Эрдаган заклікаў краіны Захаду разгледзець патрабаваньні Расеі, паведамляе «Голас Амэрыкі» са спасылкай на турэцкія тэлеканалы.
«Скасаваньне ўгоды па чарнаморскім збожжы будзе мець шэраг наступстваў, пачынаючы ад росту сусьветных цэнаў на прадукты харчаваньня і заканчваючы іх дэфіцытам у пэўных рэгіёнах, што, магчыма, прывядзе да новых хваляў міграцыі», — сказаў Эрдаган журналістам, вяртаючыся на самалёце з паездкі па краінах Пэрсыдзкай затокі.
«Я лічу, што, грунтоўна абмеркаваўшы гэтае пытаньне з прэзыдэнтам Пуціным, мы зможам забясьпечыць працяг гэтай гуманітарнай дзейнасьці», — дадаў Эрдаган.
На гэтым тыдні Расея выйшла з угоды, заключанай пры пасярэдніцтве ААН і Турэччыны, якая дазваляла бясьпечна экспартаваць украінскае збожжа па Чорным моры ўвесь мінулы год. Расея таксама анулявала гарантыі бясьпечнай навігацыі. З таго часу з украінскіх партоў не выходзіла ніводнае судна.
Масква заяўляе, што вернецца да пагадненьня толькі ў тым выпадку, калі будуць задаволеныя яе патрабаваньні па аблягчэньні доступу на сусьветныя рынкі яе ўласных прадуктаў харчаваньня і ўгнаеньняў. Заходнія краіны запэўніваюць, што ў Расеі не было праблем з продажам прадуктаў харчаваньня, на якія не распаўсюджваюцца санкцыі.
У пятніцу Расея чацьвёрты дзень запар наносіла ўдары па ўкраінскіх аб’ектах экспарту харчаваньня і практыкавалася ў захопе суднаў у Чорным моры, нагнятаючы сытуацыю такім чынам, які заходнія лідэры называюць «спробай пазьбегнуць санкцый, пагражаючы глябальным харчовым крызісам».
Эрдаган паўтарыў ранейшыя заўвагі пра тое, што спадзяецца, што Пуцін наведае Турэччыну ў жніўні.
19 ліпеня Міністэрства абароны Расеі заявіла: «У сувязі са спыненьнем функцыянаваньня „чарнаморскай ініцыятывы“ і згортваньнем марскога гуманітарнага калідора, з 00:00 маскоўскага часу 20 ліпеня 2023 г. усе судны, якія рухаюцца ў акваторыі Чорнага мора ва ўкраінскія парты, будуць разглядацца як патэнцыйныя перавозчыкі грузаў вайсковага прызначэньня».
У сваю чаргу, Міністэрства абароны Ўкраіны заявіла 20 ліпеня ў адказ на дэмарш МА РФ, што Ўкраіна будзе разглядаць усе судны ў Чорным моры, якія ідуць у расейскія парты ці часова акупаваныя РФ украінскія парты, як судны, што перавозяць грузы вайсковага прызначэньня.
21 ліпеня Расея ўнесла папраўкі ў сваю пазыцыю. «Расея будзе разглядаць усе судны, якія ідуць па акваторыі Чорнага мора, як носьбіты вайсковых грузаў, аднак, перш чым рабіць якія-небудзь захады, будзе рабіць адгляд гэтых суднаў», — прыводзіць Інтэрфакс словы намесьніка кіраўніка МЗС РФ Сяргея Вяршыніна.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.