Лінкі ўнівэрсальнага доступу

Беларускага найміта, асуджанага ва Ўкраіне, перадалі Расеі. Абмен адбыўся на мяжы зь Белгародзкай вобласьцю


Вайскоўцы, якіх Украіна перадала Расеі ў абмен на сваіх палонных. 7 сакавіка 2023. Сярод іх імаверна беларус Максім Зязюльчык (другі справа, за мужчынам у чорнай куртцы)
Вайскоўцы, якіх Украіна перадала Расеі ў абмен на сваіх палонных. 7 сакавіка 2023. Сярод іх імаверна беларус Максім Зязюльчык (другі справа, за мужчынам у чорнай куртцы)

6 сакавіка стала вядома, што Ўкраіна ўключыла ў сьпісы для перадачы Расеі ў межах абмену палоннымі грамадзяніна Беларусі Максіма Зязюльчыка.

Грамадзянін Беларусі Максім Зязюльчык зь вялікай імавернасьцю ўвайшоў у пералік 90 расейскіх вайскоўцаў, якія знаходзіліся ў палоне ва Ўкраіне і якіх перадалі 7 сакавіка Расеі ў абмен на 130 украінскіх вайскоўцаў.

Як сьведчыць відэазапіс, распаўсюджаны Міністэрствам абароны Расеі, абмен адбываўся на мяжы Ўкраіны зь Белгародзкай вобласьцю. Максім Зязюльчык знаходзіўся ў аўтобусе разам зь іншымі расейцамі.

На тэрыторыі Расеі ўсім былым палонным перадалі пакеты з рэчамі, а адзін з вайскоўцаў сказаў, што ім павінны даць яшчэ і тэлефоны, каб яны маглі зьвязацца са сваякамі.

Расейскія вайскоўцы, якія вярталіся з украінскага палону, таксама маглі ўзяць гумавыя боты, якія стаялі на пляцоўцы перад стэлай з надпісам «Белгародзкая вобласьць».

Вайскоўцам, якіх Украіна 7 сакавіка перадала Расеі ў абмен на сваіх палонных, па вяртаньні на расейскую тэрыторыю прапанавалі гумавыя боты.
Вайскоўцам, якіх Украіна 7 сакавіка перадала Расеі ў абмен на сваіх палонных, па вяртаньні на расейскую тэрыторыю прапанавалі гумавыя боты.

6 сакавіка стала вядома, што Ўкраіна ўключыла ў сьпісы для перадачы Расеі ў межах абмену палоннымі грамадзяніна Беларусі Максіма Зязюльчыка, якога 18 студзеня ў Кіеве асудзілі на 10 гадоў пазбаўленьня волі за ўдзел у якасьці найміта ў баявых дзеяньнях ва Ўкраіне. Для гэтага ўкраінскі суд ухваліў рашэньне аб вызваленьні беларуса ад адбываньня пакараньня ва Ўкраіне.

Максім Зязюльчык асабіста падпісаў заяву, у якой пагадзіўся, што яго перададуць у Расею ў абмен на палоннага вайскоўца, грамадзяніна Ўкраіны.

Перад абменам яго перадалі Каардынацыйнаму штабу Ўкраіны ў пытаньнях абыходжаньня з ваеннапалоннымі.

Праз некалькі дзён пасьля публікацыі да Свабоды зьвярнулася жанчына, якая прадставілася сваячніцай Максіма Зязюльчыка. Яна пераконвала, што беларуса не было ў сьпісах абмену. Аднак яна адмовілася ад размовы для публікацыі.

Хто такі Зязюльчык

Максім Зязюльчык нарадзіўся ў Рудзенску Пухавіцкага раёну Менскай вобласьці. Служыў у падразьдзеле «Вэтэраны» кулямётнікам-рэтрансьлятарам з 21 ліпеня 2022 году. Да 25 жніўня ён знаходзіўся на пазыцыях сілаў Расеі ў акупаваным горадзе Ізюме Харкаўскай вобласьці.

Батальён «Вэтэраны» — падразьдзел прыватнай вайсковай кампаніі «Рэдут», якая спачатку ня ўдзельнічала ў баявых дзеяньнях, а выконвала функцыю аховы аб’ектаў.

Максім Зязюльчык удзельнічаў у баях каля Краснапольля ў Данецкай вобласьці. У час баёў за пазыцыі ў лесапаласе Дубы 30 ліпеня ён быў паранены і да 25 жніўня лячыўся на базе сталай дысьлякацыі «Рэдуту» ў Ізюме Харкаўскай вобласьці.

Грамадзянін Беларусі Максім Зязюльчык у верасьні 2022 году трапіў ва ўкраінскі палон пры вызваленьні ад расейскіх акупантаў Ліманскага раёну Данецкай вобласьці
Грамадзянін Беларусі Максім Зязюльчык у верасьні 2022 году трапіў ва ўкраінскі палон пры вызваленьні ад расейскіх акупантаў Ліманскага раёну Данецкай вобласьці

25 жніўня ў складзе батальёну «Вэтэраны» яго перакінулі на пазыцыі каля Сватава ў Луганскай вобласьці, дзе ішлі найбольш жорсткія баі. Пазьней расейцы перакінулі гэты падразьдзел у Ліманскі раён Данецкай вобласьці.

Урэшце 19 верасьня Максім Зязюльчык трапіў у палон да ўкраінскіх вайскоўцаў. 18 студзеня 2023 году суд асудзіў яго на 10 гадоў пазбаўленьня волі — максымальны тэрмін, прадугледжаны паводле выстаўленых яму абвінавачаньняў ва ўдзеле ў якасьці найміта ў збройным канфлікце, ваенных або гвалтоўных дзеяньнях (ч. 4 артыкулу 447 Крымінальнага кодэксу Ўкраіны).

Пасьля судовага выраку СБУ паведаміла, што Максім Зязюльчык быў агентам КДБ Беларусі — нібыта ў сьнежні 2020 году ён паступіў на службу ў 2-гі антытэрарыстычны аддзел КДБ на пасаду «выведніка».

Паводле легенды, ён меўся дзейнічаць пад выглядам замежнага найміта, каб сабраць інфармацыю пра ўзоры замежнага ўзбраеньня, якія атрымліваюць падразьдзелы Ўзброеных сіл Украіны ад заходніх партнэраў, а таксама «выведаць пляны магчымага ўдзелу расейскіх прыватных кампаній у спробах адхіліць ад улады дзейнага рэжыму самаабвешчанага прэзыдэнта Лукашэнкі». Сабраную выведную інфармацыю ён павінен быў перадаваць у Менск праз сувязнога.

Кіраўніцтва Беларусі падтрымала агрэсію Расеі супраць Украіны і дазволіла скарыстаць вайсковую інфраструктуру і паветраную прастору для ўварваньня расейскай арміі і абстрэлаў мірных гарадоў Украіны, ахвярамі якіх сталі дзясяткі тысяч цывільных украінцаў.

Вайна Расеі супраць Украіны

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў.
  • Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка даў інтэрвію расейскай прапагандыстцы Вользе Скабеевай, зь якога вынікала, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 1 жніўня Лукашэнка сказаў, што больш як палова тактычнай ядзернай зброі, якую заплянавана разьмясьціць на беларускай тэрыторыі, ужо «завезена і разгрупавана» па краіне. Ён ня раз заяўляў, што ўжыве ядзерную зброю ў выпадку агрэсіі супраць Беларусі.
  • У чэрвені 2023 году ўкраінскія войскі пачалі контранаступальныя апэрацыі на ўсходзе і поўдні краіны. Расейскія войскі падрыхтавалі добра ўмацаваныя лініі абароны, таму прасоўваньне контранаступу ішло са значнымі стратамі.
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы правялі некалькі масавых абстрэлаў украінскіх гарадоў, у Дніпры, Кіеве, Харкаве і іншых месцах дзясяткі людзей загінулі і атрымалі раненьні. Украінскі бок у адказ абстраляў расейскі Белгарад, некалькі чалавек загінулі.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG