«Тыя, хто знаходзіцца за мяжой, жадае вярнуцца на радзіму, але чагосьці баіцца, будуць мець магчымасьць зьвярнуцца (інфармацыя будзе разьмешчаная ва ўсіх сродках масавай інфармацыі) у камісію і атрымаць адпаведныя тлумачэньні — аб магчымасьці вярнуцца, аб наяўнасьці або адсутнасьці нейкіх прэтэнзій з боку дзяржаўных органаў да гэтай канкрэтнай асобы», — расказаў генэральны пракурор Андрэй Швед.
Апошнія месяцы перасьлед людзей, якія вымушаныя былі зьехаць за мяжу, а потым зь нейкіх прычын вярнуліся, узмацніўся. Сілавікі затрымлівалі беларусаў як адразу пасьля перасячэньня дзяржаўнай мяжы, так і празь некалькі дзён пасьля іх прыезду на радзіму. Кіраўнік Дзяржаўнай памежнай службы Беларусі Анатоль Лапо заявіў напярэдадні, што пры ўезьдзе ў Беларусь летась за «экстрэмізм» затрымалі звыш 50 чалавек.
Аляксандар Лукашэнка з нагоды магчымасьці вяртаньня тых, хто вымушаны быў уцячы ад перасьледу за мяжу, 24 студзеня заявіў: «Трэба дакладна вызначыць, хто сапраўды перагледзеў свае погляды і хоча спакойна жыць, вучыцца і працаваць. А хто не. Трэба памятаць: ня выключана, што некаторыя зь іх могуць скарыстаць гэта для нанясеньня шкоды інтарэсам дзяржавы. Таму наша задача — выключна індывідуальны падыход да кожнага і справядлівасьць у прыняцьці рашэньняў».
- Гэтымі днямі ў Гомлі праходзіць закрыты судовы працэс над адміністратарам пратэставых чатаў «97%» Тацянай Курылінай. 49-гадовая актывістка вярнулася ў Беларусь, паверыўшы ў праграму «Дарога дадому». Пасьля вяртаньня з-за мяжы яе затрымалі і абвінавачваюць па 12 артыкулах Крымінальнага кодэксу. Сілавікі ініцыявалі праграму «Дарога дадому», якая, паводле іх, «дазваляе тым, хто выехаў, вярнуцца без наступстваў».
- У студзені сябра Савету Рэспублікі Нацыянальнага сходу Беларусі Алег Дзьячэнка заявіў, што нязгодныя з уладамі беларусы, якія зьехалі за мяжу, могуць вярнуцца, калі «раскаюцца». «Але гэтыя людзі, на мой погляд, павінны стварыць годны плён пакаяньня. Знаходзячыся за мяжой, яны павінны зрабіць крокі насустрач нашай краіне», — заявіў ён. Адным з такіх крокаў чыноўнік назваў «удзел у розных мерапрыемствах за мяжой у падтрымку нашай дзяржавы».
