Раённы суд Санкт-Пецярбургу спыніў вядзеньне справы ў дачыненьні да музэю «Эрарта» з прычыны заканчэньня тэрміну даўнасьці прыцягненьня да адміністрацыйнай адказнасьці, паведамілі РБК у аб'яднанай прэс-службе судоў гораду.
Пратакол аб «дэманстрацыі нацысцкай сымболікі» ў дачыненьні да музэю сучаснага мастацтва «Эрарта» ў Пецярбургу склалі ў сярэдзіне ліпеня. Падставай стала графіці «Жыве Беларусь!» пад карцінай беларускага мастака «Фэстываль».
На карціне былі намаляваныя людзі, якія танцуюць у народных строях на сцэне, перад якой стаяць падобныя да целаахоўнікаў мужчыны ў чорным адзеньні. Як мяркуецца, надпіс — частка экспазыцыі.
Паліцэйскія экспэрты вырашылі, што лёзунг «Жыве Беларусь» быў сымбалем 13-га Беларускага паліцэйскага батальёна пры СД (службы бясьпекі райхсфюрэра СС) і 30-й грэнадэрскай (пяхотнай) дывізіі Вафэн-СС, нароўні з нацысцкім партыйным прывітаньнем.
Музэю пагражаў штраф да 50 тысяч расейскіх рублёў (каля 1800 беларускіх).
- Аўтарам лёзунгу «Жыве Беларусь» лічыцца клясык беларускай літаратуры Янка Купала. Гэтыя словы прысутнічаюць у адным зь ягоных вершаў, напісаным у 1907 годзе. Яшчэ да Першай сусьветнай вайны лёзунг займеў папулярнасьць у асяродзьдзі беларускай нацыянальнай інтэлігенцыі.
- Падчас Другой сусьветнай вайны лёзунг «Жыве Беларусь» выкарыстоўвалі ня толькі калябарацыяністы, але і атрады савецкіх партызан і падпольны друк. Нават у савецкія часы выкарыстоўвалася яго трансфармаваная форма — «Няхай жыве Савецкая Беларусь».
- Пасьля прыходу да ўлады Аляксандра Лукашэнкі лёзунг перасталі выкарыстоўваць дзяржаўныя ўстановы, тым часам ён набыў папулярнасьць сярод прыхільнікаў беларускай апазыцыі.
Форум