Зноў пакаралі лекара Бадамшына
Лекар-нэўроляг Руслан Бадамшын асуджаны на пазбаўленьне волі, паведаміла ініцыятыва лекараў «Белыя халаты».
У паведамленьні гаворыцца, што яму прысудзілі два з паловай гады зьняволеньня ва ўмовах агульнага рэжыму.
Крымінальную справу супраць былога палітвязьня Руслана Бадамшына завялі ў чэрвені 2025 году. Тады ж яго затрымалі. Абвінавацілі паводле арт. 361-4 Крымінальнага кодэксу («садзейнічаньне экстрэмісцкай дзейнасьці»).
Раней, 7 траўня 2024 году, суд Фрунзэнскага раёну Менску пакараў Бадамшына 3 гадамі абмежаваньня волі без накіраваньня ў папраўчую ўстанову паводле арт. 342 КК («арганізацыя і падрыхтоўка дзеяньняў, якія груба парушаюць грамадзкі парадак, або актыўны ўдзел у іх»). За тое самае была асуджаная жонка лекара Тацяна Бадамшына.
Ад жніўня 2020 году Бадамшын правёў 63 дні пад адміністрацыйным арыштам. У 2021 годзе яго звольнілі з РНПЦ нэўрахірургіі, бо ў дзень вызваленьня з ізалятару ён спазьніўся на працу. Пасьля працаваў у прыватным мэдычным цэнтры.
Улады дадалі ў «сьпіс экстрэмістаў» яшчэ 30 чалавек
16 студзеня МУС зрабіла традыцыйнае пятнічнае абнаўленьне «Пераліку грамадзян Беларусі, замежных грамадзян або асоб без грамадзянства, якія маюць дачыненьне да экстрэмісцкай дзейнасьці».
Сярод іншага, у сьпіс дадалі грамадзяніна Расеі Канстанціна Дзьмітрыева, мастачку Аксану Шаляпіну, а таксама 18-гадовую Ганну Старацітараву.
Усяго ў сьпісе цяпер у ім 6205 чалавек, піша «Вясна».
- Канстанцін Анішчанка, 39 гадоў
- Дзьмітры Богуш, 55 гадоў
- Ільля Васечак, 37 гадоў
- Натальля Галоўка, 49 гадоў
- Канстанцін Дзьмітрыеў, 36 гадоў
- Алена Добыш, 44 гады
- Максім Дударга, 29 гадоў
- Аляксей Ермаловіч, 29 гадоў
- Зьміцер Захараў, 32 гады
- Аляксандар Канавальчык, 46 гадоў
- Андрэй Канапацкі, 37 гадоў
- Аляксей Кісель, 39 гадоў
- Сяргей Кузьняцоў, 38 гадоў
- Ганна Кухарчык, 47 гадоў
- Сяргей Лагвіновіч, 39 гадоў
- Аляксей Мароз, 38 гадоў
- Іван Нікіпарцоў, 36 гадоў
- Максім Нікіценка, 43 гады
- Міхаіл Палазьнік, 34 гады
- Вячаслаў Прусс, 45 гадоў
- Дзяніс Пятроў, 44 гады
- Аляксандар Рудзкі, 32 гады
- Ганна Старацітарава, 18 гадоў
- Яўген Стралкоўскі, 48 гадоў
- Дзьмітры Царук, 37 гадоў
- Сяргей Цыганкоў, 27 гадоў
- Аксана Шаляпіна, 48 гадоў
- Павел Шумскі, 42 гады
- Аляксей Шыловіч, 50 гадоў
- Андрэй Янкавец, 38 гадоў
Праваабаронцы прызналі палітвязьнямі яшчэ 5 чалавек
- Ільля Барыскевіч
- Уладзімір Івашкевіч
- Дзьмітры Кегелеў
- Сяргей Саўчкоў
- Аляксандар Чыж
Гэтых людзей асудзілі на зьняволеньні за абразу Лукашэнкі і іншыя формы мірнай рэалізацыі свабоды меркаванняў, адзначылі праваабаронцы ў заяве.
Цяпер у Беларусі 1146 палітычных вязьняў, пра якіх ведаюць праваабаронцы «Вясны». Паводле праваабарончай ініцыятывы Dissidentby, палітвязьняў 1195. Розныя ініцыятывы выкарыстоўваюць розныя крытэры ўлучэньня ў сьпіс.
Як рэжым Лукашэнкі выкарыстоўвае ярлык «экстрэмізму», каб душыць свабоду слова і змагацца з палітычнымі апанэнтамі
Пасьля сфальшаваных прэзыдэнцкіх выбараў 2020 году і сілавога здушэньня агульнанацыянальных пратэстаў аўтарытарны рэжым Аляксандра Лукашэнкі пачаў сыстэматычна выкарыстоўваць антыэкстрэмісцкае заканадаўства для барацьбы з іншадумствам, ліквідацыі незалежных мэдыя і перасьледу палітычных апанэнтаў.
Улады заблякавалі сайты незалежных мэдыя і спынілі публікацыю непадкантрольных друкаваных выданьняў, пазбавілі акрэдытацыі журналістаў іншаземных мэдыя і разграмілі офісы самых уплывовых СМІ. Сотні беларускіх рэпартэраў прайшлі праз арышты, дзясяткі застаюцца ў турмах. Усе незалежныя мэдыя, якія асьвятляюць грамадзка-палітычны парадак дня ў Беларусі, цяпер працуюць выключна з-за мяжы.
Ад 2021 году ўлады пачалі масава абвяшчаць вэб-сайты і асобныя ўліковыя запісы ў сацыяльных сетках незалежных мэдыя, палітычных і грамадзкіх арганізацый, ініцыятыў і проста блогераў «экстрэмісцкімі матэрыяламі», а іх аўтараў «экстрэмісцкімі фармаваньнямі» — часта без судовага разгляду.
Рэспубліканскі сьпіс экстрэмісцкіх матэрыялаў вядзе Міністэрства інфармацыі Беларусі. На дадзены момант у сьпісе на 1469 старонках пералічаны тысячы «экстрэмісцкіх матэрыялаў», за выкарыстаньне якіх прадугледжаная адказнасьць. У сьпісе — сайты, тэлеграм-каналы, акаўнты, старонкі ў сацыяльных сетках, відэаролікі і артыкулы ў інтэрнэце, маркі, значкі, CD-дыскі, а таксама кнігі, у тым ліку мастацкія.
На канец 2024 году больш за 6500 онлайн-рэсурсаў былі забароненыя такім чынам. За любое ангажаваньне з уключанымі ў экстрэмісцкі сьпіс рэсурсамі — ці гэта «падабайка», ці камэнтар, ці падпіска на канал — у Беларусі пагражае крымінальная адказнасьць. Удзел у «экстрэмісцкім фармаваньні» можа карацца турэмным зьняволеньнем да 10 гадоў.
Ужо тысячы беларусаў прайшлі праз штрафы, арышты і турэмнае зьняволеньне за «экстрэмізм».
Паводле ацэнкі Ўпраўленьня Вярхоўнага камісара ААН у правах чалавека, улады Беларусі «выкарыстоўваюць ярлык „экстрэмізм“ для падаўленьня іншадумства, адвольна клясыфікуючы дзеяньні, апісаныя як распаўсюд ілжывай інфармацыі, абразу службовых асобаў, дыскрэдытацыю інстытутаў, арганізацыю масавых беспарадкаў, заклікі да санкцый і распальваньне сацыяльнай варожасьці, як „экстрэмісцкія“, якія падлягаюць крымінальнаму перасьледу».