Пра папярэднія замовы на новую лімітаваную калекцыю гадзіньнікаў «Мова. Ў» прадпрыемства аб’явіла напярэдадні. Там паведамілі, што яе стваральнікі натхняліся творчасьцю беларускіх пісьменьнікаў Янкі Брыля, Максіма Танка і Петруся Броўкі, піша «Zerkalo».
Сёньня прэс-служба завода паведаміла, што ўся калекцыя распрададзена, папярэдняя замова на яе спыненая.
Кожная з трох мадэляў гадзіньніка была выпушчана ў колькасьці 70 экзэмпляраў. Кошт гадзіньніка — 359 рублёў.
Гэта ўжо ня першы нацыянальны праект заводу «Луч». У 2018 годзе завод выпусьціў калекцыю «Волат», прысьвечаную беларускім нацыянальным героям — Канстанціну Астроскаму, Давыду Гарадзенскаму і Міхалу Глінскаму.
У 2019 годзе да Дня матчынай мовы «Луч» выпусьціў калекцыю аднастрэлкавых гадзіньнікаў зь літарамі ДЖ і ДЗ.
Праз год, у лютым 2020 году, завод выпусьціў гадзіньнікі зь вершам «Зорка Вэнэра». Гэта былі дзьве ўнісэкс-мадэлі — з чорным і сінім цыфэрблятам — выпушчаныя па 200 асобнікаў. Зь пярэдняга боку на гадзіньніках толькі зорнае неба і лягатып заводу, але на адваротным баку выбітыя першыя радкі верша «Зорка Вэнэра».
