Судзьдзя Трэйсі Портэр адмяніла рашэньне выбарчай камісіі штату, якая дапусьціла Трампа да ўдзелу ў выбарах, вырашыўшы, што былы прэзыдэнт ЗША страціў права займаць дзяржаўную пасаду з прычыны датычнасьці да спробы мяцяжу. Пры гэтым судзьдзя адклала выкананьне гэтага рашэньня на некалькі дзён, даўшы Трампу магчымасьць апэляваць гэтае рашэньне ў судзе вышэйшай інстанцыі.
Першасныя выбары ў Ілінойсе адбудуцца 19 сакавіка.
Прадстаўнік Дональда Трампа зрабіў заяву, у якой абвінаваціў судзьдзю ў палітычнай перадузятасьці, падкрэсьліўшы, што яе рашэньне супярэчыць высновам, зробленым судамі і выбарчымі камісіямі ў многіх штатах. Ён заявіў пра намер абскардзіць гэтае рашэньне.
- Ілінойс стаў трэцім штатам, які паспрабаваў выключыць імя Дональда Трампа з выбарчых бюлетэняў. Раней такое рашэньне прыняў Вярхоўны суд Каларада і дзяржаўны сакратар штату Мэн.
- Дональд Трамп аспрэчыў гэтыя рашэньні, і Вярхоўны суд ЗША павінен неўзабаве вынесьці рашэньне аб канстытуцыйнасьці пастановы суду ў Каларада. На час разгляду апэляцый імя былога прэзыдэнта застаецца ў выбарчых бюлетэнях. Рашэньне Вярхоўнага суду ЗША стане апошнім словам у спрэчках аб тым, ці можна прымяніць канстытуцыйную забарону на заняцьце дзяржаўных пасадаў людзям, якія бралі ўдзел у антыдзяржаўным мяцяжы, у дачыненьні да Трампа.
- Дональд Трамп цяпер зьяўляецца найбольш верагодным кандыдатам ад Рэспубліканскай партыі на выбарах у лістападзе 2024 году, адзначае ВВС.
