ХАМАС перадаў у Газе 20 ізраільскіх закладнікаў, Ізраіль — арабскіх зьняволеных. Трамп кажа пра «гістарычны сьвітанак»

13 кастрычнік 2025, 08:28 абноўлена 13 кастрычнік 2025, 15:36

Місія Чырвонага Крыжа. Газа, 13 кастрычніка 2025 году

Прэзыдэнт ЗША Дональд Трамп абвясьціў пра «гістарычны сьвітанак» на Сярэднім Усходзе ў прамове перад ізраільскім парлямэнтам 13 кастрычніка.

«Сёньня неба спакойнае, гарматы маўчаць, сырэны ня выюць, і сонца ўзыходзіць над Сьвятой Зямлёй, якая нарэшце ў міры», — заявіў Трамп у сваёй прамове, якая была ненадоўга перапынена выкрыкамі з боку аднаго з апазыцыйных дэпутатаў.

Прэзыдэнт ЗША Дональд Трамп выступае перад ізраільскім парлямэнтам 13 кастрычніка 2025

Трамп таксама згадаў вайну ва Ўкраіне, сказаўшы ізраільскім заканадаўцам: «Я думаў, што яе будзе лёгка ўрэгуляваць. Я думаў, што гэта значна прасьцей, чым рабіць тое, што мы толькі што вельмі пасьпяхова зрабілі з Ізраілем».

Раніцай 13 кастрычніка місія Чырвонага Крыжа накіравалася ў сэктар Газа, дзе ХАМАС перадаў ёй 20 ізраільскіх закладнікаў. Паведамляецца, што гэта ўсё закладнікі, якія засталіся ў жывых.

Як паведаміла агенцтва AFP, ХАМАС апублікаваў імёны ізраільцаў, якіх перадаюць Чырвонаму Крыжу.

Вызваленыя ізраільскія закладнікі, блізьняты Галі і Зіў Бэрман, якіх трымалі ў Газе з часу нападу ХАМАС 7 кастрычніка 2023 году, размаўляюць адзін з адным пасля вызваленьня ў рамках абмену. Ізраіль, 13 кастрычніка 2025 году

Абмен праходзіў у два этапы: спачатку ХАМАС вызваліў 7, а потым яшчэ 13 ізраільцаў.

Іх перадалі місіі Чырвонага Крыжу, якая потым перавезла іх у Ізраіль на вайсковую базу, дзе ім акажуць мэдычную дапамогу.

Адзін з вызваленых ізраільскіх закладнікаў, Авінатан Ор (зьлева), ідзе побач з прадстаўніцай ізраільскага войска, 13 кастрычніка 2025

Згодна з пагадненьнем аб спыненьні агню паміж ізраільскімі войскамі і ХАМАС, Ізраіль вызваляе амаль 2000 зьняволеных арабаў.

Аднаго з вызваленых палестынскіх зьняволеных вітаюць у Рамалаху, на Заходнім беразе Ярдану, 13 кастрычніка 2025

Ізраільскія закладнікі і палестынскія зьняволеныя вяртаюцца дадому

13 кастрычніка ХАМАС перадаў Ізраілю ўсіх 20 закладнікаў, якія выжылі, у рамках пагадненьня аб абмене палоннымі і закладнікамі і спыненьні агню. Прэзыдэнт ЗША Дональд Трамп, які дамовіўся аб спыненьні агню, абвясьціў гэты дзень «вялікім днём». На фота вызвалены закладнік Алон Охель вітае тых, хто яго сустракаў.<br> — 1/11 13 кастрычніка ХАМАС перадаў Ізраілю ўсіх 20 закладнікаў, якія выжылі, у рамках пагадненьня аб абмене палоннымі і закладнікамі і спыненьні агню. Прэзыдэнт ЗША Дональд Трамп, які дамовіўся аб спыненьні агню, абвясьціў гэты дзень «вялікім днём». На фота вызвалены закладнік Алон Охель вітае тых, хто яго сустракаў.

2/11 Сваякі і сябры Алона Охеля глядзяць трансьляцыю вызваленьня. Лавон, Ізраіль, 13 кастрычніка 2025.

3/11 Зіў Бэрман, вызвалены закладнік, якога ўтрымлівалі ў Газе ад часу нападу ХАМАС на Ізраіль 7 кастрычніка 2023 году, сядзіць у машыне ў мэдычным цэнтры «Шыба» ў Рамат-Гане, Ізраіль.

4/11 Сярод закладнікаў быў і брат Зіва Бэрмана, Галі. Спыненьне агню і абмен закладнікамі і палоннымі адбыліся пасьля двухгадовай вайны, якая перарасла ў рэгіянальны канфлікт, уцягнуўшы ў яго такія краіны, як Іран, Емэн і Лібан, адначасова паглыбляючы міжнародную ізаляцыю Ізраіля і зьмяняючы сытуацыю на Сярэднім Усходзе.

5/11 Вызвалены ізраільскі закладнік Гай Гільбоа-Далал у Пэтах-Тыкве, Ізраіль. Паводле ізраільскіх зьвестак, падчас нападу ХАМАС на Ізраіль 7 кастрычніка 2023 года загінулі 1200 чалавек, а 251 быў узяты ў закладнікі. Паводле зьвестак органаў аховы здароўя ў кантраляваным ХАМАС Сэктары Газа, у выніку ізраільскіх нападаў на Газу загінулі больш за 67 000 чалавек, у той час як значная частка прыбярэжнага палестынскага анклява была зьнішчана ад пачатку ваеннага адказу Ізраіля на напад ХАМАС 7 кастрычніка 2023 году.

6/11 Вызвалены закладнік Эйтан Абрагам Мор пасьля прыбыцьця ў мэдычны цэнтар імя Рабіна.Эўрапейскі Зьвяз вітаў вызваленьне закладнікаў у Газе, «што стала магчымым дзякуючы прэзыдэнту Трампу».

7/11 Сотні людзей сабраліся на плошчы ў Тэль-Авіве. Радасьць і сьлёзы на вачах у іх выклікала навіна пра тое, што ХАМАС перадаў першых закладнікаў.

8/11 Людзі на плошчы ў Тэль-Авіве пасьля навін аб вызваленьні першых сямі ізраільскіх закладнікаў, 13 кастрычніка 2025.

9/11 Часткай пагадненьня аб спыненьні агню і вызваленьні закладнікаў зьяўляецца вызваленьне амаль 2000 палестынскіх затрыманых і асуджаных зьняволеных з турмаў. Вызвалены палестынскі зьняволены ў аўтобусе ў Рамале, на акупаваным Ізраілем Заходнім беразе ракі Ярдан, пасьля вызваленьня з ізраільскай турмы.

10/11 Людзі сустракаюць вызваленага палестынскага зьняволенага ў Рамале, Заходні бераг ракі Ярдан.

11/11 Вызвалены палестынскі зьняволены абдымае сямейніка пасьля вызваленьня з ізраільскай турмы ў Рамале. У той жа дзень, калі былі вызвалены ізраільскія закладнікі і палестынскія зьняволеныя, у Эгіпце праходзіць саміт па Газе, на якім зьбяруцца больш за 20 лідэраў. Саміт пройдзе пад сустаршыньствам прэзыдэнта ЗША Дональда Трампа і прэзыдэнта Эгіпту Абдэля Фатаха ас-Сісі.

Кібуца Рэім, Ізраіль, 7 кастрычніка 2025

ГЛЯДЗІЦЕ ТАКСАМА:

У Ізраілі прыгадваюць ахвяраў нападу ХАМАС 7 кастрычніка 2023 года

Што папярэднічала

9 кастрычніка Ізраіль і ХАМАС заявілі, што дамовіліся аб спыненьні агню і абмене закладнікамі. 10 кастрычніка ізраільскі кабінэт міністраў ухваліў пагадненьне, якое прадугледжвае вызваленьне ізраільскіх закладнікаў у абмен на арабскіх зьняволеных і пачатак паэтапнага вываду ізраільскіх войскаў з Газы — у адпаведнасьці з ініцыятывай прэзыдэнта ЗША Дональда Трампа ў спыненьні двухгадовай вайны ў Газе.

Лічыцца, што ў Газе ўсё яшчэ жывыя дваццаць ізраільскіх закладнікаў, а 26 лічацца загінулымі. Лёс яшчэ двух невядомы. ХАМАС заявіў, што перадача целаў загінулых можа заняць больш часу за вызваленьне тых, хто яшчэ жывы.

Сьвяткаваньні падпісаньня першага пункту мірнай угоды паміж Ізраілем і ХАМАС, Тэль-Авіў

ГЛЯДЗІЦЕ ТАКСАМА:

Ізраіль і ХАМАС заявілі, што дамовіліся аб спыненьні агню і абмене закладнікамі

Вайна Ізраілю з ХАМАС і «Хэзбалой». Асноўнае

7 кастрычніка 2023 году Ізраіль зазнаў ракетны ўдар з боку сэктару Газа, а баевікі руху ХАМАС прарваліся на тэрыторыю краіны, забіўшы ня менш за 260 удзельнікаў музычнага фэстывалю і захапіўшы сотні закладнікаў. Некаторых людзей расстрэльвалі проста на вуліцах.
Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАС. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
Колькасьць параненых беларусаў на 10 кастрычніка 2023 году — 3 чалавекі. Стан адной з параненых жанчын цяжкі.
10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
Лібанская ўзброеная групоўка «Хэзбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
Ізраіль у лістападзе 2023 году пайшоў у атаку на сэктар Газа і заявіў аб пашырэньні наземнай апэрацыі.
22 лістапада стала вядома, што Ізраіль і ХАМАС у Катары падпісалі пагадненьне аб замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
6 студзеня Ізраіль заявіў пра тое, што поўнач сэктару Газа зачышчаная ад баевікоў ХАМАС.

«Хэзбала» выпусьціла ракеты па Ізраілі на наступны дзень пасьля нападу ХАМАС, у кастрычніку 2023 году. З таго часу абстрэлы на мяжы адбываюцца амаль штодня. Дзясяткі тысяч жыхароў эвакуавалі з прымежных раёнаў з абодвух бакоў.

«Хэзбала» — ваенізаваная групоўка і палітычная партыя, якая кантралюе значную частку паўднёвага Лібану. Злучаныя Штаты лічаць яе тэрарыстычнай арганізацыяй. Эўрапейскі Зьвяз унёс у свой сьпіс такіх арганізацыяў толькі яе ўзброенае крыло, але не палітычную партыю (партыя «Хэзбалы» прадстаўлена ў парлямэнце Лібану). «Хэзбала» таксама ёсьць часткаю так званай іранскай «восі супраціву» — сеткі іранскіх давераных асобаў і падтрыманых Тэгеранам групаў баевікоў, якія выступаюць супраць Ізраілю і ЗША.
Увосень 2024 году рэзка вырасла супрацьстаяньне на ізраільска-лібанскай мяжы. «Хэзбала» атакавала Ізраіль, а ў Тэль-Авіве вырашылі правесьці сэрыю авіяналётаў, каб зьнішчыць атакавальны патэнцыял «Хэзбалы».
23 верасьня Ізраіль распачаў першую з 2006 году наземную апэрацыю на поўдні Лібану, калі пачалася Другая лібанская вайна (Ліпеньская вайна). Апэрацыю назвалі «Стрэлы поўначы».
27 верасьня Ізраіль нанёс магутныя ўдары па Лібане і забіў лідэра «Хэзбалы» Хасана Насралу.
3 кастрычніка Армія абароны Ізраілю паведаміла пра атаку на аб’екты «Хэзбалы» ў Бэйруце.
15 студзеня 2025 году стала вядома пра пагадненьне пра спыненьне агню паміж Ізраілем і ХАМАС, якое павінна пачаць дзейнічаць з 19 студзеня. Ізраільскі бок выпусьціць некалькіх зьняволеных палестынскіх арабаў, а тэрарыстычная групоўка ізраільскіх закладнікаў. Аднак ужо неўзабаве гэты мірны плян правалілі.
8 кастрычніка на пасярэдніцкіх перамовах у Эгіпце два бакі ў чарговы раз дамовіліся пра спыненьне агню. Гэта першая частка годы, распрацаванай адміністрацыяй прэзыдэнта Злучаных Штатаў Дональда Трампа.

Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Тэмы гэтага артыкулу

Форум

Камэнтаваць тут можна праз Disqus. Калі вы ў Беларусі, любы камэнтар можа быць падставай для перасьледу з боку ўладаў.