1. Кім і калі створаныя народныя амбасады
Паводле Міхаіла Таўбэ, пад канец восені 2020 году стала зразумела, што ў сьвеце не хапае інфармацыі пра падзеі ў Беларусі і што афіцыйныя амбасады Рэспублікі Беларусь больш ня могуць паўнавартасна выконваць свае абавязкі і прадстаўляць інтарэсы беларускага народу.
10 сьнежня 2020 году было адкрыта 15 першых народных амбасадаў Беларусі ў розных краінах сьвету. Іх стварылі пераважна актывісты беларускай дыяспары, якія пераехалі за мяжу значна раней за тую хвалю эміграцыі, якая пачалася пасьля падзеяў лета-восені 2020 году.
У дэклярацыі пра стварэньне амбасадаў сьцьвярджалася, што беларусы замежжа
«не прызнаюць выбары прэзыдэнта Рэспублікі Беларусь 9 жніўня легітымнымі, а Аляксандра Лукашэнку абраным прэзыдэнтам згодна з вынікамі міжнародных экзыт-полаў, незалежнага назіраньня ў Беларусі, справаздачы АБСЭ пра фальсыфікацыі, афіцыйнымі заявамі ЭЗ, Вялікай Брытаніі, ЗША, Канады й іншых дэмакратычных краін» і «асуджаюць шырокамаштабныя рэпрэсіі супраць мірных грамадзянаў з мэтай незаконнага ўтрыманьня ўлады й падтрымліваюць патрабаваньні жыхароў Беларусі: вызваленьне ўсіх палітвязьняў і незаконна затрыманых, спыненьне гвалту й пакараньне адказных за яго, правядзеньне новых выбараў».
2. Колькі ў сьвеце дзейнічае народных амбасадаў
Паводле афіцыйнага сайту ініцыятывы belarusabroad. org, сёньня народныя амбасады і консульствы дзейнічаюць у 20 краінах сьвету (У Вялікай Брытаніі ёсьць амбасада і консульства):
Аўстрыі,
Бразыліі,
Вялікай Брытаніі,
Гішпаніі,
Ізраілі,
Італіі,
Канадзе,
Літве,
Люксэмбургу,
Нідэрляндах,
Нямеччыне,
Партугаліі,
Паўднёвай Карэі,
Польшчы,
Славеніі,
Украіне,
Францыі,
Чарнагорыі,
Шатляндыі,
Швэцыі,
Эстоніі.
Яны маюць свае старонкі ў Фэйсбуку, Твітэры і іншых сацыяльных сетках.
3. Чым народныя амбасады займаюцца
Характар працы народных амбасадаў, паводле Міхаіла Таўбэ, розны:
«Мы працуем бяз вонкавага фінансаваньня і рэсурсаў на абсалютна валянтэрскіх пачатках. Таму аб’ём і характар працы народных амбасадаў розьніцца ад краіны да краіны. Недзе гэта інфармацыйная праца і падтрымка нашых інфацэнтраў. А недзе амаль паўнавартасная дыпляматычная праца з пастаяннымі кантактамі ў мясцовых МЗС і прадстаўнікамі розных палітычных сілаў», — кажа Міхаіл.
Многія народныя амбасады аказваюць дапамогу новым эмігрантам зь Беларусі ў афармленьні дакумэнтаў. Гэта часта адбываецца, паводле Міхаіла Таўбэ, у супрацоўніцтве са старымі эмігранцкімі арганізацыямі, калі такія ёсьць у краінах знаходжаньня народных амбасадаў.
Яшчэ адзін кірунак дзейнасьці — дапамога ў арганізацыі візытаў у краіны знаходжаньня народных амбасадаў кіраўніцы Аб'яднанага пераходнага кабінэту Беларусі Сьвятланы Ціханоўскай, яе намесьніка і кіраўніка Народнага антыкрызіснага кіраўніцтва Паўла Латушкі ды іх калегаў.
«Шмат увагі нашымі прадстаўнікамі ўдзяляецца і сустрэчам зь мясцовымі палітыкамі, грамадзкімі дзеячамі і журналістамі, — кажа Міхаіл. —Прадстаўнікі народных амбасадаў даюць інтэрвію мясцовым СМІ, бяруць удзел у канфэрэнцыях і рассылаюць навінныя дайджэсты аб падзеях у Беларусі ў замежныя дыпляматычныя прадстаўніцтвы, якія існуюць у краінах знаходжаньня народных амбасадаў».
4. Самаадукацыя
У рамках ініцыятывы «Народныя амбасады Беларусі» працуе Школа народнага дыплямата.
«У рамках школы да нас прыходзяць розныя лектары, якія вучаць нас, як трэба працаваць, на чым менавіта трэба канцэнтравацца і як нам паляпшаць сваю працу. Цяпер мы працуем над пашырэньнем тэматычнага абсягу і кола саміх лектараў», — кажа Міхаіл Таўбэ.
5. Пляны ініцыятывы
На пытаньне пра пляны Міхаіл адказвае проста:
«Мы плянуем пашырацца геаграфічна. Зьбіраемся далей прыцягваць да сваёй працы актыўных беларусаў, якім было б цікава і якія могуць працаваць па нашых кірунках. Мы хочам пашырыць геаграфію знаходжаньня народных амбасадаў і ахапіць новыя дэмакратычныя краіны, каб мець магчымасьць лабіяваць беларускі парадак дня, даносіць праўдзівую інфармацыю і па магчымасьці ўплываць на сытуацыю ўнутры Беларусі».
Цяпер, кажа Міхаіл, актывісты ініцыятывы падвялі вынікі працы за два гады і зрабілі выснову, што яны недастаткова добра працавалі для інфармаваньня саміх беларусаў пра дзейнасьць народных амбасадаў. Пераважна інфармацыйныя высілкі ініцыятывы канцэнтраваліся на краінах знаходжаньня народных амбасадаў і на мовах тых краінаў.
Таму вырашана заснаваць свой тэлеграм-канал, чат для кантактаваньня і чат-бот для зваротнай сувязі, якія будуць працаваць на дзьвюх мовах — на беларускай і расейскай.
Старт тэлеграм-каналу заплянаваны на 10 сьнежня, калі ініцыятыве споўніцца два гады. Ён будзе публікаваць навіны пра дзейнасьць народных амбасадаў Беларусі.
