гарантыі бясьпекі ад высокапастаўленага чыноўніка. Яны пайшлі ў рэстарацыю адпачываць. Там ён на п’яную галаву нагаварыў рознага, а прачнуўся ў СІЗА горадзенскай турмы», — расказваў суразмоўца Свабоды.
Ботвіч, з словаў крыніцы, не разумеў, за што яго пасадзілі, і не прызнаваў сваёй віны. Доўгі час ён быў перакананы, што турма — гэта розыгрыш ад ягоных сяброў.
«Ён расказваў, маўляў, вось я сяджу і чакаю, пакуль адчыняцца дзьверы, прыйдуць сябры і скажуць, што гэта жарт», — пераказваў словы Ботвіча наш суразмоўца.
Вязень, які сядзеў разам з Ботвічам і бачыў ягоныя старыя фота, расказваў Свабодзе, што той моцна схуднеў за кратамі. Сяргей лёгка гаварыў па-беларуску і па-ангельску, ахвотна падтрымліваў гістарычныя тэмы. З словаў суразмоўцы, Ботвіч ведае 6 моваў, мае філялягічную і фінансавую адукацыі.
Летась у ліпені выданьне «Наша ніва» апублікавала ліст, які, паводле «НН», Сяргей Ботвіч нейкім чынам перадаў на волю. Фрагмэнты інфармацыі ў лісьце супадалі з тым, што раней пра бізнэсоўца расказвалі Свабодзе іншыя крыніцы. У лісьце прадпрымальнік заявіў пра катаваньні.
«Я быў выкрадзены супрацоўнікамі КДБ Рэспублікі Беларусь і ўзяты пад варту 21.06.21 (будучы этнічным беларусам, я прыехаў наведаць сястру і адведаць магілы бацькоў і сваякоў). Паўтара года трымалі ў адзіночнай камэры. Паддавалі 10-гадзінным допытам (перакрыжаваным), пакідаючы бязь ежы і піцьця на гэты час пры [маіх] хранічных захворваньнях: цукровіца, посттрамбозны сындром, гіпэртанія і падагра», — пісаў ён у лісьце.
Паводле Сяргея Ботвіча, беларускія сілавікі прапаноўвалі яму абгаварыць сябе, прызнаўшыся ў нібыта шпіёнскай дзейнасьці на карысьць Літвы.
«Патрабавалі пацьвердзіць, што нібыта я зьяўляюся супрацоўнікам Дэпартамэнту дзяржаўнай бясьпекі Літоўскай Рэспублікі. Ува ўсіх дакумэнтах я праходзіў як „иноразведчик“», — пісаў ён.
Сяргей Ботвіч сьцьвярджае, што беларускія спэцслужбы шантажавалі ягоных сваякоў.
«Ня маючы ніякіх доказаў, беларускія спэцслужбы незаконна ўжылі да мяне артыкулы 358 і 358-1 і пры адсутнасьці складу шпіянажу прысудзілі мне 13 гадоў пазбаўленьня волі», — сьцьвярджае Сяргей Ботвіч.
Ботвіч закончыў ліст заклікам пра дапамогу і папярэджаньнем на адрас грамадзян краін Эўразьвязу аб небясьпецы, якую нясуць спэцслужбы Беларусі.
«Я зьвяртаюся да ўсёй эўрапейскай дэмакратычнай грамадзкасьці, каб падтрымалі мяне і маю сям’ю, бо ў такой сытуацыі можа апынуцца кожны жыхар Эўразьвязу. Гэты спрут з назвай з камуністычнага мінулага цынічна і нахабна прысутнічае на эўрапейскай тэрыторыі, урываецца ў прыватнае жыцьцё, запалохвае і вэрбуе эўрапейскіх грамадзян, а таксама праслухоўвае іх тэлефонныя размовы», — кажа Сяргей Ботвіч.
Форум