Выканальніца абавязкаў прэзыдэнта Вэнэсуэлы Дэльсі Радрыгес імкнецца ўмацаваць сваю ўладу, піша Financial Times.
Паводле звестак Нацыянальнага зьвязу работнікаў прэсы Вэнэсуэлы, 14 журналістаў і работнікаў СМІ затрыманыя на некалькі гадзін сіламі бясьпекі падчас цырымоніі прывядзеньня Радрыгес да прысягі ў Нацыянальнай асамблеі. Трынаццаць зь іх пазьней былі вызваленыя, а адзін дэпартаваны.
Калюмбійскі тэлеканал Caracol паведаміў, што адзін зь ягоных рэпартэраў, Карляс Бараган, і яго каманда былі «затрыманыя супрацоўнікамі Генэральнага ўпраўленьня вайсковай контравыведкі Вэнэсуэлы і дапытваліся амаль дзьве гадзіны».
На вуліцах сталіцы Каракасу таксама зьявіліся прадстаўнікі праўрадавых груповак, вядомых як «калектывас». Указ аб абвяшчэньні надзвычайнага становішча, паводле Financial Times, загадвае «неадкладна правесьці пошук і арышт… любой асобы, якая ўдзельнічае ў спрыяньні або падтрымцы ўзброенага нападу ЗША на тэрыторыю рэспублікі».
Праваабаронцу з Каракасу на ўмовах ананімнасьці заявіў, што рэпрэсіі значна ўзмацніліся 5 студзеня, улады правяраюць тэлефоны людзей, каб высьветліць іх месцазнаходжаньне. Улады ставяць кантрольна-прапускныя пункты па ўсёй сталіцы.
Раніцай 3 студзеня армія ЗША напала на Вэнэсуэлу. Прэзыдэнт краіны Нікаляс Мадура абвясьціў надзвычайнае становішча і заклікаў насельніцтва да мабілізацыі супраць «агрэсіі ЗША». Але гэта адбылося да заявы Дональда Трампа аб затрыманьні вэнэсуэльскага кіраўніка. Разам з сваёй жонкай ён быў схоплены і дастаўлены ў амэрыканскі суд.
У сьвеце неадназначная рэакцыя на дзеяньні Злучаных Штатаў і асабіста Трампа. Частка крытыкуе яго за ўмяшаньне ва ўнутраныя справы Вэнэсуэлы і сілавое разьвязаньне справы, частка сьвяткуе пазбаўленьне Вэнэсуэлы ад дыктатуры, якая працягвалася не адзін дзясятак гадоў.
Між іншым, Мадура, як і ягоны папярэднік Уга Чавэс, мелі добрыя дачыненьні з кіраўніком Беларусі Лукашэнкам.
Форум