Пасьля гульні Лукашэнка выкаціў на лёд хлопца ў інвалідным вазку, зь якім зрабіў некалькі колаў на арэне.
«Гэтаму хлопцу трыбуны аплядавалі стоячы», — напісаў тэлеграм-канал «Пул першага». Высьветлілася, што хлопца завуць Павел Прахарэнкаў, ён ваяваў за Расею супраць Украіны, атрымаў раненьне і цяпер жыве ў Беларусі. Расказваем, што пра яго вядома яшчэ.
Ад 2014 году падтрымліваў прарасейскіх баевікоў
Паўлу 26 гадоў. Ён родам з Данецку. Яго выхоўвалі бабуля і дзядуля. Бацьку Павал увогуле ня ведаў, маці злоўжывала алькаголем. Ад 2014 года Павал падтрымаў расейскую акупацыю Данецку. Гэта можна прасачыць па ягонай старонцы «ВКонтакте». Ён зьмяшчаў у сябе і заявы лідэра прарасейскіх баевікоў Паўла Губарава, захапляўся Пуціным і зьневажаў Абаму, пускаў шпількі ў дачыненьні Ўкраіны, абураўся наяўнасьцю ў крамах Данецку Coca-cola.
«Вы зае...лі абс...раць Расею!!!», — эмацыйна напісаў Прахарэнкаў 14 лютага 2015 году.
Падарваўся на міне
Прахарэнкаў працаваў аўтамэханікам у Данецку. Беларускія прапагандысты паведамлялі, а ўкраінскія СМІ пацьвярджалі, што ў 2017 годзе хлопец пайшоў на службу ў «народную міліцыю ДНР». «Пул першага» падкрэсьлівае, што перад гэтым Павал параіўся зь дзедам.
«Калі я заб’ю салдата УСУ, то ён ня зможа забіць дзіця, бабулю ці дзядулю», — казаў Прахарэнкаў у інтэрвію расейскаму агенцтву «Спутник».
Служыў Прахарэнкаў у артылерыі, езьдзіў на самаходнай гаўбіцы 2С1 «Гвоздика». Калі пачалася паўнамаштабная вайна, то браў удзел у баявых дзеньнях на баку Расеі. Раненьне Павал атрымаў 30 красавіка, калі ягоная гаўбіцы падарвалася на міне. Сам Прахарэнкаў расказваў, што сядзеў зьверху, а ногі знаходзілі ў люку машыны. Адну нагу адразу ампутавалі, праз шматлікія пераломы хацелі і другую. Тады ў справу ўмяшалася Вольга Волкава.
Хто такая Волкава?
Апошнім часам Волкава актыўна абслугоўвае беларускую прапаганду, яна зьяўляецца ў самых розных шоў і перадачах на дзяржаўнай тэлевізіі. Гэта дырэктарка данецкай грамадзкай арганізацыі для дзяцей-інвалідаў «Дэльфіны». Яе сын Дзьмітрый хворы на ДЦП, займаецца плаваньнем. Найлепшым сябрам Дзьмітрыя якраз і зьяўляецца Павел Прахарэнкаў. Вольгу Волкаву Прахарэнкаў лічыць сваёй «маці», як і яна яго паўсюль называе «сынам».
Вольга шмат гадоў актыўна супрацоўнічае зь беларускім спартоўцам-паралімпійцам Аляксеем Талаем, які заўзята падтрымлівае Лукашэнку, рэпрэсіі супраць іншадумцаў і ідэі «русского мира». Сам Талай неаднаразова прыяжджаў у Данецк, сустракаўся там з «Дэльфінамі». Потым дзяцей з «Дэльфінаў» сталі вывозіць у Беларусь на лячэньне. У гэтым дапамагае гендырэктар «Беларуськалію» Іван Галаваты.
«Калі ў 2020 годзе ў Беларусі пачаліся падзеі, то ў мяне замерла сэрца і я чакала, што скажа Аляксей Талай. Мне так было страшна: людзі, куды вы лезеце, нейкая дзіўная жанчына (Сьвятлана Ціханоўская. — РС). І калі Аляксей даў камэнтар, што ён „за бацьку“, то ў мяне адлягло. Чаго вам не хапае з такім кіраўніком? Я зь ім (Лукашэнкам. — РС) пазнаёмілася — гэта чалавек-гара, у ім такая сіла, ён гаспадар, ён бацька. Ён любіць сваю зямлю, сваіх людзей, як дзяцей. Вы жывяце як мы калісьці, пры камунізьме», — казала Волкава ў інтэрвію генэральнаму дырэктару АНТ Марату Маркаву.
Менавіта Волкава патэлефанавала Талаю пасьля раненьня Прахарэнкава. Талай задзейнічаў свае сувязі, і тады зьявілася магчымасьць атрымаць лячэньне ў Беларусі.
Перавёз у Менск і жонку зь дзецьмі
Апэрацыю правялі ў Менскім абласным клінічным шпіталі. Апэраваў траўматоляг-артапэд Аляксандар Каваленка. Лекары абяцаюць, што можна выратаваць другую нагу Прахарэнкава. Цяпер былы ўдзельнік вайны Расеі супраць Украіны разам зь сям’ёй жыве ў Менску.
«Паўгода таму Павел Прахарэнкаў пераехаў з Данецку ў гэтую трохпакаёвую кватэру ў Менску, а яшчэ праз два месяцы перавёз і жонку зь дзецьмі», — гаварылася ў ток-шоў «За гранью» на расейскім тэлеканале НТВ.
Ці сам Павел здымае кватэру, ці яму гэта прадставіла дзяржава, у роліку не гаварылася.
«У Данецку вельмі страшна, таму мы вырашылі прыехаць сюды. Калі ўсё будзе працягвацца, то лепш застацца ў Беларусі, тут спакойна, а там вельмі страшна. Забіваюць мірных людзей — дзяцей, старых. Няма гарачай вады, няма сувязі, паўсюль ляжаць „пялёсткі“-міны. Няма нічога, мы вельмі радыя, што мы выбраліся», — казала жонка Прахарэнкава Ліна Тоніна ў камэнтары «Спутнику».
Пара пабралася шлюбам у траўні 2022 году, калі Прахарэнкаў быў у шпіталі. На той момант Ліна ўжо была цяжарнай, нарадзіла сына Яраслава, калі муж быў на лячэньні ў Беларусі. Ад першага шлюбу ў Ліны ёсьць яшчэ адна дачка. Цяпер сям’я Прахарэнкавых спадзяецца атрымаць беларускае грамадзянства.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў