«Шмат важных пытаньняў: апэратыўная сытуацыя ў вобласьці, якая склалася ў выніку катастрофы, эвакуацыя насельніцтва з патэнцыйных зон затапленьня, ліквідацыя надзвычайнай сытуацыі, выкліканай падрывам дамбы, арганізацыя жыцьцядзейнасьці затопленых тэрыторый», — паведаміў Уладзімір Зяленскі ў сваім тэлеграм-канале.
Украінскі прэзыдэнт лічыць важным падлічыць магчымыя страты і выдзеліць пацярпелым грамадзянам і прадпрыемствам кампэнсацыю.
Як на Херсоншчыне ратуюць людзей і жывёл ад паводкі пасьля разбурэньня дамбы Кахоўскай ГЭС. ФОТА
У Херсоне Ўладзімір Зяленскі наведаў пераправу, празь якую вывозяць грамадзян з затопленых тэрыторый.
«Наша задача — максымальна абараніць жыцьцё і дапамагчы людзям. Дзякую ратавальнікам і валянтэрам. Дзякую ўсім, хто далучыўся да гэтай працы», — заявіў Зяленскі.
Украінскі бок не паведамляе колькасьці загінулых ці пацярпелых у выніку затапленьня падкантрольных населеных пунктаў пасьля зьнішчэньня Кахоўскай дамбы.
Расейскія акупацыйныя ўлады паведамілі аб мінімум пяці загінулых і 71 шпіталізаваным у захопленай і затопленай Кахоўцы. Вядома яшчэ пра нібыта траіх загінулых жыхароў гораду Алешкі. Аднак спраўдзіць гэтую інфармацыю немагчыма праз адсутнасьць доступу незалежных журналістаў на месца.
Аб разбурэньні Кахоўскай дамбы стала вядома 6 чэрвеня. Расея і Ўкраіна абмяняліся ўзаемнымі абвінавачаньнямі ў яе падрыве.
Кахоўская ГЭС — ніжняя прыступка Дняпроўскага каскаду электрастанцый. Знаходзіцца ў Херсонскай вобласьці. Яе ўзводзілі шэсьць гадоў, пачынаючы з 1950 году. Цяпер станцыя не вырабляе электраэнэргіі і, адпаведна, не працуе ў складзе ўкраінскай энэргасыстэмы. У 2020 годзе ўрад Украіны ўхваліў рашэньне аб далейшай разбудове станцыі і будаўніцтве Кахоўскай ГЭС-2, але з прычыны вайны рэалізацыя праекту так і не пачалася.
Раней «Укргідроенерго» паведамляла, што Расея стварыла на ГЭС сваю вайсковую базу. Гідраэлектрастанцыя знаходзіцца за 5 км ад Новай Кахоўкі, таксама акупаванай расейцамі.
