У апэратыўным камандаваньні Паветраных сілаў Украіны паведамілі, што расейскія войскі нанесьлі камбінаваны ўдар па Ўкраіне з выкарыстаньнем ракет і дронаў.
Найбольш ад абстрэлаў пацярпелі Кіеў і Кіеўская вобласьць, Днепрапятроўская і Івана-Франкоўская вобласьці. Паўсюль ёсьць пацярпелыя.
Паводле прэзыдэнта Ўкраіны Ўладзіміра Зяленскага, у выніку атакі загінулі 2 чалавекі і 15 атрымалі раненьні.
У Расеі заявілі, што «групавы ўдар» нанесьлі па вайсковых аб'ектах Украіны.
У Івана-Франкоўскай вобласьці разбурэньні ў жылым сэктары
У трох раёнах Івана-Франкоўскай вобласьці ў выніку ракетнай і дронавай атакі пацярпела інфраструктура.
«Зафіксавана пападаньне, на жаль, ёсьць пацярпелыя», — напісала ў сваім Telegram-канале кіраўніца абласной дзяржаўнай адміністрацыі Сьвятлана Анішчук.
Паводле яе, у адной зь мясцовых грамад пашкоджаныя жылыя дамы.
Папярэдне паведамілі аб 4 параненых, у тым ліку адным дзіцяці.
У Кіеве адзін чалавек загінуў і 7 атрымалі раненьні
У Кіеве ў выніку расейскіх абстрэлаў пацярпелі пяць раёнаў — Дняпроўскі, Саломенскі, Шаўчэнкаўскі, Дарніцкі і Сьвятошынскі. Трывога працягвалася амаль 10 гадзін.
«У выніку варожай атакі на сталіцу адзін чалавек загінуў, 9 пацярпелі, у тым ліку 15-гадовая дзяўчына. Шпіталізавалі пяцёх пацярпелых», — паведаміў мэр украінскай сталіцы Віталь Клічко.
Пацярпелі жылыя дамы, гаспадарчыя і складзкія памяшканьні, пашкоджаны ўваход на станцыю мэтро «Лук’янаўская».
У Кіеўскай вобласьці, паводле папярэдніх паведамленьняў, пацярпелых няма. У двух раёнах вобласьці — Фастаўскім і Вышгарадзкім — пашкоджаныя жылыя дамы.
У Днепрапятроўскай вобласьці — без параненых і ахвяраў, пацярпела інфраструктура
У ноч на 21 ліпеня ад абстрэлаў пацярпелі Нікапальская, Марганецкая, Чырвонагрыгораўская і Сінельнікаўская грамады.
Паводле абласных уладаў, пацярпелых няма. Пашкоджана інфраструктура, АЗС, прадпрыемства, пяць аўтамабіляў.
У Харкаўскай вобласьці ад абстрэлаў пацярпелі абласны цэнтар і 10 населеных пунктаў рэгіёну
Паводле абласных уладаў, пацярпелі 7 чалавек.
Для абстрэлаў расейскія войскі выкарысталі 42 авіяракеты і 37 дронаў розных тыпаў.
У Харкаве пашкоджаны адміністрацыйны будынак, шматпавярховы жылы дом, дарогі і трамвайныя драты.
У прылеглых раёнах пашкоджаныя дзясяткі жылых дамоў, электрасеткі, чыгуначная станцыя і база адпачынку.
Украіна прапанавала Расеі правесьці трэці раўнд перамоваў
Прэзыдэнт Украіны Ўладзімір Зяленскі заявіў аб працягу перамоваў з Расеяй аб новым абмене палоннымі.
«Сакратар РНБА Ўмераў далажыў, што прапанаваў расейскаму боку наступную сустрэчу на наступным тыдні. Перамоўную дынаміку трэба нарошчваць. Трэба рабіць усё, каб дасягнуць прыпыненьня агню. І расейскі бок павінен перастаць хавацца ад рашэньняў», — паведаміў украінскі прэзыдэнт.
Уладзімір Зяленскі таксама заявіў аб неабходнасьці сустрэчы з расейскім прэзыдэнтам Уладзімірам Пуціным, «каб рэальна забясьпечыць мір, сапраўды трывалы».
«Украіна гатовая да такой сустрэчы», — падкрэсьліў украінскі прэзыдэнт.
Украінскія СМІ пішуць, што новы раўнд перамоваў можа адбыцца 23–24 ліпеня.
Раней прадстаўнікі расейскай улады заяўлялі, што накіроўвалі Ўкраіне прапановы наконт новага раўнду перамоў, але ўкраінскі бок нібыта не рэагаваў на такія прапановы.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум