Як паведамляе BNS, летась літоўскія памежнікі затрымалі рэкордную колькасьць кантрабандных цыгарэт — 4 млн 440,6 тысячы пачкаў, паведаміла ў пятніцу Служба аховы дзяржаўнай мяжы Літвы.
Гэта найбольшая за год колькасьць затрыманых нелегальных тытунёвых вырабаў за ўсю гісторыю дзейнасьці службы — трэць стагодзьдзя з моманту аднаўленьня незалежнасьці Літвы.
Гэта больш чым утрая перавышае вынік 2024 году. Кошт затрыманых у мінулым годзе тытунёвых вырабаў складае амаль 21,1 млн эўра, а перадухіленыя страты для дзяржаўнага бюджэту — больш за 18,8 млн эўра. Леташні год стаў асаблівым і тым, што ў Літву спрабавалі завезьці больш нелегальных цыгарэт з Латвіі больш, чым зь Беларусі. Раней такой зьявы не назіралася.
У 2025 годзе памежнікі выявілі 917 выпадкаў кантрабанды і незаконнай перавозкі тавараў (у 2024 г. — 637), зь іх у 911 выпадках перавозілася тытунёвая прадукцыя. За незаконную перавозку тавараў летась былі затрыманыя 352 чалавекі.
50,1% затрыманых памежнікамі цыгарэт увезена праз унутраную мяжу Эўразьвязу — з Латвіі, 49,2% — зь Беларусі, 0,3% — з Расеяі. Яшчэ ў 0,4% выпадкаў шлях трапляньня кантрабанды ў Літву застаўся невядомым.
Што да марак, то больш за ўсё было затрымана цыгарэт пад назвай Minsk — 37% ад агульнай колькасьці. 26% склалі таксама беларускія цыгарэты маркі NZ. 15% і 13% прыпала на Marlboro і Winston, пачкі якіх амаль ува ўсіх выпадках былі без акцызных марак.
Форум