ААН: 232 цывільныя жыхары загінулі ва Ўкраіне ў чэрвені; гэта найвышэйшы паказьнік за тры гады

Наступствы расейскага ўдару па Кіеве, 10 ліпеня 2025 году
Наступствы расейскага ўдару па Кіеве, 10 ліпеня 2025 году

У чэрвені Ўкраіна зафіксавала найбольш ахвяраў сярод мірнага насельніцтва за тры гады: 232 чалавекі загінулі і 1343 атрымалі раненьні. Пра гэта гаворыцца ў дакладзе місіі ААН у маніторынгу правоў чалавека ва Ўкраіне, апублікаваным 10 ліпеня.

Паводле зьвестак місіі, у чэрвені 2025 года Расейская Фэдэрацыя ўчыніла ў дзесяць разоў больш ракетных удараў і нападаў з выкарыстаньнем дронаў-самагубцаў, чым у чэрвені 2024 году. Практычна ніводзін рэгіён Украіны ня быў бясьпечным незалежна ад адлегласьці ад лініі фронту: цывільныя жыхары былі забітыя або параненыя як мінімум у 16 вобласьцях і Кіеве.

«Цывільныя жыхары ўва ўсёй Украіне сутыкаюцца з пакутамі маштабу, якога ня бачылі больш за тры гады. Рост колькасьці ракетных удараў далёкага радыюсу дзеяньня і нападаў бесьпілётнікаў прывёў да яшчэ большай колькасьці сьмерцяў цывільных жыхароў у раёнах, далёкіх ад лініі фронту», — заявіла кіраўніца місіі Даніель Бэл.

Місія ААН таксама пацьвярджае «тэндэнцыю пагаршэньня» — «і ў першай палове 2025 году агульная колькасьць сьмерцяў і раненьняў сярод цывільных жыхароў склала 6754 чалавекі, што на 54% больш за аналягічны пэрыяд 2024 году, калі была зафіксаваная 4381 ахвяра».

З пачатку поўнамаштабнага ўварваньня Расеі ва Ўкраіну 24 лютага 2022 году місія ААН задакумэнтавала як мінімум 13 580 сьмерцяў цывільных жыхароў, у тым ліку 716 дзяцей, а таксама 34 115 параненых цывільных жыхароў, у тым ліку 2173 дзяцей.


​
XS
SM
MD
LG