Выведка Вялікай Брытаніі: парад паказаў праблемы арміі Расеі падчас вайны
Выведка Міністэрства абароны Вялікай Брытаніі лічыць, што праведзены 9 траўня на Краснай плошчы ў Маскве вайсковы парад прадэманстраваў праблемы, зь якімі сутыкаецца расейская армія праз 15 месяцаў вайны ва Ўкраіне.
Найперш, паводле брытанскай выведкі, гэта нястача матэрыяльна-тэхнічнага забесьпячэньня і стратэгічнай камунікацыі.
«У парадзе ўзялі ўдзел больш за 8000 вайскоўцаў, але большасьць складалі дапаможныя, ваенізаваныя сілы і курсанты вайсковых навучальных устаноў. Адзіным асабовым складам з разгорнутых фармаваньняў рэгулярных сіл былі кантынгенты чыгуначных войскаў і вайсковай паліцыі», — адзначаецца ў паведамленьні.
Паводле брытанскай выведкі, адзіным танкам на парадзе стаў старадаўні Т-34 з параднай часткі.
«Нягледзячы на вялікія страты ва Ўкраіне, Расея магла выставіць больш бранятэхнікі. Пэўна, улады ўстрымаліся ад гэтага, таму што хочуць пазьбегнуць унутранай крытыкі наконт прыярытэту парадаў над баявымі дзеяньнямі», — мяркуюць у вайсковай выведцы Вялікай Брытаніі.
Інстытут вывучэньня вайны: Крэмль спрабаваў кансалідаваць сваіх хаўрусьнікаў
Экспэрты амэрыканскага Інстытуту вывучэньня вайны (ISW) таксама мяркуюць, што прадэманстраваная на парадзе ў Маскве вайсковая тэхніка сьведчыць аб дэградацыі расейскай арміі.
Паводле іх, на гэтым тле расейскі прэзыдэнт Уладзімір Пуцін спрабаваў падрыхтаваць грамадзтва да зацяжной вайны ва Ўкраіне і зрабіць з Расеі вобраз адзінай краіны, якая «пасьпяхова супрацьстаіць усяму Захаду».
«Пуцін таксама паспрабаваў выкарыстаць сьвяткаваньне Дня Перамогі, каб згуртаваць партнэраў па СНД, многія зь якіх зь лютага 2022 году імкнуліся паменшыць сваю залежнасьць ад Крамля. Пуцін падкрэсьліў важнасьць прысутнасьці лідэраў СНД на мерапрыемстве і паўтарыў шаблённую крамлёўскую рыторыку аб тым, што Расея імкнецца да шматпалярнага сьветапарадку», — адзначаецца ў справаздачы Інстытуту вывучэньня вайны.
У той жа час экспэрты зьвярнулі асобную ўвагу на тое, што Аляксандар Лукашэнка па вяртаньні з Масквы ня выступіў са сваім традыцыйным зваротам на сьвяткаваньні ў Менску, «хоць незразумела, чаму».
У справаздачы ISW адзначаецца, што Расеі не ўдалося стварыць антызаходнюю кааліцыю, а Кітай усё больш дыстанцыецца ад Расеі.
«Дэградацыя расейскай ваеннай моцы ва Ўкраіне, падобна, зрабіла гэтыя расейскія намаганьні яшчэ менш прывабнымі для іншых дзяржаў», — перакананыя экспэрты Інстытуту вывучэньня вайны.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.