На паседжаньні Камісіі па нацыянальнай бясьпецы Літвы зноў абмяркоўвалі сытуацы ю зь Беларусьсю, у тым ліку тое, што тычыцца кантрабандысцкіх балёнаў з цыгарэтамі.
Пра гэта паведаміў агенцтву BNS дарадца прэм’ер-міністра Літвы Ігнас Альгірдас Дабравольскас:
«Пакуль гэтая сытуацыя ня вырашаная, гэтыя пытаньні будуць рэгулярна разглядацца ў Камісіі па нацыянальнай бясьпецы. Таксама закранутае пытаньне грузавікоў, дзе праблема таксама яшчэ ня вырашаная», — заявіў ён.
Прэмʼер Літвы Інга Ругінене па выніках паседжаньня заявіла, што ў мінулым годзе літоўскія службы затрымалі рэкордна вялікія абʼёмы кантрабанды, і а сёлета чакаецца яшчэ больш высокі вынік.
«Мы ня спынімся. Вынік у канцы году быў вельмі добры. Я радая і дзякую службам. Былі дасягнуты сапраўды выдатныя лічбы, я ўжо і не ўзгадаю такіх затрыманьняў і такой апэратыўнасьці. Я дакладна ведаю, што службы будуць мець больш шырокае бачаньне гэтай сытуацыі, і вельмі спадзяюся, што мы зможам пахваліцца добрымі вынікамі і сёлета», — сказала прэмʼер-міністар журналістам.
Тым не менш кіраўніца ўраду Літвы падкрэсьлівае, што зьмяншэньне колькасьці кантрабандысцкіх паветраных балёнаў у апошнія тыдні ацэньваць пакуль рана.
«Я нават не хачу ацэньваць памяншэньне колькасьці балёнаў, таму што, па-першае, гэта быў сьвяточны пэрыяд — мы ўсе разумеем, што ў Расеі і Беларусі сьвяточны пэрыяд працягваецца да 15 студзеня. Па-другое, быў пераменлівы вецер — і спрыяльны, і неспрыяльны, які дзьме ў бок Беларусі, а ня ў наш бок. І па-трэцяе — выпаў сьнег, і яго даволі шмат», — сказала Ругінене.
«Ёсьць пэўныя фактары, якія не дазваляюць усебакова ацаніць усю сытуацыю. Для гэтага патрэбны больш працяглы пэрыяд, і мы ўсё яшчэ знаходзімся ў рэжыме пільнасьці і вельмі асьцярожна ацэньваем сытуацыю», — дадала яна.
На фоне скарачэньня плыні шароў міністар унутраных спраў Літвы Ўладзіслаў Кандратовіч на мінулым тыдні паведаміў BNS, што пакуль ня бачыць неабходнасьці адмяняць рэжым экстрэмальнай сытуацыі дзяржаўнага ўзроўню, уведзены месяц таму з-за гэтай кантрабанды.
Паводле Службы аховы дзяржаўнай мяжы Літвы, летась агулам было перахоплена 635 грузаў цыгарэт, перапраўленых зь Беларусі ў Літву на паветраных балёнах. У 2024 годзе такіх грузаў было 226, у 2023 годзе — некалькі, а ў 2022 годзе не было зафіксавана ніводнага.
Балёны зь Беларусі летась парушылі працу больш за 300 авіярэйсаў, у асноўным у Віленскім аэрапорце, закранулі 47 тысяч пасажыраў і прывялі да закрыцьця аэрапортаў амаль на 60 гадзін у агульнай складанасьці.
У сувязі з тым, што ўрад Літвы раней на некалькі тыдняў абмяжоўваў працу памежных пунктаў зь Беларусьсю, Менск адмаўляецца выпускаць са сваёй краіны зарэгістраваныя ў Літве грузавікі. Кіраўнікі Літвы расцэньваюць дзеяньні ў сувязі з кантрабандай і затрыманьнем грузавікоў як гібрыдную атаку менскага рэжыму.
Закрыцьцё пераходаў на мяжы Літвы і Беларусі
- 8 жніўня 2023 году Літва закрыла пункты пропуску Шумск (з боку Беларусі Лоша) і Цьверач (Відзы), 1 сакавіка 2024-га — Лаварышкі (Катлоўка) і Райгорад (Прывалка). На мяжы зь Беларусьсю працягвалі працаваць два памежныя пераходы — Меднікі (Каменны Лог) і Салечнікі (Беняконі).
- Урад Літвы 27 кастрычніка 2025 году зусім закрыў мяжу зь Беларусьсю на месяц пасьля таго, як некалькі разоў вымушана прыпынялася праца аэрапортаў у Вільні і Коўне з прычыны зьяўленьня паблізу іх аэрастатаў, якія ляцелі зь Беларусі, несучы цыгарэты.
- Улады Беларусі ў адказ 31 кастрычніка забаранілі літоўскім грузавікам выяжджаць цераз польскую і латвійскую мяжу.
- 10 лістапада на загад Аляксандра Лукашэнкі ўсе літоўскія фуры, якія знаходзяцца ў Беларусі, сабралі на адмысловых пляцоўках і ўзялі пад ахову з выстаўленьнем рахункаў — 120 эўра на содні. Паводле Лукашэнкі, фураў было больш за 1100.
- 10 лістапада Вільня зьвярнулася да Менску з просьбай дазволіць выезд грузавікоў сваіх кампаніяў у Літву. Менск адмовіў.
- Вільня марна спрабавала вярнуць транспарт шляхам кантактаў на ведамасным узроўні. Беларусь прапанавала Літве або скасаваць рашэньне аб закрыцьці мяжы, або выйсьці на палітычна-дыпляматычнае разьвязаньне праблемы.
- 19 лістапада ўрад Літвы вырашыў, што закрытыя ў кастрычніку два пункты пропуску на мяжы Літвы і Беларусі Меднікі і Салечнікі адкрыюцца з 20 лістапада. Перад гэтым прэмʼер-міністарка Інга Ругінене заявіла, што апошнім часам паветраных балёнаў з кантрабандавымі цыгарэтамі стала меней.
- Аднак пасьля таго як урад Літвы зноў адкрыў мяжу, Віленскі аэрапорт зноў некалькі разоў закрывалі з прычыны аэрастатаў зь Беларусі, а літоўскім фурам па-ранейшаму не даюць выехаць у Літву. Беларускі бок патрабуе ад Вільні пачатку палітычных перамоваў.
Форум