Пасьля прызначэньня швэдзкай прадстаўніцы пры беларускай дэмакратычнай супольнасьці за мяжой амбасадаркі Крыстыны Юганэсан паміж афіцыйным Менскам і Стакгольмам узьнік дыпляматычны скандал.
Як паведамілі Свабодзе ў прэсавай службе МЗС Швэцыі, «цяпер у Стакгольме для кансультацыяў знаходзіцца часовы павераны ў справах Швэцыі ў Менску. Праца ў амбасадзе Швэцыі ў Менску працягваецца ў звычайным рэжыме. Цяпер у Менску для кансультацыяў знаходзіцца пасол Беларусі ў Стакгольме».
Амбасадарам Беларусі ў Швэцыі акрэдытаваны Дзьмітры Мірончык.
З 5 верасьня 2022 году Эва Сундквіст выконвае абавязкі часовага паверанага ў справах Швэцыі, кіраўніка місіі ў Менску.
6 лістапада ў Вільні міністар замежных справаў Швэцыі Тубіяс Більстрэм абвясьціў аб прызначэньні Крыстыны Юганэсан, якая раней працавала амбасадаркай Швэцыі ў Менску, дыпляматычнаю прадстаўніцаю пры беларускай дэмакратычнай супольнасьці за мяжой.
У той жа дзень у інтэрвію Свабодзе Тубіяс Більстрэм заявіў, адказваючы на пытаньне, ці прызнае ён Сьвятлану Ціханоўскую абраным прэзыдэнтам:
«Мы прызнаём яе чалавекам, які перамог на выбарах і які па праве павінен быў стаць інаўгураваным прэзыдэнтам Беларусі».
Паводле інфармацыі Свабоды з дыпляматычных крыніц у Менску, гэта выклікала незадавальненьне ўладаў Беларусі, якія адклікалі свайго амбасадара з Стакгольму і запатрабавалі, каб у сталіцу Швэцыі для кансультацыяў паехаў кіраўнік дыпляматычнай місіі гэтай краіны ў Менску.
У замежнапалітычным ведамстве Швэцыі Свабодзе таксама паведамілі, што пасьля новага прызначэньня Крыстыны Юганэсан МЗС Швэцыі правёў перамовы зь беларускімі прадстаўнікамі.
«У нас няма канкрэтных рэакцый, каб падзяліцца», — паведамілі ў прэс-службе Міністэрства замежных справаў Швэцыі.
