Сьвятар Херсонскай эпархіі Ўкраінскай праваслаўнай царквы Маскоўскага патрыярхату, якога падазраюць у незаконным гандлі агнястрэльнай зброі і боепрыпасаў, знаходзіцца пад вартай ужо больш за месяц.
Ён зьяўляецца грамадзянінам Украіны, але нарадзіўся ў Беларусі, у горадзе Гомлі. Гэта стала вядома, калі ягоны адвакат спрабаваў абскардзіць трыманьне пад вартай з магчымым вызваленьнем пад заклад у памеры 214 720 грыўняў (амаль 6 тысяч даляраў у эквіваленце. — РС).
Сьвятара затрымалі 23 верасьня 2023 году ў часе спробы прадаць два пераносныя зэнітна-ракетныя комплексы «Ігла» і боепрыпасы да іх за 111 тысяч грыўняў (прыблізна 3 тысячы даляраў у эквіваленце. — РС).
Праз тры дні пасьля яго затрыманьня канцылярыя Херсонскага эпархіяльнага ўпраўленьня паведаміла, што ераманах Віктар (Інякін) «забаронены ў сьвяшчэннаслужэньні». Так стала вядомым і ягонае імя.
«Херсонская эпархія УПЦ рашуча асуджае дзеяньні ераманаха Віктара (Інякіна), якія зьяўляюцца грахом перад Богам і злачынствам перад дзяржавай і якія дыскрэдытуюць царкву, сеюць спакусу ў грамадзтве і могуць выкарыстоўвацца ў правакацыйных мэтах», — адзначалася ў паведамленьні Херсонскай эпархіі УПЦ.
Праваахоўныя органы паведамілі, што зброю, якая засталася пасьля адступленьня расейскіх войскаў, сьвятар захоўваў на тэрыторыі храма, на які ён зьбіраў грошы ў вернікаў. Сярод арсэналу сьледчыя знайшлі яшчэ зарады для гранатамётаў, кулямёт і аўтамат Калашнікава з камплектнымі часткамі, баявыя гранаты і амаль 7 тысяч патронаў да аўтаматычнай зброі.
Сьвятару пагражае да 7 гадоў пазбаўленьня волі.
Вярхоўная Рада Ўкраіны на пасяджэньні 19 кастрычніка ўхваліла ў першым чытаньні законапраект аб забароне рэлігійных арганізацый, зьвязаных з Расеяй.
Цяпер гэты дакумэнт будуць рыхтаваць да разгляду ў другім чытаньні. Гэты законапраект датычыць і Праваслаўнай царквы, якая дзейнічае ва Ўкраіне і кіруецца Маскоўскім патрыярхатам.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.