«На патрабаваньне Міжнароднай фэдэрацыі нам давялося цалкам замяняць форму, мы замовілі пашыў шэрых камбінэзонаў, замовілі шэрыя спартовыя касьцюмы», — распавёў Віталь Крэйдзіч у эфіры дзяржаўнага тэлеканалу «Беларусь 5».
Паводле яго, ніякіх «значкоў, проста адзнак на форме не дапускалася; ніякага гімну ў выпадку перамогі, замест яго была заплянаваная, нібыта 3-я сымфонія Бэтховена».
Паводле Крэйдзіча, удалося толькі ўгаварыць Міжнародную фэдэрацыю цяжкай атлетыкі зьмякчыць патрабаваньні да абутку: ён таксама мусіў быць шэрым, «але абутак падобнага колеру фірмы не вырабляюць». Таксама беларускаму атлету Эдуарду Зязюліну «ў выглядзе выключэньня дазволілі выступаць у чорным колеры, бо шэрых камбінэзонаў і цішотак на ягоны памер проста ніхто ня робіць».
На чэмпіянаце сьвету ў Савудаўскай Арабіі, які прайшоў у верасьні, беларусы заваявалі адзін мэдаль: трэцяе месца заняў Яўген Ціханцоў у вагавой катэгорыі да 102 кг.
- 28 лютага 2022 году, празь некалькі дзён пасьля пачатку вайны, Міжнародны алімпійскі камітэт заклікаў спартовыя фэдэрацыі не дапускаць да спаборніцтваў атлетаў з Расеі і Беларусі. Гэтая рэкамэндацыя была неадкладна і масава прынятая да выкананьня, у выніку чаго расейскі і беларускі спорт апынуліся амаль у поўнай ізаляцыі.
- 25 студзеня 2023 году выканкам МАК пацьвердзіў санкцыі, уведзеныя ў дачыненьні да Беларусі і Расеі з-за вайны супраць Украіны, аднак зазначыў, што ніводнаму спартоўцу нельга забараняць удзельнічаць у спаборніцтвах «толькі з-за яго пашпарта».
- 28 сакавіка МАК выпусьціў заяву, у якой рэкамэндаваў міжнародным фэдэрацыям па відах спорту дазволіць беларусам і расейцам удзельнічаць у міжнародных спаборніцтвах пры выкананьні шэрагу ўмоваў. Беларускія і расейскія атлеты могуць спаборнічаць «у якасьці індывідуальных нэўтральных спартоўцаў» (без выкарыстаньня сьцяга, гімна і іншай сымболікі сваіх дзяржаў) і толькі ў тым выпадку, калі яны «актыўна не займаліся падтрымкай баявых дзеяньняў» і не маюць дзейных кантрактаў з сілавымі і ваеннымі ведамствамі сваіх краін.
- Міжнародная фэдэрацыя цяжкай атлетыкі (IWF) дапусьціла беларусаў і расейцаў на турніры пад сваёй эгідай са шматлікімі абмежаваньнямі. Беларускі бок зь імі пагадзіўся з умовамі, у адрозьненьне ад расейскага.
