Наступствы ўдару па НПЗ у Бранскай вобласьці ў студзені 2024 году. Архіўнае фота
Раней украінскія бесьпілётнікі ўжо атакавалі аб’екты ў аддаленых ад Украіны рэгіёнах — Валагодзкай, Ніжагародзкай абласьцях і ў Татарстане.
Украінскія бесьпілётнікі ў ноч на 9 траўня пацэлілі ў дзьве перавалачныя нафтабазы каля Анапы ў Краснадарскім краі Расеі.
«Гэта была пасьпяховая апэрацыя ўдарных бесьпілётнікаў СБУ. Гэтыя нафтабазы зьяўляюцца перавалачнымі для забесьпячэньня палівам расейскіх войскаў у Крыме, паколькі знаходзяцца недалёка ад паўвострава», — паведаміла ўкраінская служба Радыё Свабода з спасылкай на інфармаваную крыніцу.
Раней у апэратыўным штабе Краснадарскага краю заяўлялі пра атаку на нафтабазу пад Анапай у ноч на 9 траўня. Паведамлялі аб шасьці дронах і пажары, у выніку якога пашкоджаньні атрымалі некалькі рэзэрвуараў.
Удзень 9 траўня ўлады Башкартастану паведамілі аб пажары на прадпрыемстве «Салаватнефтеоргсинтез», які належыць кампаніі «Газпром».
«Бесьпілётнік атакаваў прамзону горада Салават, пасьля якой адбылося задымленьне ў раёне адной з установак прадпрыемства „Газпром нефтехим Салават“. Прадпрыемства працуе ў штатным рэжыме», — працытавала кіраўніка Башкартастану Радзія Хабарава расейская служба Радыё Свабода.
Гэта першае такое здарэньне ў Башкартастане з пачатку вайны ва Ўкраіне. Афіцыйна расейскія ўлады пакуль не сьцьвярджаюць, што дрон быў украінскім. Ад мяжы Ўкраіны да Башкартастану больш за 1000 кілямэтраў. Раней украінскія бесьпілётнікі ўжо атакавалі аб’екты ў аддаленых ад Украіны рэгіёнах — Валагодзкай, Ніжагародзкай абласьцях і ў Татарстане.
Форум