Лінкі ўнівэрсальнага доступу

Ціханоўская чакае адказу ўкраінскага боку наконт магчымасьці наведаць краіну


Сьвятлана Ціханоўская
Сьвятлана Ціханоўская

Усьведамленьне, што з Аляксандрам Лукашэнка немагчыма дамовіцца і мець справы, прыходзіць да ўкраінскага боку, заявіў галоўны дарадца дэмакратычнага лідэра Сьвятланы Ціханоўскай Франак Вячорка падчас онлайн-сустрэчы з валянтэрамі Офіса палітыка.

Адказваючы на пытаньне, ці наведае Ціханоўская калі-небудзь Украіну, дэмакратычная лідэрка нагадала, што прадстаўнікі Аб’яднанага пераходнага кабінэта «гатовыя прыяжджаць у Кіеў, ва Ўкраіну — і езьдзяць туды».

«Што тычыцца асабіста мяне, я агучыла пазыцыю сваю для ўкраінскага боку: я гатовая прыехаць у любы момант. Для мяне важна сустрэцца з нашымі добраахвотнікамі, з нашымі героямі, і ўрад Украіны ведае пра гэты намер. Мы проста чакаем адказу з таго боку. Калі яны будуць гатовыя, я абавязкова туды прыеду», — адзначыла дэмакратычная лідэрка.

Вячорка дадаў, што ўвесь 2022 год украінскія палітыкі пазьбягалі кантактаў, «бо думалі, што калі ня будуць сустракацца зь Ціханоўскай, Лукашэнка ня будзе дапамагаць Пуціну, тады паўночная лінія мяжы будзе ў бясьпецы».

«Зараз яны зразумелі, што гэтая палітыка не зусім працуе. Лукашэнка ўсё роўна дапамагае Пуціну, усё роўна правакуе Ўкраіну, усё роўна разьмяшчае зброю, вагнэраўцаў», — сказаў Вячорка.

Ён адзначыў, што з украінскага боку адчуваецца пацяпленьне адносінаў: Зяленскі некалькі разоў у пазытыўным ключы згадаў беларусаў за апошнія месяцы. «І гэтыя мэсыджы, якія праходзяць у палітыкаў — станоўчыя, яны гатовыя супрацоўнічаць», — адзначыў дарадца.

«Украінцы пытаюцца: а што канкрэтна вы робіце, беларусы? Яны ж ня ведаюць, ня бачаць, да іх не даходзяць нашыя навіны», — падкрэсьліў ён, адзначыўшы, што важна расказваць украінцам, «што мы робім, пра кожнае добрае дзеяньне для Ўкраіны, якое беларусы робяць».

Хто такая Сьвятлана Ціханоўская

Сьвятлана Ціханоўская — беларускі палітык, былая кандыдатка ў прэзыдэнты Беларусі. Цяпер знаходзіцца ў Літве.

Сьвятлана Ціханоўская
Сьвятлана Ціханоўская
  • Сьвятлана Ціханоўская нарадзілася ў 1982 годзе ў Мікашэвічах (Берасьцейская вобласьць).
  • 15 траўня 2020 году пасьля адмовы Цэнтральнай выбарчай камісіі зарэгістраваць мужа Сьвятланы, зьняволенага лідэра кампаніі «Страна для жизни» блогера Сяргея Ціханоўскага, Сьвятлана ад свайго імя падала дакумэнты на рэгістрацыю ініцыятыўнай групы. 20 траўня яе групу зарэгістравалі. 29 траўня кіраўніка яе выбарчага штабу Сяргея арыштавалі зноў.
  • Кандыдаткай у прэзыдэнты Ціханоўскую зарэгістравалі 14 ліпеня 2020.
  • Пасьля арышту прэтэндэнта на пасаду прэзыдэнта Віктара Бабарыкі і ўцёкаў за мяжу яшчэ аднаго прэтэндэнта Валера Цапкалы іх штабы аб’ядналіся з штабам Сьвятланы Ціханоўскай. Аб’яднаны штаб правёў пасьпяховую выбарчую кампанію з шматтысячнымі мітынгамі ў вялікіх і малых гарадах Беларусі пад бел-чырвона-белымі сьцягамі.
  • Паводле афіцыйных зьвестак ЦВК, на выбарах Сьвятлана Ціханоўская набрала 10,09%, а Аляксандар Лукашэнка — 80,08%. Ціханоўская адмовілася прызнаць гэтыя вынікі і 10 жніўня асабіста накіравалася ў ЦВК, каб іх абскардзіць.
  • З ЦВК палітык не вярнулася. Сувязь зь ёю зьнікла, празь некалькі гадзін у вэстыбюлі ЦВК яна паведаміла, што «прыняла рашэньне» і зьехала ў невядомым кірунку. 11 жніўня стала вядома, што яна ў Літве. Былі апублікаваныя два відэазвароты Ціханоўскай, адзін зь якіх быў запісаны ў ЦВК пасьля размовы з двума высокапастаўленымі сілавікамі, у ім Ціханоўская заклікае дэманстрантаў не выходзіць на вуліцы. Кіраўніцтва Літвы 11 жніўня заявіла, што звароты Ціханоўская запісала пад ціскам і шантажом.
  • Празь некалькі дзён пасьля фактычнай «дэпартацыі» ў Літву Сьвятлана Ціханоўская заявіла, што бярэ на сябе ролю «нацыянальнага лідэра».
  • 18 жніўня з ініцыятывы Сьвятланы Ціханоўскай у Беларусі была створаная Каардынацыйная рада для транзыту ўлады.
  • 10 верасьня 2020 Сэйм Літвы прагаласаваў за прызнаньне Сьвятланы Ціханоўскай абраным кіраўніком Беларусі.
  • Ад верасьня 2020 году Ціханоўская наведала з працоўнымі візытамі дзясяткі краін сьвету і сустрэлася зь іх лідэрамі. Сярод іх прэзыдэнт Францыі Эманюэль Макрон, канцлер Нямеччыны Ангела Мэркель, высокі прадстаўнік ЭЗ Жузэп Бурэль, прэзыдэнт ЗША Джо Байдэн ды інш.
  • Сьвятлана Ціханоўская кантактавала з актыўнымі людзьмі ў Беларусі падчас пратэстаў 2020 і 2021 гадоў, прызначыла сваіх прадстаўнікоў для падтрыманьня лучнасьці з сацыяльнымі і прафэсійнымі групамі ў краіне.
  • Ціханоўская выступіла за правядзеньне ў Беларусі новых празрыстых прэзыдэнцкіх выбараў пры міжнародным кантролі і актыўна заклікала міжнародную супольнасьць да ўдзелу ў арганізацыі перамоваў зь цяперашнім кіраўніцтвам Беларусі.
  • За два гады Ціханоўская, яе штаб і зьвязаныя з ёй ініцыятывы дапамагалі палітвязьням, выступалі з шэрагам гуманітарных і палітычных ініцыятываў.
  • Яна выступала супраць сфальшаванага канстытуцыйнага рэфэрэндуму, ініцыяванага Лукашэнкам у 2022 годзе.
  • У лютым 2022 Ціханоўская асудзіла расейскую агрэсію супраць Украіны і саўдзел у ёй рэжыму А. Лукашэнкі, у сакавіку 2022 году стварыла беларускі Антываенны рух.
  • У красавіку 2022 году Ціханоўская на канфэрэнцыі Рады Бясьпекі ААН заявіла, што «поўдзень Беларусі фактычна знаходзіцца пад расейскай акупацыяй».
  • Ціханоўская правяла пасьпяховыя перамовы з урадам Польшчы і дамаглася асаблівых умоваў для прыезду і легалізацыі беларусаў, ня згодных з рэжымам Лукашэнкі.
  • У жніўні 2022 году Сьвятлана Ціханоўская стварыла Аб’яднаны пераходны кабінэт, назвала чатырох сваіх прадстаўнікоў.
  • У лістападзе 2022 Ціханоўская ўпершыню назвала сябе прэзыдэнтам-электам

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG