У наступны сьпіс санкцый прапануюць уключыць
- Уладзімера Марозава, начальніка Беларускай чыгункі. Ён, як сьцьвярджаецца, падтрымліваў разгортваньне і транспартаваньне расейскага вайсковага пэрсаналу і тэхнікі, якія ўдзельнічалі ў агрэсіўнай вайне Расеі супраць Украіны, таму нясе адказнасьць за падтрымку і рэалізацыю дзеяньняў і палітыкі, якія падрываюць і пагражаюць тэрытарыяльнай цэласнасьці, сувэрэнітэту і незалежнасьці Ўкраіны.
- Дзьмітрыя Пантуса, старшыню Дзяржаўнага ўпраўленьня вайсковай прамысловасьці Беларусі. Гэтае ўпраўленьне распрацоўвае і абслугоўвае ўзбраеньне, садзейнічае вытворчасьці зброі падведамаснымі прадпрыемствамі, забясьпечвае вайскова-прамысловую каапэрацыю, ажыцьцяўляе нагляд за перамяшчэньнем зброі празь дзяржаўную мяжу і забясьпечвае навігацыю расейскага войска. Падкрэсьліваецца, што на сваёй пасадзе Дзьмітры Пантус аказвае ваенную падтрымку Расеі ў яе агрэсіўнай вайне супраць Украіны.
У сераду 10 траўня амбасадары ЭЗ упершыню абмяркуюць новы пакет санкцый супраць Расеі; пакуль ён яшчэ далёкі ад канчатковага ўзгадненьня, паведамілі крыніцы Свабоды.
Прыняцьце чарговага пакету санкцый адносна Беларусі па-ранейшаму замарожанае. Праца над новымі санкцыямі ЭЗ у дачыненьні да Беларусі не прасоўваецца з прычыны пытаньня ўгнаеньняў: шэраг краінаў Заходняй Эўропы настойваюць на паслабленьні санкцыйных абмежаваньняў, што тычацца экспарту беларускіх угнаеньняў.
Што будзе ў 11-м пакеце санкцый супраць Расеі
Прэзыдэнтка Эўракамісіі Урзуля фон дэр Ляен 9 траўня ў Кіеве заявіла, што ў 11-м пакеце санкцый супраць Расеі плянуецца ўвесьці забарону на імпарт новых тэхналёгій і запчастак для самалётаў, а таксама ўзмацніць адказнасьць за абыход санкцый.
«Мы працягваем рабіць усё залежнае ад нас, каб спыніць ваенную машыну Пуціна. Нашы санкцыі працуюць. Напрыклад, мы зьменшылі наш імпарт з Расеі прыблізна на дзьве траціны. Гэта вялізны ўдар па даходах Расеі. Мы ўжо прымусілі Крэмль заплаціць высокую цану дзякуючы 10 пакетам санкцый. Эўракамісія зацьвердзіла прапановы для 11-га пакета, які будзе сканцэнтраваны на недапушчэньні абыходу абмежаваньняў. Мы працуем у гэтым пытаньні з партнэрамі, у тым ліку краінамі G7», — паведаміла Урзуля фон дэр Ляен.
Паводле крыніцы Свабоды ў Брусэлі, у рамках новага пакету санкцый супраць Расеі прапануюць:
- уключыць у сьпіс новых фізычных і юрыдычных асобаў,
- распаўсюдзіць забарону транзыту праз тэрыторыю Расеі на падсанкцыйныя перадавыя тэхналёгіі і камплектуючыя, якія выкарыстоўваюцца ў аэракасьмічнай галіне (цяпер гэтая забарона распаўсюджваецца на тавары падвойнага прызначэньня),
- цалкам забараніць экспарт люксавых аўтамабіляў (цяпер забарона распаўсюджваецца толькі на аўтамабілі коштам больш за 50 000 эўра), распаўсюдзіць забарону на экспарт тэхналягічнай прадукцыі, знойдзенай на палях бітваў ва Ўкраіне,
- стварыць сыстэмы процідзеяньня абыходу санкцый: першым крокам будзе папярэджаньне трэціх краін аб тым, што яны абыходзяць санкцыі, наступны крок — накладаньне санкцый на суб’екты з трэціх краін, якія працягваюць абыходзіць санкцыі,
- увесьці дадатковыя санкцыі ў дачыненьні да іранскіх і 8 кітайскіх кампаній,
- распаўсюдзіць забарону перавозак на грузавыя аўтамабілі, зарэгістраваныя ў Расеі,
- узмацніць кантроль за імпартам мэталапрадукцыі — неабходна будзе прадэманстраваць, што прадукцыя, якая ўвозіцца з трэціх краін, ня зробленая ў Расеі ці з расейскіх кампанэнтаў (аналягічныя абмежаваньні будуць адносна драўніны і вырабаў з дрэва),
- новыя абмежаваньні на інтэлектуальную ўласнасьць,
- увядзеньне забароны на заход у парты ЭЗ суднаў, якія адключаюць сыстэму адсочваньня руху або перавозяць падсанкцыйныя тавары,
- уключэньне ў прававы акт забароны на імпарт нафты па паўночнай частцы нафтаправоду «Дружба» (г.зн. той частцы, якая ідзе празь Беларусь, Польшчу і Нямеччыну),
- пашырэньне сьпісу забароненых да вяшчаньня СМІ (уключаючы RT Балканы).
Санкцыі супраць Беларусі за падтрымку расейскай вайны ва Ўкраіне
Аляксандар Лукашэнка прызнаў, што зь Беларусі па ўкраінскай тэрыторыі стралялі ракетамі. Пры гэтым беларускіх вайскоўцаў на ўкраінскую тэрыторыю не адправілі.
Амбасадарка ЗША ў Беларусі Джулі Фішэр у інтэрвію Свабодзе заявіла, што «рэжым Лукашэнкі — саўдзельнік цяперашняга ўварваньня Расеі ва Ўкраіну, бо дазволіў Расеі зрабіць напад зь беларускай тэрыторыі».
26 лютага санкцыі супраць Расеі і Беларусі абвясьцілі Канада і Рада Эўразьвязу. У сьпіс трапілі 20 беларускіх чыноўнікаў і вайскоўцаў. 15 юрыдычных і 8 фізычных асобаў трапілі ў санкцыйны сьпіс ЗША.
28 лютага амбасадары краін Эўразьвязу ўвялі візавыя санкцыі ў дачыненьні 22 беларускіх высокапастаўленых асобаў.
Маладачанская фабрыка «МэбеЛайн» пайшла ў прастой, бо швэдзкая кампанія IKEA згарнула бізнэс у краіне. IKEA шчыльна супрацоўнічала яшчэ з цэлым шэрагам вытворцаў і фабрык, у тым ліку дзяржаўных. Сярод іх дзяржаўны «Менскі мэблевы цэнтар» з Маладэчна, магілёўскі вытворца тэкстылю «Магатэкс», менскі гадзіньнікавы завод «Луч» і іншыя.
У сакавіку Эўразьвяз забараніў экспартаваць прадукцыю дрэваапрацоўкі, вырабленую ў Беларусі ці экспартаваную зь яе. Міністэрства лясной гаспадаркі заявіла, што вымушана скіраваць прадукцыю з Эўропы ў Азію.
Празь цяжкасьці вядзеньня бізнэсу ў рэгіёне ня дзейнічаюць у краіне сэрвісы пошуку жытла на час падарожжаў і выправаў Booking.com і Airbnb.
Дацкая транпартна-лягістычная кампанія Maersk заявіла аб спыненьні перавозак грузаў у Беларусь 4 сакавіка. Пры сыход зь беларускага рынку паведамілі іншыя кампаніі падобнага профілю — DHL і FedEx.
5 сакавіка фінская кампанія OLVI паведаміла пра пачатак згортваньня свайго бізнэсу ў Беларусі, дзе кампаніі належыць «Лідзкае піва». 840 супрацоўнікаў заводу пакуль будуць атрымліваць заробак, спыненьне бізнэсу будзе паступовым.
6 сакавіка наклала санкцыі Рэспубліка Карэя. Там увялі меры экспартнага кантролю для Беларусі, мяркуючы, што яна «істотна спрыяе ўварваньню Расеі ва Ўкраіну».
8 сакавіка санкцыі ўвяла Японія. Актывы фізычных і юрыдычных асобаў, якія трапілі пад новыя абмежаваньні, замарожваюцца. Забараняюцца пастаўкі тавараў двайнога прызначэньня ў Беларусь і экспарт у адрас Міністэрства абароны Беларусі і «Інтэгралу».
Сусьветны банк спыніў усе праграмы ў Беларусі. Банк адзначыў, што ён не ўхваляў новых крэдытаў Беларусі з 2020 году.
Абмежаваньні закранулі спартовую галіну. Зборныя Беларусі розных узростаў адхілілі ад удзелу ў міжнародных турніраў у хакеі, гандболе і баскетболе. Беларускую зборную не дапусьцілі да Паралімпійскіх гульняў — 2022.
Рэйтынгавае агенцтва Fitch, зважаючы на санкцыі, панізіла доўгатэрміновы сувэрэнны крэдытны рэйтынг Беларусі да ССС, што азначае рэальную магчымасьць дэфолту.
Амэрыканская фінансавая кампанія American Express прыпыніла аказаньне паслуг у краіне. Па яе картках цяпер немагчымыя ніякія апэрацыі.
9 сакавіка Эўразьвяз ухваліў адключэньне ад SWIFT трох беларускіх банкаў. Гэта «Белаграпрамбанк», банк «Дабрабыт» і Банк разьвіцьця.
16 красавіка ўведзена поўная забарона на перасячэньне грузавым транспартам Беларусі і Расеі мяжы з ЭЗ. У рашэньні Эўразьвязу, якое апублікавана ў афіцыйным часопісе, сказана, што ЭЗ у адпаведнасьці з уведзенымі санкцыямі забараняе ўвоз і транзыт грузаў аўтатранспартам зь Беларусі і Расеі на тэрыторыю Эўразьвязу.
22 лістапада Канада пашырыла ранейшыя санкцыі. У сьпісы ўключылі дадаткова 22 беларускіх чыноўнікаў, а таксама 16 беларускіх кампаніяў, зьвязаных з ВПК, машынабудаваньнем, фінансавым сэктарам і чыгуначным транспартам. Сярод падсанкцыйных асобаў апынуліся адказныя за перавозкі расейскіх вайскоўцаў і тэхнікі, якая выкарыстоўвалася для ўварваньня ва Ўкраіну. У сьпісе кампаніяў, якія трапілі пад санкцыі, апынуліся беларускія Альфа-Банк і МТБанк. У красавіку 2023 у сьпіс дадалі яшчэ 9 беларускіх банкаў.
28 студзеня 2023 году прэзыдэнт Украіны ўвёў у дзеяньне рашэньне Рады нацыянальнай бясьпекі і абароны аб санкцыях супраць 185 юрыдычных і фізычных асоб, якіх Расея выкарыстоўвае для перавозкі па чыгунцы асабовага складу і вайсковай тэхнікі. У сьпіс трапілі «Беларуськалій», Гомельскі хімічны завод, «Беларуская чыгунка», «Белінтэртранс», «Грузавая служба-Захад», «Лякафарба», «Белгазпрамбанк», «ПЛМ-Інавацыі», «Кронаспан ОСБ», «Беллесэкспарт», «Супрацоўніцтва Транс-Агра», «Рэал-Агент», «Прамагралізінг», «АСБЛізінг», «Транзыт-Аўта-2003», «Ізатэрмічная лягістыка», «Омск-Карбон Магілёў» і іншыя.
20 ліпеня Аўстралія ўнесла ў санкцыйныя сьпісы высокапастаўленых вайскоўцаў Беларусі.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў